الموضوع: النصب من خلف ستار شركات الحاق العمالة المصرية بالخارج

انا بقالى فترة كبيرة بتابع اعلانات الوظائف فى السعودية والدول العربية وببعت السى فى بتاعى لشركات التوظيف ورحت عملت مقابلات كتير فى كذا شركة توظيف ولكن لم يحالفنى الحظ
المهم كنت دايما ابعت السى فى للايميلات الموجودة فى الاعلان المهم النهاردة بفتح الايميل بتاعى لقيت رسالة من الميل اللى انا كنت باعت عليه السى فى بتاريخ 26/5/2013 وفى نص الرسالة كالاتى :

تمت الموافقة علي السيرة الذاتية لسيادتكم برجاء سداد الرسوم كي نتمكن من ارسال السيرة الذاتية وصورة العقد المبدائي إلي الكويت

شــــــــــروط خاصــــــة

قانون العمل الكويتي كل مالم يرد ذركة بهذا العقد يخضع لأحكام قانون العمل الكويتي
حرر هذا العقد من أصل ونسختين ، الطرف الاول والطرف الثاني بيد كل طرف نسخه وتحفظ النسخه الثالثة لدى وزارة الشئون الاجتماعية والعمل .

وشـكراً

الأستعلامات / 000000000
الاصفار اللى موجودة فى الاستعلامات ده رقم تليفون محمول انا مردتش اكتبه

ومرفق مع الرسالة نموذج لعقد عمل عليه شعار وزارة الشئون الاجتماعية والعمل الخاصة بالكويت
انا اتصلت على الرقم اللى فالرسالة وقلتله انا جالى ايميل فيه كذا وكذا انا عايز استفسر ده ايه قاللى حضرتك السى فى بتاعك اتاخد عليه موافقة وبعتنا نسخة من العقد المبدئى
قلتله طيب ايه التفاصيل
قاللى حضرتك منين
قلتله من القاهرة
قاللى الشركة بتاعتنا فى كفر الشيخ
قلتله ايه تفاصيل العقد والراتب وكده
قاللى مدرسة الاهلية فالكويت والتاشيرة مدرس والعقد قيمته 12.000 هتدفع منهم 6.000 قبل السفر وبعدين بيتخصم الباقى على 3 شهور من الراتب
قلتله طيب ايه الاجراءات اللى هتتعمل دلوقتى
قاللى حضرتك هنستكمل بياناتك ونبعت صورة من جواز السفر والسى فى الى المدرسة وبعدها بعشر ايام هيبعتولنا العقد النهائى وتقدر تستعلم عنه فى السفارة هنا وفى خلال اسبوعين من بعدها هتعمل الكشف الطبى وتسافر فى خلال الاسبوعين دول
قلتله اوكى بس ايه المطلوب دلوقتى
قاللى حضرتك هاعمل اوردر ليك ولازم تعمل تحويل بمبلغ 100 جنيه من خلال البريد او من خلال فرع موبينيل
قلتله طيب ازاى ابعت من خلال موبينيل قاللى هتحول 100 جنيه على الرقم اللى انا بكلمك منه قلتله طيب
قاللى وياريت يبقى باسرع وقت
قلتله بكرة باذن الله
قاللى لا حاول النهاردة علشان نلحق نبعت اوراقك للكويت
قلتله انا مفيش جنبى اى فرع لموبينيل
قاللى اى سنترال
قلتله انا فى منطقة كلها مصانع فى اكتوبر ومفيش جنبى حد وهاخلص شغلى متاخر
قاللى شوف اى سنترال
قلتله ربنا يسهل وقفلت معاه على كده

ملاحظاتى :-
1- طبعا اول حاجة انا مش متخيل الموضوع وكده وسفر وشغل فى الكويت وبراتب معقول
2- اول حاجة جت فى بالى لما سالنى انت منين وقلتله من القاهرة ولما جيت سالته على الشركة قاللى فى كفر الشيخ "علشان ميبقاش فى مجال ان اقول له اجى ادفع الفلوس بدل التحويل"
3- لما قلتله ابعت من خلال البريد قاللى اصل احنا مش بنبقى فالمكتب على طول " انا طبعا كنت بزنق عليه فالكلام"
4- حتة ان ابعتله 100 جنيه على رقم موبيل باين اوى انها اشتغالة
5- اول حاجة عملتها بعد ماقفلت معاه شفت صندوق الصادر بتاعى من الايميل وجبت الايميل اللى انا كنت باعت عليه السى فى ودورت على النت على اعلانات ليه ملقيتش غير اعلان واحد بتاريخ 19/5/2013 والاعلان محطوط فيه اسم شركة توظيف فعلا بس عنوانها فى شارع مراد فى الجيزة
6- فتحت نموذج عقد العمل اللى مبعوت مع الرسالة لقيت ورقة ورد عادية ومحطوط فوق شعار وزارة الشئون الاجتماعية والعمل الكويتى دورت على النت على نموذج لعقد العمل فى الكويت ولقيت بالصدفة فى احد المنتديات نفس النموذج اللى مبعوت ليا على الايميل
7- مفيش شركة توظيف قدمت فيها وبعت لها السى فى الا اما كلمتنى وحددت معاد مقابلة شخصية حتى وان كان مفيش مقابلة كانو برده هما اللى بيتصلو انما ده سايب رقم تليفونه وانا اللى اتصلت عليه
8- قلت كده فى حاجة مش مظبوطة فاتصلت تانى على نفس الرقم ورد عليا ومعرفنيش وسالنى على اسمى وقاللى حضرتك كنت لسه متصل من شوية قلتله اه ياريت اعرف اسم الشركة وعنوانها بالظبط
قاللى الشركة اااااااااااااااااااا اسمها سما وعنوانها جنب مسجد ابراهيم الدسوقى
9- كده انا اتطمنت انها اشتغالة وقفلت معاه

نصايح منى علشان محدش يقع فريسة للناس دى :
اولا : مش كل اعلان ينزل فيه وظيفة وفيه ايميل ابعت عليه وخلاص
ثانيا : شركات التوظيف بتبقى ليها رقم فى وزارة القوى العاملة
ثالثا : محدش يدفع فلوس لحد من غير مايبقى متاكد منه

اخر حاجة عايز اقولها بعد كل اللى انا حكيته ده هل فى نسبة شك ولو 1 % ان الراجل ده ميكونش نصاب؟؟؟؟؟؟؟؟؟؟؟؟؟؟؟