الموضوع: إسكورت 1600 مميزه للبيع بالأسكندريه

أولا تحيه كبيره لجميع هواة الفورد
ثانيا حابب اعرف جميع راغبي إقتناء فورد إني ببيع عربيتي لأني هغير إن شاء الله وبردو هجيب فورد
عربيتي فورد إسكورت 1600cc زيتيك كامله مانيوال
عشان ما حدش يقول ما قلتلوش المواصفات
العربيه مواصفات أوروبي وصناعه ألماني والعربيه الشكل بتاعها إستيشن مش شنطه بصراحه أول ما شفتها إستغربت بس بجد لاقيتها عمليه جدا خصوصا في السفر والعائله ولكل واحد شغله بيتتطلب منه مساحات للتخزين

بالنسبه لقطع غيارها بردو دي حاجه قلقتني بس بعد ما توكلت على الله وإشتريتها لاقيت إن عفشة النص الخلفي بالكامل هي هيا حاجة المونديو يعني الدونجل والطنابير والتيل الخلفي هما بتوع المونديو بالظبط فيما عدا المساعد الخلفي كنت مش عارف الاقيه لحد ما ربنا أكرمني ولاقيت ميكانيكي صحبي قديم بعد ما فكناه وبقيت ادور عليه طلع يركب عليها بتاع اللادا طبعا ما كنتش متوقع انه الأداء يبقى كويس بس بعد ما ركب وبعد تجربة سنه بالعربيه مش حاسس انها محتاجه حاجه وانا من النوع اللي بيجري ودايم السفر بصراحه المساعدين ميه ميه وكانهم بتوعها

العربيه بالكامل فبريقه دواخل ومعظم الخوارج بجد مترشتش والمعاينه هتثبت الكلام ده

بردو في حاجه كمان في واحد ميكانيكي فورد وخساره فيه كلمة ميكانيكي أصلا أول ما جبت العربيه بقيت اصلحا واظبطها عنده وانا كنت نشرت قصه عن الموضوع بتاعه قبل كده مش هعيدها المهم يعني خلى الموتور قفش
وتم تغير الموتور بالكامل مع الجيربوكس من عند إسلام فورد في الحرفين الكلام ده كان بعد ما جيبت العربيه بشهرين وانا دلوقتي كملت بيها سنه والموتور ماشاء الله على غيار الزيت والبنزين ومش محتاج اي حاجه تانيه والورق بتاع الموتور الجديد معايا بردو

في حاجه كمان غيرتها في العربيه وهيا الإسكتره هيا باور طبعا وجيبتها إستعمال من إبراهيم السكري في صلاح الدين وماشاء الله من يوم ما ركبتها هيا وطقم البضات مازودلهاش زيت من يوميها وشغاله زي الفل

العربيه فرشها الاصلي فيها وفرش السقف القماشه بتاعته عايزه تتغير وانا كنت ناوي اغيرها لو كانت العربيه هتعد معايا بس بعد ما شفت المونديو كسلت بصراحه

الكاوتش بحالة 70% فردة الإستبن بس هيا اللي ممسوحه

العربيه بحطلها بنزين 90 وعن تجربه ال92 بيخليها تطير وبيتحرق بسرعه
معدل إستهلاك البنزين فيها لل90 حوالي 180/200 كيلو في الصفيحه مشاوير داخل البلد وعلى الطرق السريعه

التكيف هوا الحاجه الوحيده اللي مش شغاله حاليا لاني من يوم ما ركبت الموتور الجديد وفضو الفريون محبتش اشحنه لحد ما اتاكد من اداء الموتور الجديد وكنا في الشتا ومكنش له لزمه التكيف بس قبل ما اغير المتور كان شغال زي الفل
العربيه بها 2 إيرباج في الدركسيون والطابلوه
العربيه لونها كحلي ميتاليك
الكاسيت الأصلي بتاع العربيه مكنش معاها وانا بشتريها وموجود كاسيت كينوود سيديهات متركب فيها وشغال
العربيه يا جماعه ملفها ورخصتها من مرور القوات المسلحه في القاهره طبعا للي ما يعرفش الحكايه بتتطلب يوم واحد بس بعد فحص العربيه عشان ترخصها تروح بالورق هناك يطابقو البصمات وترجع تستلم تصريح ثلاث شهور لحد ما الملف يجي من القاهره للمرور اللي انت تابع ليه وبعدها تروح تسلم التصريح وتستلم الرخصه

أخر حاجه لازم تعرفوها هوا السعر (أنا ما بحبش أقول لاعلى سعر) بحس انها كلمه فيها نية الطمع
أنا إن شاء الله هبيعها ب 30000 جنيه
على فكره الرخصه لسه ما نقلتهاش بإسمي ومعايا توكيل مفتوح
أظن كل الناس فاهمه كويس إن العربيات القديمه دي كلها ضريبتها وتسجيلها كلام فارغ
وما عليهاش أي مخالفات لاني شفت تقرير المخالفات بتاعها من على نيابة المرور من بوابة الحكومه الإلكترونيه عليها مخالفه 20 جنيه وقوف في الممنوع بإسم المالك القديم

والله يا جماعه لولا ان المونديو دي حلوه وكانت أصلا نيتي من زمان اجيبها انا ما كنتش فرطت في العربيه دي
عموما ربنا يبارك للي هيشتري ويباركلي في اللي هشتريها ويكفينا جميعا شر الطريق
ربنا يقدرني وأكون قلت كل حاجه ممكن الشاري يكون مهتم بيها وربنا يديلو خيرها ويكفيه شرها

اه فاضل حاجه تليفوني
01111722240
01000728870
انا ساكن في العجمي وشغلي في الأزاريطه على الترام وباليل موجود في شارع 45 بس مش ديما
بالتوفيق

أحب أقول إن التكيف كمان بقى شغال ميه ميه
والعربيه رخصتها بإسمي خلاص
ولو في حد مهتم أنا تخت امره
تحياتي للجميع