أختبار قيادة سوزوكي Sx4 هاتشباك -كريم منير

**Karim_Monir** · 24-08-2008 02:51 PM

السلام عليكم ورحمه الله
وانا في مارينا من اسبوعين كدة اتعزمت اعمل تست درايف للعربية SX4
من احد مسئولي المبيعات بشركة سوزوكي لانه طلع معرفة قديمة
مفوتش الفرصة وكنت عندهم الساعة 12 بالليل لان مواعيد التست درايف من 11 الى 2
بعد منتصف الليل

خدنا العربية انا واستاذ مصطفى من مبيعات سوزوكي وطلعنا بيها وللاسف معرفتش اخرج

بيها برة مارينا على الطريق السريع اسكندرية مطروح لانها غير مغطاه تامينيا غير جوة

مارينا فقط وعلى ذلك توكلت على الله وربطت الحزام وطلعنا بالعربية جوة مارينا 5 من

اول شاطيئ لابلاج لغاية لسان الوزراء وحتى نهايتة ودي مسافة 7 كم تقريبا والعودة
انا عملت الاختبار على عربية هاتش باك ودي بتتميز عن السيدان بجنوط 16 وبعض
الكماليات التانية والشكل الانسيابي الافضل

وسع العربية معقول ومش في وسع عربيات تانية زي تيدا وكرولا ولانسر بومة
سقف مرتفع ينفع لطوال القامة
كراسي السيارة ناشفة وبزاوية قائمة بعض الشيء وغير مريحة اطلاقا حسيت بكل زلطة
عدينا عليها في ضهري

تسارع العربية اكثر من رائع ورغم اني بكرة السيارت الاتوماتيك الا ان فعلا تسارع العربية
حلو جدا جدا واحسن من السيفك الجديدة كمان
اغيار الاول مع الكيك داون مافصلش الا بعد ال 40 كم بشوية
والتاني دخل ال 80

ولما تقرص على الموتور تحس بصوت نعرة خفيفة بس حلوة مش وحشة نعرة رياضية
الثبات معقول ورغم اني نبهت على مهندس مصطفى اللي كان قاعد جنبي اني هابهدل العربية

الا انه متوقعش اللي انا عملتة فيها فعلا :
خدت مطبات على سرعات عالية عشان اشوف نظام التعليق فيها
وخدت الملفين الوحيدين الموجودين على اقصي سرعة وثباتها كان معقول عشان جنوطها ال 16 بوصة

الا ان اسواء حاجة فيها فعلا النعومة
العربية فعلا تفتقر للنعومة وبتدب في المطبات بشكل غريب ومش دبة كاوتش زيادة فى الضغط مثلا لاء دبة سوست ناشفة

جينا لاصعب جزء من الاختبار لاننا كنا رجعنا خلاص وانا ماحسيتش اني بهدلت العربية كفاية قولتلة انا عايز ادخل الباركينج بتاع شاطئ لابلاج وده للي مايعرفوش
عبارة عن مدق صخري رملي فيه مطالع ومنازل متفاوتة بيخصص بالنهار لركن السيارت اللي داخلة شاطئ لابلاج وعددها بالمئات

المهم دخلت الجراج وهاتك يا ملفات على اقصى سرعة في طريق خشن لاختبار نعومة العربية وثباتها في نفس الوقت على الملفات الضيقة
ثبات العربية حلو لكن على حساب الراحة فعلا
انا نازل من العربية ضهري مفشفش فعلا

خامات التابلوة معقولة مش فاخرة ولا فقيرة
وكذلك الفرش والابواب بس لا يقارنو بتيدا هاتشباك طبعا

مستوى الرؤية معقول لان الكراسي مرتفعة لكن زجاج الباب الامامي طويل زيادة عن اللزوم عشان يعملوا سقف مرتفع فطلع الباب عامل زي باب الميكروباص وفعلا شكلة مش حلو

التكييف حلو بس انا كنت بجربة بالليل وماكنش فيه فرصة اني اجربة في عز الحر والعربية 1600 فالتحميل على الموتور معقول
وكلمة هنا لاخت حنانيا :

