العمل بـ التوقيت الشتوى 29 أغسطس 2008

**hazem_khidr** · 25-08-2008 07:35 PM

كل سنه و انت طيب يا استاذ اسامه
التوقيت الاصلي هو التوقيت الشتوي
اللي بيبقي فيه الضهر الساعه 12 يعني في نص اليوم بالضبط
فكره التوقيت الصيفي لتوفير الطاقه فعلا
لكن فعلا كمان من 3 ال 6 سنين مش حيعرفوا يعملوه لانه حيبقي غير مفيد.
مش كل شهرين نغير الساعه

**Bossy_Fadl** · 25-08-2008 07:56 PM

المشاركة الأصلية كتبت بواسطة haima

انا بدأت اشك ان فيه غرض فى نفس يعقوب , بس مش عارف ايه هوه

ما ده اللي انا عاوزة اقوله من الصبح

**passat** · 25-08-2008 08:04 PM

المشاركة الأصلية كتبت بواسطة bosyfadl

ما ده اللي انا عاوزة اقوله من الصبح

حد يوضح طيب :smile:

**Karim_Monir** · 25-08-2008 10:06 PM

المشاركة الأصلية كتبت بواسطة abdelaziz-waleed

هو المفروض ان مافيش حاجة اسمها توقيت صيفي وشتوي
لما نأخر الساعة هانرجع للتوقيت الطبيعي

موضوع التوقيت ده بيتعمل في الصيف بس الهدف منه حاجتين
اولا : بدل ما الشمس تغرب الساعة 7 مساءاً تغرب الساعة 8 يبقى كدة وفرنا في استهلاك الكهرباء ساعة بحالها يوميا. طبعاً هاتقوللي طي ما الشمس هاتطلع متأخر ساعة. حضرتك الساعة دية بتكون الناس كلها نايمة (من 5 - 6 صباحا) والنظام ده متبع في دول كتير منها فرنسا واسمه Day Light Saving

ثانيا : بدل ما الناس اروح اشغالها والشمس تكون طالعة بقالها ساعتين والجو ولعة. هاتكون الشمس طالعة بقالها ساعة واحدة بس. والنظام ده في مصر واسمه اديها مية تديك طراوة :drool5::drool5:

فالما الحكومة بتقدم ميعاد تغيير التوقيت فهي بتضحي بتوفير الكهرباء في سبيل راحة المواطنين

. حرام عليكو تظلمو الحكومة يا متوحشين

في حاجة تانية ممكن تتعمل معمولة في قطر وكان بيحكي عنها اسلام شاهين
ان فترات العمل في جميع الوزارات والهيئات الحكومية من 6 الى 1 ظهرا
لتقليل استهلاك المكيفات الى الحد الادني
لان المكيفات اللي هاتشتغل بعد كدة على حساب المواطنين مش الدولة
قطر الدولة الغنية بتعمل كدة
حاجة كمان اعرفها وهنا في مصر
صاحب احدى الشركات الكبرى الخاصة
اي موظف يقعد يخلص شغلى بعد ساعات العمل الرسمية يقعد من غير تكييف وباقل استهلاك للكهرباء
وبكدة بيجبر الموظفين على اداء وظايفهم في الوقت الفعلي
ده الى جانب انه بالفعل مش بيديهم بدل وقت اضافي
ناس بتفكر صح

**M_HaFeZ** · 26-08-2008 08:23 PM

المشاركة الأصلية كتبت بواسطة دموع الثلج

انا مش فاهمه حاجه والله

يعنى ساعات النهار هتبقى اطول ولا ساعات الليل

الساعه هتتأخر
يعنى المغرب بدل 7 وتلت هيكون 6 وتلت
يبقى هيزيد ولا ينقص ؟؟؟؟

**جمال** · 27-08-2008 12:51 AM

المشاركة الأصلية كتبت بواسطة دموع الثلج

انا مش فاهمه حاجه والله

يعنى ساعات النهار هتبقى اطول ولا ساعات الليل

لن تتأثر ساعات النهار و الليل عدد الساعات هو هو, اللى بيتأثر ساعة بداية الليل وساعة بداية النهار
يعنى اللى بيتغير هو علاقة الساعة بموقع الشمس فى السماء
واساسا مواقيت الصلاة
مش عارف قدرت اشرحها و لا لأ

**OlaOsman** · 28-08-2008 07:29 PM

ما تنسوش الليلة دي يا جماعة تأخروا الساعة ساعة :)

**TaoTao** · 29-08-2008 11:38 PM

الله يسامحهم !! يعني كدة ننزل أشغالنا في عز الشمس واحنا صايمين ..
ال "إن" اللي في الموضوع إن التوقيت الصيفي معناه إن الليل يبدأ الساعة 7:30 مساءً، وده رمضان يعني الإعلانات فيه بالثانية، ولا يمكن يسيبوا ساعة بحالها تفوت من الليل، يبقى ينهوا العمل بالتوقيت الصيفي والليل يبدأ من 6:30 والإعلانات تشتغل، ومش مهم الناس تصحى تروح أشغالها في الضحى الحار بدلاً من الصباح المعتدل نسبياً.

بالمناسبة كنت قد أثرت هذا الموضوع في بداية العمل بالتوقيت الصيفي في الرابط التالي:
http://www.nilemotors.net/Nile/showthread.php?t=20336
وبه العديد من آراء الزملاء القيمة