متى تقوم مصر بتصنيع سيارة من الألف الى الياء؟؟؟ دون الأعتماد على اى منتج اجنبي ؟؟؟
ارجو من السادة الأعضاء الرد على هذا السؤال... من وجهة نظر كل عضو..
وشكرا جزيلا
عرض للطباعة
متى تقوم مصر بتصنيع سيارة من الألف الى الياء؟؟؟ دون الأعتماد على اى منتج اجنبي ؟؟؟
ارجو من السادة الأعضاء الرد على هذا السؤال... من وجهة نظر كل عضو..
وشكرا جزيلا
فى المشمش.
بتهيألي صعب قبل على الاقل من 25 سنه اذا كانت مصر فاشله ان هيا تجمع عربيه من غير عيوب يبقى هتقدر تصنع
لن يحدث هذا بين يوم وليلة
كما انه لا يحدث حاليا فى أيه دولة فى العالم
السؤال الأكثر واقعية هو( متى تمتلك مصر علامة تجارية للسيارات تنتج تصميمات خاصة بها تصلح للمنافسة داخل وخارج مصر)
ولتحقيق ذلك فإن السيناريو المقترح معروف ولا يوجد فيه اى نوع من انواع السحر ولا الشعوذة وكل دول العالم طبقته
1- اول خطوة فيه ان يقوم احد منتجى السيارات بشراء تصميم قديم ذو شعبية فى مصر وليكن مثلا الشاهين او اللانوس
2- يبدأ تجميع هذا التصميم فى مصر مع تعديلات طفيفة جدا عن التصميم الأصلى(شكل اكصدام او فانوس وشبكة امامية مختلف وربما إضافة سوكة الى الكبوت مثلا) واستعمال مكونات مصرية قدر الإمكان، ولمدة حوالى خمسة سنوات(ربما اقرب مثال لأذهاننا لهذة القصة هو البروتون ويرا)
3- فى خلال هذة السنوات الخمسة يتم عمل شكل خارجى وصالون جديد للسيارة المجمعة محليا يختلف عن الشكل القديم ويواكب احدث الموضات، على ان يتم تركيب الشكل الخارجى الجديد على نفس شاسيه ومحرك ونظام جر السيارة القديمة، ويمكن الإستعانة بخبرات بيوت تصميم السيارت فى هذا الصدد ، ويطرح الشكل الجديد(الأمثلة فى هذا لا تعد ولا تحصى ومنها سيارات دايو التى كانت فى البداية نفس سيارات اوبل بنفس الشكل ثم تحولت الى اشكل خاصة بها، وكذلك سيارات كيا التى كانت نسخة طبق الأصل من المازدا ثم صارت لها شخصيتها، ولو رجعنا الى تواريخ اقدم لرأينا الفيات 125 الىت تحولت الى بولينيز وال124 التى صارات لادا، وحديثا رأينا البيجو بارس الت كانت بيجو 405 ثم صارت شكلا خاصا بالشركة الإيرانية على شاسيه ومحرك ال405)
4- بعد طرح السيارة بشكلها الجديد والإستفادة بالخبرة التصميمية فى أنتاجها، يتم فى خلال السنوات الخمسة التالية وضع تصميم جديد يستفيد من مميزات التصميم القديم ،ويتلافى عيوبه ولا مانع بالطبع من استخدام بيوت الخبرة فى تنفيذ التصميم واختباره فهذا ليس عيبا مع اضفاء روح العصر على التصميم الجديد(مثال على هذا الكلام:بروتون جين 2) ويتم طرح التصميم الجديد الذى سيبصح فى هذة الحالة تصميما مصريا 100% حتى لو شاركت الشركات العالمية فى تنفيذة وحتى لو كانت 50% من مكوناته تأتى من خارج مصر، ففى النهاية يكون تصميما يحمل علامة تجارية مصرية ويتم تصنيعه بشكل نهائى فى مصر
هذا هو الاسلوب المنطقى فى انتاج سيارة محلية، اما ما عدا ذلك فل يخرج عن ان يكون احلام فى الهواء
لسة بدرى اوى يا ابو احمد احنا لغاية دلوقتى مش عارفين نقفل عربية كويس بقالنا اكتر من 8 سنين بنقفل عربيات و مش عرفين نقفلها كويس شوف انت بقى محتاجين كان سنة علشان نصنع عربية
والله يا جماعة انا مش شايف الموضوع مستحيل والدليل بلاد كتير زى ماليزيا اللي بتصنع بروتون ومش كده وبس دي كمان تمتلك شركة لوتس سيارة السباق الشهيرة وفي نفس الوقت اوبل هتموت وتشارك بروتون وماليزيا هى اللي مش موافقة عارفين ليه لأنهم بيعتبروا بروتون دي شركة وطنية وان بيع ولو جزء منها بيعتبر تفريط في قطعة من ارضها.
