ماذا يفعل الشاب المحترم في الصراع المحتدم
السلام عليكم
تحذير
هذا الموضوع لن يفهمه الا المحترمون فقط اما الي واخدها عافية ومترباش تربية سوية او دخلت دماغه مفاهيم الغابة الي الافلام والاعلام والمسلسلات زرعتها فيه ولغت جواه حسن الخلق والدين او حتى الاحترام الفطري الي بحسس الانسان انه بني ادم فمش هيفهمه وهيحس انه موضوع تافة .
من كام يوم شوفت تاكسي خيش في عربية لانسر وجرح الاكصدام الامامي جامد من الجنب الشمال على مدخل بينزينة وطبعا التاكسي هو الغلطان 100 في ال 100 لان اللانسر كانت واقفة والتاني داخل وخلاص فجرحله العربية المهم الناس كلها قالت لبتاع التاكسي اقف يا عم بوظت عربية الراجل ، فرجع شوية علشان يظبط التاكسي ويدخل تاني وعادي جدا ! المهم نزل من العربية اللانسر شاب شكله محترم وطبعا انا عارف احساسه وهو عايز يعبر عن غضبه او ياخد حقة لكن ازاي ؟
وبعد ما نزل سواق التاكسي بيقوله اييييه اانت لسه هتقف ! راح الشاب اتعصب وقاله انت كمان بتسأل مش لما اشوف عملت ايه في العربية ؟
التاكسي قاله بسيطة
الشاب بسيطة ايه يا عم انت بوظت الاكصدام وراح خابط باب التاكسي باديه بانفعال راح التاكسي قاله يا عم بتتعافى على العربية ليه وقولنا معلش وراح سايبه ودخل البنزينة وعادي جداااااااا .
للاسف دا صراع شبة يومي بيحصل وهو ان الناس المحترمة لما بتخرج من دائرتها الديقة بتاع المدرسة والجامعة او حتى لو مش متعلم خالص لكن محترم وبيصتدم بالمجتمع والي كل الي نعرفه عنه من الافلام والمسلسلات انه مجتمع غاااابة والقوي ياكل الضعيف و مش عارف ايه من المفاهيم الي مقصود تتزرع فينا علشان مجتمعنا يوصل للي وصله
فاي حد محترم في المواقف دي بيفصل تماما ومش بيبقى عارف يتصرف او ياخد حقه خصوصا ان المواقف دي بتبقى لحظية يعني على ما يطلع موبايل ويتصل ومش عارف ايه تكون الدنيا خلاص وطبعا اهم حاجة مش عايز يقل من قيمته خصوصا لو المشكلة مع سواق عربجي من المالين الدنيا . ومحدش يقولي انفلات امني لان المشكلة دي من اواخر التمانينات على عكس كل البلاد المحترمة .
فحبيت اعرض المشكلة يمكن نلاقي حل .
وشكرا