الموضوع: ايه هي عربيتك وايه مميزاتها وعيوبها بأمانة

موضوع جميل جدااا .. والأجمل إن كل واحد بيتكلم بحياد عن المميزات والعيوب ..
بالنسبالي كان معايا أكتر من عربية وهتكلم بترتيب تنازلي :

1- شيري qq مو 2004 .. 850 سي سي
المميزات :
إستهلاك بنزين داخل البلد ممتاز (12 كيلومتر/لتر) .. طرق سريعة حوالي (15 كيلومتر/لتر)
قطع غيار تعتبر متوفرة ومتعتبش أوووى فيها + رخيصة (جوز مساعدين أمامي 350 جنيه - خلفى kyb 250 جنيه) وهو ده اللى غيرته فيها من يوم ما جبتها لحد ما بعتها (إستعمال 8 شهور)

حجم رائع فى الركن والزحام وبتاخد 4 أشخاص بدون تأثير كبير ع قوة عزم الموتور بعكس سيارات تانية ركبتها كانت بتتأثر بعدد الركاب اللى معايا ..

أوبشنز كتير بالنسبة لسعرها ..

تسارع ممتاز + سرعة قصوى حوالي 140 كيلومتر عند rpm 5000 للغيار الخامس

حقن ألكتروني + ميكانيكا غير معقدة وأي حد كان يقدر يشتغل فيها ..

صالون حجمه ممتاز مقارنة بالماروتي والعربيات الصغيرة من نفس الفئة

ما شاء الله فعلا العربية تتميز بقلة وندرة الأعطال .. إستعمال 8 شهور خروج يومي لمشوار حوالي 30 كيلو فى زحام القاهرة ..

أغلب قطع غيارها مشتركة مع الدايو ماتيز

تقفيل داخلي ممتاز وخامات ممتازة .. يعني مفيش مكونات ضعيفة بتتكسر ولا بلاستيك ردىء بالتابلوه

العربية لولا إنها صيني كانت تستاهل يكون سعرها أعلى من كده مقارنة بالأوبشنز اللى فيها والتكنولوجيا اللى فيها ..

تكييف معقول وتبريده معقولة مقارنة بموتورها الصغير .. يعني كان بيعمل شغل كويس لو شغلته فى المشاوير الداخلية .. لا أنصح بتحميل الموتور فوق طاقته على الطرق السريعة بتشغيل التكييف
العيوب :

صاج ضعيف .. الرفارف الأمامية كانت منبعجة للداخل بسبب إن حد يجي يركن "جسمه" ع الرفرف ..

وزنها خفيف ع الطريق وبتطير طيرااااان فوق المفصلات الخربانة بتاعة الدائري .. بس مش خفيف للدرجة المميتة بتاعة الأتوس 1998 اللى ركبتها سنين وكنت بعاني من وزنها الخفيف .. ولكن وزنها عامل شغل جامد مع الموتور الصغير بتاعها وبيحقق تسارع رهيب وإستجابة رهيبة ..

عربية عاوزة إستخدام ناعم مش غشيم .. وانا عشان شاب بعتها لإني خوفت أبهدلها تحت رجليا لإن سواقتي عنيفة شوية .. ولكن كانت بتلبي جميع متطلباتي ..

شكلها مش كل الناس بتحبه .. بناتي شوية

عفشة خفيفة كنت بحس بأي زلطة ع الطريق ... ولكن عالية ع المطبات وعمرها ما أحتكت فى المطبات مهما كنت محمل ناس معايا ..

بعض قطع الغيار بتكون عزيزة شوية أو غير متوفرة وبتضطر تستناها لحد لما تيجي من الميناء .. عربية والدي qq برضو وقعد أسبوعين مستني سيرفو فرامل ولكن أخرة ما زهق ركب سيرفو دايو ماتيز وأشتغل فيها زي الفل ..

2- سيات ابيزا 1994 .. 1300 سي سي
مميزات:
ثبات رائع - وزن تقيل ع الطريق بيديك ثقة رهيبة فى الملفات - صاج ناشف وتقيل - موتور عزمه كان عظيم بالنسبة لوزن السيارة - شكلها برستيج ومازالت تحتفظ برونقها بالرغم من انها موديل قديم - قطع غيار متوفرة جدااا وأسعارها معقولة جداا سواء جديد أو إستيراد (فانوس امامي الإزاز بتاعه أتكسر جبت وش الفانوس بـ 30 جنيه فقط !!!!) - تكييف تلاجة

عيوب:
إستهلاك بنزين خراب بيوت (بالنسبة للعربية اللى كانت معايا وحالتها) - مش سهل تلاقي منها حالة كويسة أو مش مطحونة - كاربراتير مش أنجكشن - العربية موديل قديم وبالتالي هتبقى زبون دائم عند الصنايعية لإن كل يوم عاوز تشد فيها حاجة سواء ميكانيكا او عفشة أو كهربا