مفيش حاجة اسمها التكييف له موتور مستقل غير موتور العربية
اي تكييف في الدنيا عشان يشتغل لازم يستمد طاقتة من محرك السيارة
ولما بتشغلية والعربية مطفية انتي كدة بتشغلية على البطارية

مجملا السيارة حلوة بس ناشفة وادائها رياضي
شكلها من ورا حلو لكن قدام مش ظريف
لو معايا نفس الفلوس ال 114 الف جنية هاجيب نيسان تيدا هاتش باك بدون تردد
صور للسيارة التي تم اجراء الاختبار بها

كريم منير
تم اجراء اختبار القيادة بمارينا 5 يوم 12 اغسطس 2008الساعة 12 بعد منتصف الليل

**wawoo** · 24-08-2008 03:01 PM

شكرا يا كريم على الاختبار , فية تفاصيل مهمة فعلا .
و عاوز اسئلك لية انت شايف التيدا احسن ,
و هل ممكن نشوف اختبار مماثل للتيدا و للديهاتسو تريوس :)

**hazem_khidr** · 24-08-2008 03:09 PM

شكرا علي الاختبار يا كريم
استاذ من يومك و الله:)

**محمد عز** · 24-08-2008 03:14 PM

شكرا على التقييم والاختبار ياكريم
بس تحس الاس اكس فور عبارة عن سويفت على اكبر سنه مع انى شايف ان السويفت احسن منها فى كل حاجة (ما عدا طبعا الوسع الداخلى)

**Karim_Monir** · 24-08-2008 03:22 PM

المشاركة الأصلية كتبت بواسطة wawoo

شكرا يا كريم على الاختبار , فية تفاصيل مهمة فعلا .
و عاوز اسئلك لية انت شايف التيدا احسن ,
و هل ممكن نشوف اختبار مماثل للتيدا و للديهاتسو تريوس :)

الشكر لله
ماينفعش اقارن شركة كبيرة زي نيسان بشركة زي سوزوكي
نيسان يعني التيما ومورانو وتيدا سيارة العام في اليابان ل 2007 وحاجات تانية كتير

تريوس تخرج برة المنافسة لانها في فئة تانية غيرهم
تيدا ناعمة وعزل قوي وموتور محترم وشكل رائع وتوكيل كويس جدا وفرش داخلي فاخر وثبات ممتاز مع نعومة رهيبة ودي اهم ما يميز نيسان وتعتبر تيدا انعم عربية ياباني بعد الكرولا
ماينفعش اقارنها بسوزوكي خالص
وانا ركبت التيدا كراكب مش سائق واوعدك اول ما تسمح الفرصة هاعملها اختبار قيادة ان شاء الله

**wawoo** · 24-08-2008 03:22 PM

المشاركة الأصلية كتبت بواسطة casber

شكرا على التقييم والاختبار ياكريم
بس تحس الاس اكس فور عبارة عن سويفت على اكبر سنه مع انى شايف ان السويفت احسن منها فى كل حاجة (ما عدا طبعا الوسع الداخلى)

اعتقد يا كاسبر انها مبنية على نفس شاسية السويفت على ما اتذكر

**meza** · 24-08-2008 03:26 PM

بيعجبنى فى مواضيعك يا أستاذ كريم ... أولاً إنك مش بتجامل حد و بتقول رأيك بكل صراحة

ثانياً : إن التست درايف بتاعك لأى عربية = بهدلة .. بس عن خبرة ... يعنى مش أى بهدلة

شكراً عالتقييم ... أنا مكنتش أعرف حاجة عن العربية دى قبل كده

**ahmedfd** · 24-08-2008 03:33 PM

شكراً فعلاً يا كريم باشا إنك إفتكرتنا علشان تفيدنا بالإختبار الـ professional ده بس يا ريت تفاصيل أكثر مثل وضعية القيادة و العدادات و وسع الشنطة و الكماليات اللي في العربية و الحاجات اللي متفوتش عليك دي علشان يكون Test Drive متكامل.