الموضوع: كوري ياباني اوروبي ...الزم حدودك واعرف انت بتكلم مين

والله يا جماعه الموضوع دا اكيد اتفتح مليون مره .. ناخدها مقارنه موضوعه بسرعه :

العربيه :
1- شاسيه
2- موتور
3- تصميم و شكل خارجى يمتع النظر
4- اعتماديه فى الصيانه
5- سعر اعادة البيع
6- كماليات

--- الكورى فى الشاسيهات معروف انه لا يقل عن الأوروبى و اليابانى فى حاجه .. و محدش يجيب عربيه كورى فى حادثه على 160 و يقولى العربيه ورق .. اختبارات التصادم كلها على 50 كيلو متر فى الساعه .

---الموتور - فعلا زمان كان الشركات اللى بتقوم بتاخد المواتير من شركات كبيره زى ميتسوبيشى و غيره ... بس النهارده مثلا كيا و هيونداي عاملين تكنولوجيا لوحدهم فى المواتير و فى انظمة الحقن المباشر و اللى متابع اكيد سمع عن اجيال ثيتا انجين اللى كلغوها ابحاث فوق ال 20.000.000 يورو و دا رقم مخيف بس فعلا الحاجات دى بتتكلف جامد

-- التصميم و الشكل الخارجى .. والله الكورى اشكاله مش كلها حلوه بس الحلو غطى على الوحش .. و محدش قال ل تويوتا تهبل و تسترخص فى تصميماتها .. و هنا شطارة كوريا انها جابت المهندسين من الشركات العريقه زى مرسيدس و فولكس و غيره

--- اعتماديه و صيانه : الكورى النهارده عربيه صيانتها سهله ... سريعه .. مريحه و قطع متوفره فى السوق و فى اكتر من جوده فى قطع الغيار .. دا غير انها موفره فى الينزين و تكييف لا غبار عليه

--- سعر اعادة البيع : الكورى اكتر العربيات اللى بتمسك سعر فى مصر .. و بره كمان .. مش عشان حاجه اكتر من ان كل اللى فوق ساهم انها تكون عربيه الناس عاوزاها عشان اعتماديتها و فخامتها اللى اكيد بتتناسب مع السعر طبعا

----كماليات : والله كوريا هى اللى دلعت الناس بالكماليات و دا مش عيب يا جماعه .. ماهو اى عربيه اوروبى تشيل منها الكماليات تحسها كدا زى الحلويات من غير سكر .. ملهاش اى لازمه و تعالو نشوف بى ام و مرسيدس و اودى .. الكماليات و الفخامه هما اهم سماتهم , و بردو كله بتمنه

كمان فى حاجه فى الكورى .. هيونداى فى امريكا كانت واخده جايزه فى حاجه اسمها customer loyalty يعنى عملو احصائيه لقو ان الناس اللى بتبيع هيونداي بيركبو هيونداى تانى .. و طبعا الأعتماديه هى السبب :)

اسف على الأطاله بس خلينا عمليين و السعر فى مصر غالى عشان الجنيه ضايع مش عشان العربيات وحشه :) و التكنولوجيا ليها تمن و انسى ان شركة تصرف علينا .. احنا زباين مش اكتر