Verna Zero....TakeCare wenta bteshtery

**moudyman** · 24-08-2008 01:14 PM

Shabab ana Seme3t Kalam we 2olt Ansa7 aly 7ayhstery....fee Ma3rad 3arabya 3and el-dewe2a (gamb Ahmed Sa3eed) mashooooooor gedan by3mel 7araka Zebala fel Verna...lama bygebha men el-Mina mesh bygebha 3ala na2alat bygebha Mashya we 3shan yraga3ha Zero byfsel el-3adad we yraga3o tany..fa 7'odo balko...el-ma3rad mashhor gedan Samir Rayyan..ma3a el-3elm ana Gebt #arabety Meno Toyota we kanet wana bastelemha 3amla 80Kilo we so7'na fa men el-wade7 enaha kanet gaya metsa2a fa 5odo balko ana 7abet bas ansa7ko

**Nile_Storm** · 24-08-2008 01:22 PM

حركه فصل العداد دي بيعملها ناس كتير جدا
ده غير عمال المعراض و هما بينقولها بيبهدلو العربيات
قمه اللامبالااه
و ربنا يسترها علينا
كنت واقف ادام توكيل المنصور مره و الله 4 عربيات اوبترا اتحكو ادامي بسبب غشوميه العمال و عدم حرصهم علي ا لعربيات
تعمل ايه في الغل
الاحسن تشتري من التوكيل علشان البلاوي دي
و ربنا يسترها
و المفروض ايا كان نوع العربيه تفحصها كويس و متستلمش الا لو كانت 100 100

**Hosam_Optrawy** · 24-08-2008 03:00 PM

لعلمك اغلب المعارض والتجار الكبار بيجيبو العربيات متساقه من المينا عشان يوفروا
من فتره كنت فى المنصور عشان اشترى اوبترا فلقيتها اغلى من برا
فبسأله ليه مش هى هى العربيات وانت اصلا اللى بتديهم العربيات
قاللى اه بس انا بجيب لحضرتك العربيات على حملات من المينا
انما الباقى بيجيبوها بسواقين من المينا عشان يوفرو
والسواق ماشى فاتح التكييف وطاير على 200
وطبعا الكلام ده غلط على العربيه وهى لسه زيرو

**Nile_Storm** · 24-08-2008 03:05 PM

غالبا قصده علي الفيفا يا هندسه
و بعدين لو سواقه مش هتبقي ماشيه اكتر من 40 50 كيلو

**Eng.Ahmed** · 24-08-2008 03:13 PM

المشاركة الأصلية كتبت بواسطة Nile_Storm

غالبا قصده علي الفيفا يا هندسه
و بعدين لو سواقه مش هتبقي ماشيه اكتر من 40 50 كيلو

صح ياباشا ، يبقى قصده فعلا على الفيفا ، و عموما حتى الفيرنا الى بتيجى من ابورواش ال50 كيلو دول بيحرقوا عليها اوى ، انا اول مره لما رحت اعمل صيانه ال1000 فى ابورواش و كنت واخد بالى انى مجريش بالعربيه ولا اشغل التكييف فى الالف الاولانيه لقيت اسطول فيرنا زيرو طالعين من ابو رواش طايرررررررررررربن و مشغلين التكيف ، سألت نفسى اكيد عربيتى حصل معاها كده برضه

**AHMEDCAR** · 25-08-2008 10:34 AM

المشاركة الأصلية كتبت بواسطة Eng.Ahmed

صح ياباشا ، يبقى قصده فعلا على الفيفا ، و عموما حتى الفيرنا الى بتيجى من ابورواش ال50 كيلو دول بيحرقوا عليها اوى ، انا اول مره لما رحت اعمل صيانه ال1000 فى ابورواش و كنت واخد بالى انى مجريش بالعربيه ولا اشغل التكييف فى الالف الاولانيه لقيت اسطول فيرنا زيرو طالعين من ابو رواش طايرررررررررررربن و مشغلين التكيف ، سألت نفسى اكيد عربيتى حصل معاها كده برضه

نفس الى حصلى

حركه العداد دى مفروفه فى كل المعارض و احد صحبى كان شغال فى معرض و كان بيفصل العداد بتاع العربيات و يسافير بيها شرم كمان تخيلوا

**Adham** · 25-08-2008 11:05 AM

المشاركة الأصلية كتبت بواسطة moudyman

ma3a el-3elm ana Gebt #arabety Meno Toyota we kanet wana bastelemha 3amla 80Kilo we so7'na fa men el-wade7 enaha kanet gaya metsa2a

مافيش ميناء على بعد 80 كم من القاهرة - أسكندرية 220 بالاضافة لباقي المسافة جوة القاهرة يبقى عالاقل 250 كيلو
و السخنة برضة اكتر من 80 كيلو و دمياط اكتر

ال 80 كيلو دول يبقوا من استلام في 6 اكتوبر مثلا و اتساقت لغاية معرض الوكيل

الفيرنا مصري مش استيراد_ يبقى اتساقت من المصنع لغاية المعرض, طبعا اكيد فنيين الاستلام اللي ساقوها هروها قرص و شغلوا التكييفات و فحتوها قبل ما تستلمها

مرة من كذا سنة كنت عند بتاع الدوكو بارش عربيتي
لقيت عربية زيرو صغيرة يمكن ميرا او ماروتي بتترش و الراجل اللي جايبها عمال يناقش الصنايعي و يوصية عليها قوى انة مش عايزها تبان مرشوشة بتاتاً فبعد ما مشي باسأل الصنايعي قاللي اصل دة صاحب معرض و العربية اترشت و جايبها يرشها و بيوصي عليها علشان يعرف يبيعها من غير مالزيون اللي حايشتريها ياخد بالة انها راشة باب (على ما أذكر كان الباب الخلفي يمين و العربية لونها أحمر)

خلاص مافيش ضمير و لا أمانة و كلة غش و تدليس