آسف على الإزعاج و تصفيق حااااااااااااااد

**OlaOsman** · 23-08-2008 07:55 PM

دخلنا النهاردة فيلم آسف على الإزعاج. انا سمعت عنه كتير و ماحدش دخله إلا و عجبه اوي فطبعا تحمست بشدة اني اشوفه وروحنا النهاردة خطفناه.

الفيلم نال إعجاب الجميع بالفعل و نقطة قوته في رأيي هو انه بيطرح أفكار في منتهى الرقي في إطار محترم و راقي جدا. و هنا لية كلمة مع مؤيدي سينما خالد يوسف.. اهوه يا جماعة.. نقدر نعمل فيلم هادف و بيطرح فكرة و في نفس الوقت ما نقدمش مشاهد مغرقة في الجرأة زي اللي بيقدمها خالد يوسف. بالرغم من فكرة الفيلم تحتمل إدخال مشاهد جريئة، يعني السيناريو ممكن يستوعب مشاهد زي دي و ماكانتش هاتكون مقحمة على السياق الدرامي، بس فعلا الفيلم من غير ولا مشهد من إياهم و لا حتى تلميح قدر يوصل الفكرة اللي المؤلف و المخرج عايزين يوصلوها كاملة و الفيلم حاز على إعجاب الجميع و يعتبر بالفعل نقلة في نمط سينما الشباب.

عودة للفيلم نفسه فنقدر نقول ان دي مرحلة انتقالية في تاريخ احمد حلمي.. في الفيلم ده هاتشوف احمد حلمي كما لم تره من قبل.. الكوميديا مش غالبة عليه اوي و ممكن أداؤه يرجعنا شوية لأجواء سهر الليالي، انما طبعا مع نضج واضح لأحمد حلمي في الأداء و التعبير.. فعلا تفوق على نفسه في الفيلم ده.

طبعا انا مش عايزة احرق الفيلم للي لسه ما دخلوش انما اللي أقدر أقوله ان الفيلم ده بيحط كل واحد قدام نفسه زي ما يكون شايف مراية بالظبط، و من خلال السيناريو قدر المؤلف انه يعمل كده بطريقة صادمة عن طريق المفاجآت الغير متوقعة على الإطلاق و في نفس الوقت بطريقة ناعمة لما بدأ الاكتشاف و من ثم التغيير يحصل لبطل الفيلم.

فيلم آسف على الإزعاج من الأفلام العربي القليلة اللي أخرج فيها من السينما و أروح البيت وانا لسه بافكر في الفيلم و باخرج منه بكم أفكار و تأملات مش طبيعي و فعلا احمد حلمي بالنسبة لي فيه كان مفاجأة.. مفاجأة سارة طبعا :)

لسه عندي حاجات كتير أقولها على الفيلم.. أفكار و تأملات، بس مش عايزة احرق الفيلم للي لسه ما شافوش.

**حماده عزو** · 23-08-2008 08:23 PM

أنا شوفت الفيلم من فتره وبجد
لو كونت فهمتو كونت أولت عنو انو فيلم أكثر من رائع
لكن القصه مش مربوطه ببعضيها يعنىونا خارج
مكونتش عارف هوا أبوه الى مات من بدرى ولا أمو كمان ؟؟؟؟؟؟؟؟

**OlaOsman** · 23-08-2008 08:29 PM

المشاركة الأصلية كتبت بواسطة حماده عزو

أنا شوفت الفيلم من فتره وبجد
لو كونت فهمتو كونت أولت عنو انو فيلم أكثر من رائع
لكن القصه مش مربوطه ببعضيها يعنىونا خارج
مكونتش عارف هوا أبوه الى مات من بدرى ولا أمو كمان ؟؟؟؟؟؟؟؟

يبقى انت كنت محتاج تركز شوية اكتر من كده :)

**Bossy_Fadl** · 23-08-2008 09:26 PM

احييكي يا علا انك فتحتي الموضوع ده

بجد الفيلم ده كان صادم بالنسبة ليا

بجد ضحكت و عيطت و فكرت و كل حاجة حصلتلي و انا في الفيلم

افضل شيء في الفيلم انه من نوعيه ال Black Comedy

اللي محدش بقي بيقدمها من فترة طويله اوي

و اللي كان متخصص فيها الراحل نجيب الريحاني

العبقري احمد حلمي قدر انه يبعد عن جو الافلام بتاعه اليومين دول المشحون بكوميديا الافيه اللي هرونا بيها محمد سعد و هنيدي

قدر يخلي الناس تضحك و قلبها فيه شوية حزن و شجن

خلانا نفكر و نعيط و نموت من الضحك في نفس الوقت

احمد حلمي قدر يثبت للناس ان العمل الناجح مش لازم ابدا يكون فيه نكت و ناس شاربه بيره و رقاصات و الفاظ مالهاش لازمة عشان ينجح

