تنمية مهارات الاطفال

**khaled_sabry** · 10-06-2013 02:28 PM

ابنى الكبير عنده 4 سنوات و نصف - و هو متأخر فى النطق
هو مافيهوش مشكله يعنى بيسمع و بيفهم كويس اوى و شقى و بيتكلم لكن عنده حروف كتير مش مظبوطه
هو كان فى Kg1 و رايح Kg2

بوديه لاخصائى تخاطب بقالى سنه - المهم انا ملاحظ ان الاخصائى ده مش بيركز على الكلام فقط و انه بيحاول يقوم السلوك
فقالى ان مهاب عنده مشكله انه مش بيركز فى العلاقات و الترابط بين الاشياء
يعنى مثلا رسمله بطه و جنبها بط صغير - و منتظر ان ابنى يقوله ان دى البطه و اللى حوليها اولادها

لما فكرت فى كلامه - قولت ماهو الواد معذور برضه
هو حيفهم منين مفهوم الترابط الاسرى و الترابط بين الاشياء و تكوين السيناريوهات المنطقيه المختلفه !
يعنى هو عارف انى انا والده و امه و اخته - لكن حيفهم منين ان نفس المفهوم ده مطبق برضه على الحيوانات و مش مطبق على الجمادات مثلا !!
فحاليا "للاسف" كل المعلومات اللى بياخدها من قناة الاطفال "طيور الجنه" بيبى (اللى اخته الصغيره مصره عليها 24 ساعه) و اللى مش بتعرض غير 6 او 7 اغانى و خلاص

طيب الجيل بتاعى انا كان بياخد معلوماته ازاى - فتذكرت ان كان فيه قصص للاطفال كنا بنسمعها و احنا صغيرين (سواء من جدودنا او من برامج التلفزيون زى بابا ماجد و ماما ساميه ... الخ) و القصص دى فعلا كانت بتغرس بعض القيم و فى نفس الوقت بتعلم التسلسل المنطقى للامور

طبعا البرامج اللى من النوعيه دى انقرضت دلوقتى و برامج الاطفال حاليا بقيت برامج سخيفه و منفره حتى بالنسبه للاطفال الصغيرين
فهل تعرفو موقع يكون عليه حكايات مصوره - او يكون فيه فلاشات لقصص الاطفال المصوره دى
او اى وسيله تانيه لتنمية المهارات فى السن ده

سؤال تانى : بفكر احوله لمدرسة لغات (هو حاليا فى مدرسه خاصه عربى ) هل دى حتبقى خطوه كويسه بالنسباله (من حيث صعوبة النطق اللى عنده)

**prof2013** · 10-06-2013 05:06 PM

ياباشا طالما ابن حضرتك عقله سليم يبقى مفيش مشكله هو هيتعلم الكلام مع الوقت والاحتكاك بالناس في المدرسه وغيره انا الحروف كلها كانت بايظه عندي لحد سنه 5 ابتدائي وكانت عندي مشكله في الكلام تعالى شوفني دالوقتي المنشاوي في زمانه ههههههههههههه

**Ahmed A Rahman** · 10-06-2013 07:01 PM

لو فعلا عنده حاجه في ترابط الاشياء او العلاقات خليك مع اخصائي التخاطب

معروف ان الطفل من قبل دخول المدرسة لما بييجي يشوف حاجتين زي بعض مثلا بيقول ماما وبابا
ولما بيشوف حاجه صغيرة بيقول ماما وانا او بابا وانا

**I.ABUBAKR** · 12-06-2013 12:05 AM

اولا انا مش متتخصص

بس من خلال احتكاكي بحالات مماثله لابناء اصدقائي

رأيي ان المشكله بسبب البيت

انت بتقول كل معلوماته من خلال التليفزيون وقنوات الاطفال تقريبا كلها بتتكلم باللهجه الخليجيه

سيادتك عايز الولد ينطق كويس ازاي وهو في السن ده في مرحله تعلم الكلام وبيسمع لهجات مختلفه

اكيد الطفل هيواجه صعوبه في نطق الكلام بشكل سليم

ابعده عن التليفزيون شويه وحاول انت ومامته يكون في حوار وكلام كتير بينكم وبينه

وبرده موضوع الربط بين الاشياء ده الطفل بيتعلمه من خلال الحوار او (الحكايات والقصص )

لو مفيش تحسن مع الدكتور الحالي حاول تجرب دكتور تاني

وبرده حاول متخليش بنتك امام التليفزيون كتير

**Ahmed_selmy** · 12-06-2013 09:25 AM

بص يا باشا ان من فترة كنت بسمع عن مراكز بتدى كورسات لتنميه مهارات الاطفال من سن 4 الى 14 سنه
Gama Academy | جــاما أكاديمى

**khaled_sabry** · 12-06-2013 09:26 AM

المشاركة الأصلية كتبت بواسطة i.abubakr

ابعده عن التليفزيون شويه وحاول انت ومامته يكون في حوار وكلام كتير بينكم وبينه

وبرده موضوع الربط بين الاشياء ده الطفل بيتعلمه من خلال الحوار او (الحكايات والقصص )

انا بحاول اتكلم معاه قدر المستطاع - بس المشكله انى برجع البيت على الساعه 6 او 7 و هما بينامو من الساعه 9 فمش بنقضى وقت كتير مع بعض
و مشكلتى فى الحكايات و القصص (على الرغم انى اقدر اسرد له القصه فى اسلوب شيق ) الا انى ماعرفشى قصص احكيهاله - فانا نسيت قصص الطفوله كلها و مش فاكر منها غير عناوين بس :)

بصراحه بفكر اشتريله بلاى استاشن - على اساس تبقى حاجه تشغله عن التلفزيون و تعلى فيه التركيز

**I.ABUBAKR** · 14-06-2013 01:54 PM

المشاركة الأصلية كتبت بواسطة khaled_sabry

انا بحاول اتكلم معاه قدر المستطاع - بس المشكله انى برجع البيت على الساعه 6 او 7 و هما بينامو من الساعه 9 فمش بنقضى وقت كتير مع بعض
و مشكلتى فى الحكايات و القصص (على الرغم انى اقدر اسرد له القصه فى اسلوب شيق ) الا انى ماعرفشى قصص احكيهاله - فانا نسيت قصص الطفوله كلها و مش فاكر منها غير عناوين بس :)

بصراحه بفكر اشتريله بلاى استاشن - على اساس تبقى حاجه تشغله عن التلفزيون و تعلى فيه التركيز

سيدي الفاضل اشتري القصص واقرأها وبعدين احكيها باسلوبك

كلنا تقريبا بنرجع البيت متاخر ولو هتتكلم معاعهم ساعه او ساعتين كويس قوي عليك وباقي اليوم مع مامتهم

لو عايز حاجه تفيده وتنمي مهاراته ابعد دلوقتي عن اللعاب الكمبيوتر وخلافه

اشتريله العاب زي البازل والمكعبات هتبقي افيد بكتير في السن ده وموجود منها من سن سنتين الي 10 سنين

ومعلش هقولك تاني التليفزيون ساعه او ساعتين في اليوم بالكتير وحاول تشغل الاطفال بحاجه تانيه