ايه هي عربيتك وايه مميزاتها وعيوبها بأمانة

**Walkman** · 08-07-2013 06:52 PM

موضوع رائع و الله و ياريت يبقى فى كل قسم من اقسام الماركات تجميع لعيوب و ممزات كل موديل عربية من مالكيها.

الحمد لله معايا نيو اكسنت 2010 مانوال و بحبها اوى وهى كمان بتموت فيا

المميزات:
1- سحب تحفة و ثابتة لحد 160 تقريباً.
2- لو ماشى عادى و مش بتجرى و بتنقل على 2.5 او 3 RPM مش هتحس بhkih تسحب بنزين مقارنة بأى عربية 1.6 CC.
3- التابلوه شيك لونين (عندى بنى فى بيج) و خاماته جيدة مش تحسه بلاستك رخيص و العدادات نورها ابيض (تقريباً الى فبل 2010 اخضر).
4- الى قاعد قدام مرتاح مش متضايق (بس ميكونش طويل اوى اوى يعنى).
5 - شنطتها مش ضيقة على عكس منظرها من بره و بتشيل.
6- الباور حلو و انت ماشى عادى او واقف (مش ميه يعنى بس مريح).
7- تكييف تلاجة.
8- هيونداى فمتقلقش من توافر قطع الغيار او اعادة البيع.

العيوب :
هى حبيبتى اه بس الحق حق :)
1- العفشة ناشفة اوييييييييي ، و طول مانتا ماشى بيها عمالة تتنطط ومن ورا الى قاعد على الكنبة بيبقا فى الملاهى.
2- الفرامل بتقفش و العربية بتزحف لو فرملت جامد بس احسن من الفيرنا( مع كامل احترامنا للفيرنا).
3-بعد ال 160 متتهورش بيها جامد عشان الثبات و الباور بيبقا ميه.
4- الكنبة ضيقة من ورا.
5 الزجاج ابيض (زى عربيات كتير يعنى) فبتبقى نار فى لو سبتها فى الشمس.
6- لو عايز تجرى و هتعدى ال 120بالذات و انت طالع متزعلش من سحب البنزين .... بلاااااااعة ما شاء الله زى اى 1.6 cc، و صوت الموتور بيبقى عالى اوى.

بس اجمالاً عربية تحفة، و عيوبها موجودة فى عربيات كتير اوى بس بحاول ابقى منصف، و لو مش فارق معاك موضوع العفشة الناشفة تبقى من احسن العربيات فى فئتها و سعرها

**moh19227** · 09-07-2013 12:09 AM

المشاركة الأصلية كتبت بواسطة omaroof

1- كورولا 2010
عربيه ممتازة - استهلاك بنزين مافيش - ناعمه جدا - واسعه ومريحه
عيوبها : عزل ضعيف وده اكبر عيب فيها موش شايف لها عيوب اخرى بصراحه

2- لانسر بومه 2013 رياضية
عربيه حلوه موش حاقدر اقول اكتر من كدا
عيوبها : استهلاك بنزين موش عاجبنى والكل بيقول عشان اسبورتس

ياباشا حرام عليك انا مشفتش زى عزل الكورولا
واحد صاحبى كان عنده كورولا 2010 لما كنت بسوقها وادوس كلاكس وانا قافل الازاز مكنتش بسمع الكلاكس

اما لو بتتكلم عن العزل الحرارى فانا مقدرش افيدك ف الحته دى بس ع العموم التكييف بتاعها جبار ويقول معاك احلى كلام

**hassanin_lada** · 09-07-2013 12:51 AM

المشاركة الأصلية كتبت بواسطة moh19227

ياباشا حرام عليك انا مشفتش زى عزل الكورولا
واحد صاحبى كان عنده كورولا 2010 لما كنت بسوقها وادوس كلاكس وانا قافل الازاز مكنتش بسمع الكلاكس

اما لو بتتكلم عن العزل الحرارى فانا مقدرش افيدك ف الحته دى بس ع العموم التكييف بتاعها جبار ويقول معاك احلى كلام :b4_095:

فعلا الكرولا عزلها ممتاز انا لو مقفل العربيه والار بي ام واصل ل 3000 مش بسمع صوت المتور وفي مكان متوسط يعني ولا زحمه ولا هادي بعد كده الصوت بيبدأ يبان بصعوبه

**memo2000soft** · 09-07-2013 01:15 AM

كان معايا 128
المميزات
- قطع غيار رخيصة جدا ومتوفرة
- صيانتها سهلة وصنايعية كتير شغالين فيها
- استهلاك بنزين معقول
- اعادة البيع جيدة جدا
العيوب
حدث ولا حرج بس للامانة انت راكب عربية بتكنلوجيا السبعينات يعني مش عايزين نظلمها كتير
- قطع غيار مش معمرة خالص
- طبعا ضيقة جدا من جوة والشنطة صغيرة جدا
- سواقتها صعبة جدا ونشفة
- اعطال كتيرة جدا
- طبعا ما فيش ثبات بعد ال 70 يمكن ال 60 كمان
- مافيش سحب
- مع ان الموتور 1100 بس ما بيركبلوش تكييف
- ناس كتير فاكرة ان الافضل انها تتعلم السواقة علي 128 بس بجد العربية دي سواقتها صعبة اوي

