عربية ب 80 الف تستحمل السفر

الاخوة الكرام جمعت مبلغ 80000 جنيه ومش هقدر ازود عليهم جنيه عايز اشترى سيارة جديدة او مستعملة تكون شياكة اسافر بيها من البحيرة الى سيوة مقر عملى مرة شهريا حوالى 700 كم ذهابا وزيهم ايابا واثناء الاجازة هعمل بيها مشاوير بين البحيرة والمحافظات الاخرى القريبة
فيه مسافة بين سيوة الى مقر الشركة التى اعمل بها عبارة عن مدق ترابى شبه معقول حوالى 15 كم برضه همشى عليه مرة واحدة شهريا
السؤال تنصحونى اجيب ايه؟ انا عايز حاجة مريحة فى السفر علشان اولادى واقتصادية فى استهلاك البنزين وقطع غيارها رخيصة
افيدونى افادكم الله وجزاكم الله خيرا

بعد التحية
انا شايف انك تخليك في الزيرو علشان السفر و الطريق
لازم يكون معاك سيارة جديدة انت مجربها و حافظها كويس و تكون محافظ عليها علشان السفر
انا انصحك فيرنا 1600
كانت معايا من 2007 الي 2013 و بسافر بيها كتير جدا و بصراحة عربية فعلا بتاعت شغل
مجرد راي ... شكرا

شوف بومة مستعملة تستحمل الطريق ده

أشكرك بس الفيرنا اعرف انها خفيفة وكمان واطية خالص
انت ايه رأيك فى اللانوس

سوزوكي فيتارا ... عربية 4x4 وعالية على الأرض وبتاعة الكلام ده ... وطبعا واسعة من جوة وتشيل معاك اللى انت عايزه

وممكن تجيب واحدة كويسة جدا وموديل عالي بالمبلغ ده

انا اؤيد الدكتور ايمن
وممكن بريلينس frv كروس زيرو هتعمل فى رنجك ده
او رينوا سانديرو استيب اواى بس هتعلى شوية ب96 زيرو

التيجو اعتقد هتبقى مناسبة ليك

على ما اعتقد ان التيجو صينى

اقتباس:

---

المشاركة الأصلية كتبت بواسطة elfiky81

أشكرك بس الفيرنا اعرف انها خفيفة وكمان واطية خالص
انت ايه رأيك فى اللانوس

---

الفيرنا كويسة جدا كسعر و مواصفات حوالي 78000 كاملة مانيوال 1600 سي سي
واطية شوية و خفيفة بس مقابل سعر جيد موتور ممتااااز تكيف تحفة و سعر قطع الغيار خارج التوكيل ببلاش و اعادة البيع
انا بيعت العربية بتعتي في خمسة دقائق و السعر اللي انا طلبة
اللانوس ماتورها 1500 سي سي واحد كامة 85 حصان
الفيرنا 1600 سي سي اثنين كامة و 108 حصان
احسبها صح
شكرا

رأي ياريس او كورولا ..

اشكركم جميعا لكنى مازلت محتار
ربنا يجزيكم عنى خير

80 الف مش حتجيبلك عربية زيرو كويسة تستحمل السفر

اقترح عليك سكودا اكتافيا 2006 _ 2007

فيرنا جديدة وبلاش مستعمل

سوزكي فيتارا مستعمل بس حالة
تيريوس 4x4 مستعمل نضيف برضة وانا شايف ان دي مناسبة اوي لطلبك و 1500 فموفرة برضوا

كورولا او بوما استعمال

مازدا 3
لانسر بومة
النترا

بص خليك في الزيرو الناس معندهاش ضمير وبتلعب في العددت كلها بيبان عليهم محترمين لكن للأسف الناس ضميرها مات... خليف في فرنا زيرو واعملها صيانة في التوكيل وخليك في الضمان وربنا يوفقك هي مشكلتها إنها خفيفة وواطية فعلا بس هي أحسن الحلول في الرانج ده علشان لو جبت حاجة مستعملة أكيد هتصرف عليها شوية علشان تظبطها و كده ... ولو بتقارن بين الفرنا و لانوس مفيش وجهة مقارنة بين الاتنين الفرنا أحسن في كل حاجة ...ربنا يوفقك

فيرنا زيرو ...... وتوكل على الله .

