تغير كاوتش فيرنا

**ramy_shousha** · 17-12-2014 09:11 AM

السلام عليكم ورحمة الله وبركاته
تسلم يا mshmshm3 باشا على الرد السريع
أنا راكب عندى 4 جنوط سبور ومقاس الكاوتش 185/60/14
المشكلة عندى إن فردتين الكاوتش إللى ورا عاوزين يتغيروا خلاص وإللى قدام كويسين على حسب كلام كذا واحد بتاع ظبط زوايا وترصيص
فخلاص كده هجيب فردتين كاوتش جديد - دورت ولقيت إن أحسن حاجة هو بريدجستون ومن على الموقع بتاعهم لقيت الأسعار دى

1- Bridgestone Sports Tourer MY02 عامل 529 جنيه للفردة
2- Bridgestone TURANZAعامل 586 للفردة
3- Bridgestone TURANZAعامل 741 للفردة

وبما إنى مش فاهم الفرق قوى بين أول نوعين لتقارب الأسعار النسبى بينهم قلت أسأل هنا فى المنتدى وكمان لما أروح عندهم أركب
لحد هنا وكلام كويس مفيش مشكلة
المشكلة كلها عندى تتلخص فى إن الجنط الخلفى يمين "سبور" عاوز يتغير لأن فيه خبطة أو لوحة بسيطة وبرضه دا كلام بتاع ظبط الزوايا ودى صورته

دلوقتى بقى أنا محتار أجيب جنط زيه منين أصلاً بما إنه جنط صينى مش ماركة ولا حاجة معروفة تدور عليها بسهولة
ولا أغير بجنط واحد حديد مكانه "جديد أو إستيراد" على حسب إللى هلاقيه "وأنا مش لاقيهم أصلاً"
أو أغير الجنوط كلها بطقم جنوط حديد مقاس 14 زى إللى بينزل أصلاً فيها "فيرنا" وهى كاملة وهجيبهم منين "جديد أو إستيراد" برضه
وممكن يبقوا فى حدود سعر كام !!!
أنا دورت هنا فى المنتدى كتير ووصلت لنتيجة إن الجنط الحديد أحسن فى الأمان شويه والأداء بتاع العربية والمحافظة على الكاوتش والعفشة
مقارنة بالجنوط السبور الصينى
ماذا تفعل لو كنت مكانى !!!
وآسف جداً على الإطالة . . .

**atef_5005** · 17-12-2014 10:11 AM

لو مكانك هجيب جنط حديد زي اللي بينزل في الفيرنا الاوتو و عليها كاوتش بريدجستون

**ramy_shousha** · 17-12-2014 11:28 AM

السلام عليكم ورحمة الله وبركاته
atef_5005 باشا - تسلم يا كبير
أنا فعلاً قررت إنى أجيب طقم جنوط حديد 14 بتاع الفيرنا الأوتوماتيك
و 4 فرد كاوتش بريدجستون - وقلت أروح أركبهم فى التوكيل بتاعهم أحسن وهناك أعرف الفرق بين النوعين المذكورين Sports Tourer MY02 أو TURANZA - الرجالة هنا بيشكروا فى فرع عمارات العبور - صلاح سالم
سألت فى توكيل غبور ( أو هبور على تسمية الرجالة هنا ليه ) قالوا إن الطقم 4 جنوط حديد عامل 2200 ج يعنى 550 ج للجنط
وسألت فى كذا مكان فى أحمد سعيد مش لاقى الجنوط بتاع الفيرنا 14 - لقيت بتاع تويوتا وكام حاجة كده ( قالى الفرق فى العرض - الفيرنا 5 بوصة والتانى كان 5.5 بوصة ) مستعملين فى حدود 800 ج
- أجيبهم منين بقى الجنوط دى ؟!؟
- أجيبهم جديد ولا مستعمل ؟!؟
- أسعارهم جديد ومستعمل فى حدود كام ؟!؟

**ESSAMOK** · 01-01-2015 01:51 PM

انا باغير كاوتش وعندى مساعد امامى ومساعد خلفى وحشين وسألت بتاع الفشة اللى بتعامل معاه من سنين قالى غير طقم الكاوتش بمقاس 13\70\ 185 عشان مركب جنوط اسبور صينى مقاس 13 وفعلا اشتريت امبارح 4 فرد نوع جديد اسمة بريسا من انتاج شركة مكسيس عمالين 1650 بالتقسيط
لسه هركب بعد يومين واشوف الدنيا ماشية ازاى واديك خبر

**hanyemad123** · 02-01-2015 10:25 PM

للاخ صاحب الموضوع الاصلى
انا معايا فيرنا 2012 و مستلمها بمقاس الكاوتش 185 / 70 / 13
ما تقلقش خالص من الفرق الفرق بسيط جدا ـ
علو العربية بسيط و مش حيأثر على الثنبات بالدرجة الملحوظة و العرض 1 سم مش حيحك فى حاجه
و ما تسمعش لبتوع الكاوتش اغلبهم مش فاهمين حاجه و بيفتى و خلاص
اخر حاجه موضوع السرعه الفرق 2.5 كيلو بس
المهم نوع الكاوتش اختار نوع بيزود الفعاليه بتاعت الفرامل

**ramy_shousha** · 24-02-2015 04:42 PM

السلام عليكم ورحمة الله وبركاته
دورت على جنوط حديد 14 فى الحرفيين - زى ما الرجالة هنا نصحونى - ما لقيتش منها حاجة بحالة كويسة
فإضطريت إنى أستعدل الجنوط السبور اللى راكبه فى العربية والحمد لله بقت تمام
كشفت على الكاوتش لقيت فردتين ضايعين واتنين كويسين
جبت فردتين نوعهم ديليوم - Delium
مواصفاتها كويسة "طبعاً بعد ما ذاكرت هنا أكواد الكاوتش فى موضوع الأخ / Amr Axel رحت عقدت الصنايعى فى عيشته وزهقته"
بيفرجنى على النقشة قولتله هاتلى الفردة من الجنب كده قالى يعنى هتفهم إللى مكتوب عليها - قريت اللى عليها Temp A - والسرعة كانت H
والحمولة مش فاكر كانت 82 متهيألى والإحتكاك كان A وعامله 350 ج الفردة بالرينجات والبلف والنتروجين - قلت زى الفل - الواحد يوفر شويه البريدجستون كانت ب 750 ج الفردة "مع عدم المقارنة طبعاً"
ركبت الفردتين الجداد قدام ورجعت اللى قدام ورا وعكستهم طبعاً ورميت واحدة من القدام وعملت واحدة استبن علشان الإستبن عندى كان جنط 13
العربية تمام الحمد لله والثبات تمام - المشكلة دلوقتى لما تحمل فيها أربع أفراد بتحك فى الكاوتش ورا مع الرفرف والحكة فى جنب الكاوتش وخايف يحصل لا قدر الله حاجة فى الكاوتش بسبب الحكة دى تبقى خطر على اللى سايق العربية
عملت موضوع عن الحكاية دى لأنى مش عارف أختار الحل الصح فيها
يا ريت لو حد من رجالة المنتدى يساعدنى أعمل فيها إيه
وشكراً مقدماً
لينك الموضوع
http://www.nilemotors.net/Nile/458911-14-60-185-a.html