فكرة الفيلم اظن اول مرة تتناقش في السينما العربيه

و المؤلف اعتمد علي فكرة الدراما النفسيه البعيده كل البعد عن الاسكتشات المعروفة في كل افلام اليومين دول

عاوزة اقولك كمان ان احمد حلمي من اكثر شباب الجيل الجديد احتراما لفنه و لجمهوره

يعني لا يمكن هيقبل في يوم تقديم مشاهد مخله زي اللي بنشوفها اليومين دول في افلام كتير

طبعا زي افلام خالد يوسف_برغم اعجابي الشديد بافلامه و بفنه_

بس احمد حلمي اثبت للجميع انه ممكن يقدم فكرة جيده بدون اي خروج عن المعهود لينا كمجتمع شرقي

للي لسه مدخلش الفيلم و ناوي يدخله.....الفيلم ممكن يبدو لك في الاول انه فيلم عادي من الافلام اللي كتير قدموها قبل كده و مجرد فكرة عاديه

بس متفكرش تحكم علي الفيلم قبل ما تكلمه لاخره خالص

بجد فكرة رائعه و صادمه في نفس الوقت

و طبعا بعيدا عن اداء احمد حلمي المعروف من زمان

احب احيي الاداء الرائع لمحمود حميده اللي اثبت انه من فناني الزمن الجميل

و كمان دلال عبد العزيز عجبني جدا احترامها لسنها

بجد تصفيق حااااااااااااااااد

ميرسي ليكي علا علي الطرح الرائع

بوســـــــي

**Powert** · 23-08-2008 09:26 PM

المشاركة الأصلية كتبت بواسطة حماده عزو

أنا شوفت الفيلم من فتره وبجد
لو كونت فهمتو كونت أولت عنو انو فيلم أكثر من رائع
لكن القصه مش مربوطه ببعضيها يعنىونا خارج
مكونتش عارف هوا أبوه الى مات من بدرى ولا أمو كمان ؟؟؟؟؟؟؟؟

انت محتاج تدخل الفيلم ده تاني

الفيلم جامد جداً واقوى من اي افلام اتعملت السنة دي واحمد حلمي تفوق على نفسه وعلى

ادائه في فيلم كده رضا , من كتر ما الفيلم جميل وناس مش لاقية كلام تقوله عليه

النقاد قاله مقتبس من فيلم "العقل الجميل" (دكتور ناش) لاراسل كرو , انا شوفت

الفيلم بتاع راسل كرو ومش شايف اي اقتباس ولا مشاهد قريبه من بعض غير مشهد

صندوق البريد بس , ولاول مرة اشوف محمود حميده يعمل دور محترم وجميل ويثبت

انه ممثل قدير ويحترم , بجد الفيلم ده هيوضع احمد حلمي قدام مأساة في فيلمه القادم

**mohamed ibiza** · 23-08-2008 09:32 PM

فيلم تحفة و احمد حلمي تفوق علي نفسه في الفيلم ده انا دخلته و عجبني جدااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا اااااااااااااااااااااااا

**bassam nagy** · 23-08-2008 09:51 PM

قصة الفيلم جديدة وغريبة
وتقريبا حقق اعلى ايرادات

**mo7amed_omara** · 23-08-2008 09:58 PM

فعلا الفيلم حلو و عجبتنى قصتة وانا كنت رايح الفيلم على اساس انة كوميدى و حضجك كتير
طلع العكس خالص و دى كانت المفاجاة
وعلى راى استاذة علا الفيلم دة يحتاج تصفيق حاااااد و صفاففير كمان ههههههههههههههههههههه

**Scent7104** · 23-08-2008 10:24 PM

فعلا أجمد و أرق تهنئة لكل من شارك في هذا الفيلم من أول الفكرة لغاية آخر التتر ...

أنا شخصيا أكتر حاجة عجبتني اوووي ...مش هتصدقوا ايه...اني لاقيت أخيرا" حاجة معمولة في مصر متقنة 100% و حد مذاكر قوي كده في حاجات كتير (سيناريو و قصة و حوار و علم نفس و كل حاجة) ...بجد ده أكتر حاجة حاسة انها ممكن تكون قدوة في الفيلم.

أنا دخلت الفيلم و ماكنتش متصورة اني ادخل فيلم سينما اليومين دول مرتين المرة الأولى كانت تاني يوم نزول الفيلم في السينما و طبعا كنت رايحة على انه كوميديا و ضحك و خلاص بعد الكآبة و القرف و الاشمئزاز اللي في الأفلام التانية و طبعا ما كنش في حد لسه عرف حاجة عن الفيلم فكان أكبر مفاجأة سينيمائية بالنسبة لي... و شاءت الظروف و دخلته تاني و في المرة التانية كنت بشوف حاجات جديدة. (طبعا لأني كنت مركزة قوي:-)...

بجد كل من في الفيلم تفوق على نفسه ...

وملحوظة: تحية خاصة لمحمود حميدة و ياريت يفضل كده على طول و هو في الأدوار المحترمة ده أحلى بكتييييير