بسم الله الرحمن الرحيم
انشاء الله انصحك بعربية جديدة و انسب حاجة هي الفيرنا و ده علشان استهلاك البنزين و لو 80 و قطع غيار رخيصة و ابعد عن المستعمل نصيحة لوجه الله بس في الامان انا سمعت انها ورق بمعنى الكلمة انما لو حضرتك بدور على سيارة مستعملة و لا يوجد غير هذا الخيار فيوجد لانسر و لو موديل حديث ممكن نيسان صني 2010 او 2011 انا معايا صني 2011 بسافر بيها على طول و سيارة اكثر من ممتازة بس عيبها بتاكل بنزين بعد 100 يعني لو عاوز توفر معاك خليك تحت 100 كم/س بتبقى حنينة جدا و ربنا معاك

مع احترامي لرأي الناس .. فيرنا ايه و كوري ايه اللي يستحمل سفر !!

بص يا باشا عن تجربة يعني ومن الاخر وحش السفر و الطرق الصعبة jeep
كانت معايا و بروح بيها صحرا و شغل في وادي النطرون ومفيش عربيه تسد في الطرق دي غيرها
ممكن ب 70 الف تجيب شيروكي موديل 2000 6 سلندر اوتوماتيك حاله نضيفه .. واللون الاسود و السيلفر فيها شياكه جداا
وعلي فكرة استهلاكها في البنزين عادي يعني مش فظيعه ولا حاجه

والله العظيم حيرتوا الراجل معاكم
فيرنا ولا بومه ولا فيتارا وكرولا ولا مازدا3 ولا جيب
ارسولكم على حل علشان الراجل يستقر على حاجه
وانا مليش رأى لانى معنديش خبره فى موضوع السفر الطويل الشهرى
وشكرا للجميع

لانوس زيرو اجدع

شروكى ايه بس حضرتك دا يا جماعة بيقول 1400 كل شهر يعنى لو جاب شاهين هتسد معاه خليك فى الزيرو

نصيحة " ابعد عن المستعمل خالص " ممكن تشوف الايمجراند عربية جميلة جدا و بدأت تنتشر

انا لو من حضرتك..فيرنا بدون تفكير
المستعمل مقالبه كتير..والمقالب فى السفر بتبقه مؤذيه جدا
والفيرنا موجوده تاكسيات عشان موتورها قوى وعربيه حماله اسيه
انت بس متسخنش اوى فى الجرى لانها جراية ومش ثابته

النترا 2007-2008- 2009 عربية ناعمة و موفرة جدا في البنزين و هاديةجداا على الطريق هتستحمل معاك اللف الكتير و عفشتها قوية جداا

طبعا مش هتلاقي غير مستعمل

خلاصة الكلام : لو زيرو هات الفيرنا وده أفضل فى رأيى من المستعمل..وفى المستعمل لانسر بومة او النترا hd بس تكشف على العربية كويس جدا فى مركز خدمة معتمد او التوكيل

لا انا كده ازعل محدش جاب سيرة اللوجان يعني :d

هو انا برشحها بس للاسف بقى سعرها اكبر من المبلغ اللى انت محدده منهم لله بقى

اقتباس:

---

المشاركة الأصلية كتبت بواسطة adelghanem

والله العظيم حيرتوا الراجل معاكم
فيرنا ولا بومه ولا فيتارا وكرولا ولا مازدا3 ولا جيب
ارسولكم على حل علشان الراجل يستقر على حاجه
وانا مليش رأى لانى معنديش خبره فى موضوع السفر الطويل الشهرى
وشكرا للجميع

---

بجد انت صدقت انا بقت دماغى سلطة خضار حمضانة

ياشباب انا قررت اجيب فيرنا كاملة زجاج فامية مانيوال ايه رأيكم
وتنصحونى اعمل ايه معاها لأفضل آداء

ربنا يوفقك استخدم زيت تخليقي في الاول طبعا عشان تحافظ علي الموتور وطبعا خد بالك ان العربيه بتلين يعني متقرصش عليها

بس احسنلك الالنترا الشكل القديم اوسع واحلي بكتير الفيرنا ضيقه اوي