تقرير بالصور عن تغيير رشاشات لانوس2 برشاشات bmw m40
السلام عليكم
الموضوع ان العربية كانت بقت مخنوقة بطريقة تقرف و بتاكل بنزين جدا جدا
نزلت موضوع هنا اني فاكر ان ال TPS باظ لان ال RPM مش بيعلي كويس مع التكييف و الناس ردت عليا و قالولي اعراض البوظان بتاعته ان ال RPM يبقي علي 2000 و مينزلشي و عرفت اني بفكر غلط
http://www.nilemotors.net/Nile/360807-tps.html
استاذنا محمد ممدوح قالي غير الرشاشات و بوجيهات و اظبط فيشة الاوكتان
و تم الاصلاح و النتيجة الحمد لله العربية رجعت زي الاول و احسن شوية كمان سواء في السحب او استهلاك البنزين او في المفاجيء
الاعراض:
برجلة عند الدوارة الصبح
خنقة عند الضغط المفاجيء
تقطيع علي السرعات العالية
استهلاك بنزين عالي جدا
تأخير الدوارة في منتصف النهار
القصة بالتفصيل:
نزلت الحرفيين اول مرة يوم الاثنين اللي فات الساعة 12 و طبعا بعديها عرفت ان المحلات يوم الاتنين بتفتح متأخر لانه اول يوم بعد الاجازة و قلبت الدنيا علي رشاشات BMW M40 اللي استاذ محمد ممدوح بيوصي بيها دائما في مواضيعه و طلع عيني بدون مبالغة اني افهم المحلات بتاعة ال BMW انا عايز ايه حسسوني اني بتكلم علي عربية مش موجودة !!
في الاخر اتصلت بأستاذ محمد ممدوح و استاذ طارق الاتنين مردوش عليا :bump1: و كنت محتاس جدا بصراحة خصوصا اني كنت واخد اجازة مخصوص علشان اغير الرشاشات لانها خربت بيتي استهلاك بنزين بصراحة و قبل ما امشي معدي علي محل صدفة لقيته بيقولي ايوه موجودة و بقولة بتركب علي لانوس (كنت كل ما اقول لواحد الكلمتين دول يعاملني زي ما اكون اهبل) قالي اه ياباشا بتركب و عملناها كتير و كمان بتحسن الاداء !!!! :guitarplay1:
المحل اسمة المتحدة في شارع المرسيدس و هو الوحيد اللي عارف الموضوع
المهم في الاخر بقوله عايز طقم قالي الحاوية جاية بلليل :afterboom: طيب بكام ياعم قالي ب 250 جنية
و انا طالع من الحرفيين استاذ محمد ممدوح اتصل عليا و حكيت له اللي حصل فقال ليا انه فعلا المحل ده الوحيد اللي فاهم القصة و شكرته علي اهتمامة.
اخدت رقم الراجل بتاع المتحدة و كلمته بلليل قالي الحاوية جت و الرشاشات موجودة و تعالي في اي وقت
رحت يوم الخميس اخدتهم منه و طلعت علي مركز الصفا اركبهم و انضفهم بالالتراسونيك و اظبط نفسي بقي بعد الكبت اللي انا فيه :guitarplay1:
و ده اعلان مركز الصفا اللي في المنتدي لكل اللي حابب يعرف تفاصيل عنه
http://www.nilemotors.net/Nile/249389-a.html
المهم وصلت المركز و انا عارف الاسعار من الاعلان اللي هنا علي المنتدي و بقول اهو اجرب مش هخسر حاجة المهم روحت الساعة 4 العصر !!! دخلت لقيت فيه شاب محترم كده قاعد علي كمبيوتر الاستقبال فبوريله الرشاشات بتاعة ال BMW قالي ليا انا مركبتهاش قبل كده بس هي شبة رشاشات الاكسنت جدا و علي كل حال لو حضرتك متأكد ممكن نركبهم قولتله ماشي التكلفة كام التنضيف بالالتراسونيك و التركيب ؟ قال ليا 170 جنية عبارة عن 120 تنضيف و 50 تركيب
فبقولة و خصم نايل موتورز ؟ مفيش ثانيتين بالظبط لقيت صاحب المركز جه بنفسة و قالي نورتنا و نايل موتورز له خصم عندنا و كمان فيه كشف يوم الجمعة ببلاش علي العادم و علي الحساسات و انت جي الخميس فهنعتبرك جيت الجمعة و نعملك الكشوفات ببلاش و نشيل لك 20 جنية من الحساب يبقي كله 150 جنية :guitarplay1:
انا بصراحة عجبني المقابلة جدا و الاكتر من كده ان المهندس احمد صاحب المركز اخدني بقي عند العربية و فضل يشرح ليا هنعمل كذا و نطمن علي كذا و شرح تفصيلي جي في الطريق متقلقوش
المهم انا كنت تعبان شوية طلعت الاستراحة و خمس دقائق و لقيت العربية داخلة انا مصدقتش السرعة بصراحة