كفاية كدة علاشان الحق اتكلم علي عربيتي الموجودة ديلوقتي اللانوس
لانوس 2
المميزات
زي معظم الكوري
- قطع غيار متوفرة
- استهلاك بنزين جيد جدا
- اعادة البيع ممتازة
- ناعمة وسحبها جيد جدا
- واسعة من جوة وشنطتها واسعة كمان
- اعطلها قليلة جدا
طبعا فيها ممزيت كتير تانية
العيوب
- قطع غيرها مش معمرة اوي زي الياباني بس معقولة بردو
- الثبات وحش جدا بعد 110 او 120
- فرامل متوسطة لغاية 90 او 100
- التكييف بيأثر علي سحب العربية

**talhawy** · 09-07-2013 02:31 AM

معايا تويوتا 98 عيون اوتوماتيك 1300 كربراتير

المميزات :
-عفشة ناعمة جدا
-تكييف تلاجة .... انا باتجمد على الدرجة التالتة من 4 درجات
-باور ناعم وتقيل فى نفس الوقت على السرعات العالية
-العربية عالية بغباوة ومابيهمنيش اى مطب مهما كنت محمل ومع ذلك العلو مش مؤثر على الثبات فى السرعات العالية
-ثبات قوى جدا على الطريق لحد 130 او 140 كمان لو طريق نضيف وكل اما احملها بالعيلة والشنط احس انى راكب مرسيدس مع النعومة على الطريق ( الصيف اللى فات كنت راجع من مطروح لاسكندرية فى عز الضهر مشغل التكييف ومحمل 5 افراد فى العربية غيرى والشنطة مليانه وماشى طول الطريق بين 140-160 .... يعنى اداء وتحمل جبار )
-قطع غيار فى المتوسط يعنى مش رخيصة زى الكورى ولا غالية زى الالمانى بس معمره جدا

العيوب :
-الموتور 1300 كربراتير يعنى سحب ضعيف وخصوصا مع التكييف وطبعا كل مشاكل وقرف الكرباتير( وان كنت ناوى اخر السنة دى لو فضلت محتفظ بالعربية انى اسقطلها موتور 1600 انجكشن خليجى )
-شنطة الموديل ده الى حد ما ضيقة بالنسبة لى

**Hossam_hassan4** · 09-07-2013 04:04 AM

ستروين ds3

مميزاتها : ثبات كويس جدا لحد 200 - خامات صناعه جيده جدا - تصميم كويس جدا داخليا و خارجيا و استغلال كويس للمساحات - فرامل و نظام امان كامل - القعده قدام مريحه جدا -

العيوب : مالهاش قطع غيار خارج التوكيل - سعر اعاده بيع سئ خاصه لو اول مالك - القعده ورا مش متعبه بس مش كويسه في الطلوع و النزول

**mohammed dodda** · 09-07-2013 07:27 PM

المشاركة الأصلية كتبت بواسطة hossam_hassan4

ستروين ds3

مميزاتها : ثبات كويس جدا لحد 200 - خامات صناعه جيده جدا - تصميم كويس جدا داخليا و خارجيا و استغلال كويس للمساحات - فرامل و نظام امان كامل - القعده قدام مريحه جدا -

العيوب : مالهاش قطع غيار خارج التوكيل - سعر اعاده بيع سئ خاصه لو اول مالك - القعده ورا مش متعبه بس مش كويسه في الطلوع و النزول

....سيارة فى منتهى الروعة هيه وأختها الكبيرة الds5...أحترم أختيارك أستمتع بالعربية وربنا يباركلك فيها ولاتأخذ السوق المصرى المتخلف مقياس لك...حضرتك جبت بيها توب سبيد كام ؟

**eslamrace** · 09-07-2013 11:08 PM

كيا برايد سيدان اوتوماتيك
المميزات :
اقتصاديه فى البنزين
قطع غيار متوفره واسعارها مناسبه
باور جيد وكماليات معقوله
ابعاد مناسبه مع حجم شنطه جيد جدا
اتساع دتخلى مناسب وموتور محترم جدا 1300 سي سي
صاج محترم وبيتحمل
العيوب :
قطعتين غيار غير متوفرين الا فى التوكيل <اسكاتره باور و جير بوكس اوتوماتيك >
التكييف لما بيشتغل بياثر جدا على سحب الموتور
التابلوه بيتأثر جدا بالشمس والطاره بتتاكل منها

**Hossam_hassan4** · 11-07-2013 04:53 AM

المشاركة الأصلية كتبت بواسطة mohammed dodda

....سيارة فى منتهى الروعة هيه وأختها الكبيرة الds5...أحترم أختيارك أستمتع بالعربية وربنا يباركلك فيها ولاتأخذ السوق المصرى المتخلف مقياس لك...حضرتك جبت بيها توب سبيد كام ؟

شكرااجداا :) ........ اناجبت بيها 205 بس مفصلتش و مرضتش اقرص اكتر من كده بس اعتقد ممكن تجيب لحد 215

**enghany** · 11-07-2013 04:54 PM

بيتلز 1969
اولا هي عربيه جميله جدا لكن مشكلتها قطع غيار فشيخه يعني كربراتير الالماني 2500 جم و البرازيلي 1700 و الصيني 900 و الاستيراد 600 و علبه دركسيون ب 1500 استيراد في عربيه ب 8000 جم
النترا 2005
مميزات
ثابته جدا علي الارض قطع غيار اسعرها كويسه و فرامل جيده و تكييف ممتاز
العيوب
استهلاك بنزين عالي و عفشه محتاجه لصانه علي فترات قريبه
نيو اكسنت 2009
ممتازه جدا العربيه دي بس مشكلتها انها دنجل خلفي يعني فيها دابه شديده من ورا يعني ماقولكشي علي الراكب ورا لو احنا في رمضان هيفطر