3- فيات بونتو 2001 .. 1300 سي سي
مميزات:
شكل لذيذ وحديث - أوبشنز متطورة - ثبات رائع جدااااا ع الطريق - إستهلاك بنزين معقول
عيوب:
قطع غيار غالية بصورة مبالغ فيها - العربية أغلب أعطالها بتكون فى الكونترول أو الكومبيوتر بتاعها (لازم كهربائي يكشف بالكومبيوتر عشان يعرف يحدد ايه العطل ويقولك هو كهربا ولا ميكانيكا عشان متدوخش مع الصنايعية)

4- سوزوكي ماروتي 2006 - 800 سي سي
مميزات:
حجم صغير فى الركن والمناورات - إستهلاك بنزين إقتصادي بصورة إسطورية - قطع غيار رخيصة جدااا ومتوفرة وأي صنايعي بيفهم فيها لإنها كاربراتير وميكانيكا بدائية بعض الشىء
عيوب:
صالون داخلي صغير جدااااااااااا - مش اى حد هيبقى مرتاح فى سواقتها خصوصا لو كان طويل أو جسمه شديد لإنها مناسبة أكتر للبنات والستات - هيكل العربية ضعيف جداااااااا والتخانة بتاعة الأبواب مضحكة جداااا - تسارع متواضع والسرعة القصوى حوالي 120 كيلو وتحس إنها هتنفجر منك

5- دايو نوبيرا 2006 .. 1600 سي سي
مميزات:
عربية كبيرة وعائلية وبرستيج وفخمة - قطع غيار متوفرة بالعبيط وأسعارها معقولة جدا جدا - أى حد بيفهم فيها - تسارع ممتاز وثبات رائع وسرعة قصوى إنتا وشطارتك (أنا شخصيا وصلت بيها لحد 150 ومقدرتش أكمل وخوفت) - إعادة بيع ممتازة - عربية مناسبة جدااا للسفر والطرق الطويلة أكتر من إنها تكون سيارة للمشاوير الصغيرة

عيوب:
إستهلاك بنزين كبير - عفشة سيئة - فرامل سيئة جدا - صاج مش قوى بما فيه الكفاية

6- هيونداي أتوس 1998 .. 1000 سي سي
مميزات:
قطع غيار متوفرة بدون مشاكل - تسارع ممتاز - عملية جداا جدااا - صالون داخلي واسع ومريح ويشيل 5 أفراد بدون مشاكل - إستهلاك بنزين جيد جداا - حمالة أسية وأستحملت معانا 4 سنين بدون أي مشاكل وكل اللى كنا بنعمله فيها صيانات دورية أو تغيير قطع غيار إستهلاكية زي تيل الفرامل والمقصات والكبالن والخ الخ الخ

عيوب:
خفيفة جدااااااا ع الطريق وأعتقد غير أمنة فى السفر خصوصا فى فصل الشتاء لو في رياح شديدة - غير أمنة فى الملفات العنيفة لإن أبعادها شاذة جداااا - شكلها مكلكع كده وتحس إن صعب تظبطها أو تروشها

أتمنى أكون أضفت شىء للموضوع الجميل ده

الاكسيل
مميزاتها:
تجميعها حلو ماشاء الله
عربيه واسعه من جوه وشنتطها واسعه
سهله فى الصيانه وقطع غيارها مش غاليه جديده واستيراد
بيتسقطلها موتور لانسر البطه
عيوبها:
صاجها خفيف
واطيه جدا ولو ركبتلها علايات بتدبدب
بتنط من ورا ومش ثابته بعد ال110 فى الغرز (عكس المازدا كانت ثابته فى الغرز)
شرخ عند الركبه اليمين فى كل العربيات
تكييفها يعتبر مش موجود الا عربيات قليله

المشاركة الأصلية كتبت بواسطة elawany13

باشا
مش فاهم تقصد ايه بإن الماروتى واسعه من جوه عن الشاهين !!!!
ده انا بشوف اللى قاعد جنب السائق بيكون كتفه لازق فى السائق

فعلا ده انا بحمد ربنا انى رفيع لما اى حد مليان بيركب جنبى شوية شوية وهيقعد على رجلى (ماروتى 99)

نوبيرا 2 2002
مميزاتها
واسعه جدا - بتستحمل بغباء - موتور شديد - قطع غيار فى كل حته و رخيصة جديد و استيراد - اى حد بيفهم فيها
ثبات عالى جدا لو العفشة سليمة و حلو لغايه 140:160 لو العفشه فيها حاجات بايظه
اعتمادية عاليه

عيوبها
بتستهلك بنزين كتير فى الزحمه - صوت الى معايا رخم جدا و عالى اوى - حساسة اوى للزيت الى بيتحط فيها