نزلت جري لقيت العربية اتعل ليها اسكان علي الحساسات و طبعولي ورقة فيها تفاصيل القرايات و طمنوني علي الحساسات كلها الحمد لله مع شرح لكل قراية من الفني المختص
قولت للفني انتو ليه بتعملوا كل ده ؟ قال انا عايز اتأكد ان الرشاشات السبب بحيث متدفعشي فلوس علي الفاضي و فعلا هو عنده حق
المهم اخد الرشاشات جوه علي جهاز الالتراسونيك و قالي ساعة الا ربع و النتيجة تطلع و نقول لحضرتك كفاءة الرشاشات و خلال الوقت ده هنقيس العادم قبل تغيير الرشاشات و نسجل القراية علشان نقارنها بعد التغيير
المهم في الاول حط جهاز في البوابة كده معرفشي بتاع ايه اللي هو في الصورة
[IMG]http://nileup.com/up/uploads/nilemotors_13707089771.jpg[/IMG]
و بعدين جاب جهاز قياس العادم اللي في الصورة ده و وصلة علي البطارية و ركب الخرطوم في الشكمان و قاس لقي القراية 3.5 لقيته برق و قالي كده عالي جدا المفروض القراية من 0.2 الي 1.2 بالكتير مش 3.5 !!! كده مليون في المية الرشاشات بايظة
صورة جهاز قياس العادم
[IMG]http://nileup.com/up/uploads/nilemotors_13707089772.jpg[/IMG]
و ده الخرطوم بالمشبك في الشكمان
[IMG]http://nileup.com/up/uploads/nilemotors_13707089773.jpg[/IMG]
المهم الفني فك الرشاشات و طلعهم برة بالمسطرة و دخلهم جوة في الغرفة المخصصة للتنضيف الممنوع دخولها لغير العاملين و طلع بالرشاشات القديمة فرط في ايدة و دي صورة الرشاش القديم
[IMG]http://nileup.com/up/uploads/nilemotors_13707089775.jpg[/IMG]
المهم شوية و جالي الفني قالي ليا الرشاشات سليمة و زمن الفتح و القفل متساوري و الجهاز مطلعهم 26 و هي المفروض بتبقي من 24 الي 28 و ده معناه انهم سلام (انا مفهمتش القرارات دي بصراحة)
قولتله ركب الرشاشات و نقيس نشوف الفرق
المهم ركب الرشاشات بتاعة ال BMW M40 اللي في الصورة دول :
[IMG]http://nileup.com/up/uploads/nilemotors_13707089776.jpg[/IMG]
بعديها الفني اصر انه يبص علي البوجيهات قولتله ياعم دي متغيره من 10 الاف بس هتلاقيها سليمة
فك بوجيه و كانت الصدمة !!!! البوجية خلصان تقريبا بدون اي مبالغة !!! لقيته بيقولي 10 الاف مين بس ياباشا ده ولا 40 الف !!! انا بصراحة اتصدمت من شكل البوجية و مبقتشي مصدق قولتله غير ياعم
عندكم طقم بوجيهات ؟ قالي عندنا قولت له غير
جاب طقم مكتوب عليه مصنع خصيصا لمحركات تويوتا نوعه NGK و ركبه و قولت له بص بقي علي فلتر البنزين بالمرة فكه لقاه مسدود قولتله غير هي جت عليه قالي عندنا نوع اسمة دريم و نوع تاني قولتله انا مش بركب غير الاصلي قالي معندناش قولتله ركب و هبقي اغيره في اقرب وقت
ركبنا كل حاجة و دورنا العربية و بنقيس العادم لقناه الحمد لله بقي 0.2 :guitarplay1: و كله تمام :plusone1:
في الاخر جاب سماعه و فضل يسمع الرشاشات !!! انا مفهمتش ايه ده فسألته قالي بشوف فيه تنفيس ولا لا
[IMG]http://nileup.com/up/uploads/nilemotors_13707089777.jpg[/IMG]
الحمد لله النتيجة كانت مرضية جدا و العربية سحبها اتحسن جدا بفضل الله و الاستهلاك قل
الاهم من ده كله ان ريحة حرق العادم اللي كانت مجنناني راااااااااااااااااااااااا ااااااااااااااااااحت :guitarplay1::guitarplay1::guitarplay1::guitarplay 1::guitarplay1:
اجمالي التكلفة:
رشاشات 250
تنضيف و كشف و تركيب 150
فلتر بنزين مضروب 45 (معرفشي ليه بصراحة بس اللي كان قدامي)
بوجيهات 45
و بجد مركز الصفا ده مركز كويس جدا من تجربتي معاه خصوصا ان الاجهزة اللي عنده دي بتساعده جدا
ده غير صاحب المركز اللي عارف يشغل الناس اللي معاه و يعلمهم اصول الشغل الصح
اتمني اني اكون افدتكم و انا تحت امركم في اي حاجة