وعندنا كمان البرازيل اللي هارية العالم كله مواتير بدليل ان الشركات العالمية بتستخدم مواتيرها المصنعة في البرازيل مثال فولكس فاجن والبرازيل دي يا جماعة دولة نامية واحنا ما كناش هنسمع عنها لولا وجود بيليه ورونالينهو.
نيجي لينا احنا بقى دولة التاريخ والعراقة والفراعنة ولا لينا اى وجود عاملين زى اللي رقص على السلم لا مننا عملنا سيارة متفردة تعبر عن ثقافتنا ولا مننا سكتنا كام رجل اعمال واخدله ماركة ياباني ولا كوري ولا صيني وشغال تجميع وكل اللي يهمه تحقيق اكبر مكسب ولو على حساب المشتري اللي هو اساس مكسبه ولا واحد فيهم فكر انه يطور من نفسه ويعمل حاجه ليها معنى وليها وحدوية ويقولك نسبة التصنيع قال ايه 45% وانا متأكد انها ما تزيدش عن 10% في احسن الأحوال.
بس عموما وبدون احباط صدقوني يا جماعة الموضوع مش مستحيل الموضوع محتاج يتحول لخطة ومشروع قومي يقوم على اسس سليمة بعيد عن الكوسة والفساد وما حدش يقول واحنا في ايدينا ايه؟؟ لا يا جماعة احنا في ايدنا كتير احنا اللبنة الاساسية للمشروع كل مهندس او فني او مصمم يستطيع انه يكون الخلية الأولي لبناء هذا المشروع.
انتوا عارفين احنا محتاجين ايه ؟؟؟
هو ده السؤال !!!!!
محتاجين ان الموضوع ده يتحول لمشروع قومي كلنا نؤمن بيه وانه مش مستحيل وسبعاوي قاللنا على الخطة باختصار واعتقد انه جاب المفيد من تجارب الآخرين لكن ازاى التنفيذ؟؟؟؟؟
حد عارف احمد بهجت بدأ ازاى ؟؟؟ ده كان مهندس عادي جدا ومعيد في هندسة القاهرة دلوقت هواكبر مصنع اجهزة كهربية في الشرق الأوسط وده بمجهوده يا جماعة. ده كان معيد في هندسة القاهرة. بس حط قدامه هدف ونجح بنسبة كبيرة في تحقيقه. احنا محتاجين حد زيه كده.
فى حاجة سمعتها من وزير الصناعة فى برنامج تلفزيونى قال الاتى:
قدرة استيعاب السوق المحلى لا تشجع قيام مثل هذة الصناعة ، حاجة متعلقة بالـ Mass production
يعنى هو لازم ينتج كتير علشان يبيع بسعر منافس ، بس اقل كمية للانتاج تعتبر اكثر بكثير من احتياج السوق المحلى فابالتالى الشركة حتخسر من الاول.
واقع صناعة السيارات قد إنخفض من معدلات كانت تفوق 100 ألف وحدة سنوياُ ( سواء مستورد أو تم تجميعه داخل مصر ) إلى 42 ألف وحدة خلال العام الماضى وذلك بسبب إرتفاع الأسعار، وإرتفاع سعر الصرف، ونوعية الجمارك، وضرائب المبيعات مما أحدث إرتفاع ضخم جداً فى الاسعار أدى لانكماش الطلب، وهذه المعدلات الحالية منخفضة جداً لو تم مقارنتها بمعدلات الإنتاج بأى دولة أخرى فى مثل ظروف مصر.
منقول من ---http://www.mfti.gov.eg/reports/archive/newsweekly/issue29/pr10.htm
وقال ان الاولى الان التركيز على الصناعات المغذية لان ديه سوقها كبير جدا.، تقريبا 80 مليار سنويا
الكلام شكله منطقى..و لا ايه رأيكم
بس العربيات فعلا بتتصنع فى مصر من زمان ، ومن الألف الى الياء........
طبعا العربيات الكارو !!!
لاء طبعا الكلام مش منطقي ...
بصوا على حجم السيارات المستوردة وكمية السيارات الجديدة اللي كل يوم تنزل مصر على كل شكل ولون اللي صيني واللي هندي واللي ماليزي واللي ايراني كل دي دول تعاني من العدد المهول للسكان ومع ذلك نجحوا يكون عندهم صناعة منفرده ليها وزنها ومش كده وبس ده لو جيت لحاجة مثلا زى الاسبرانزا الصينية المنشأ تلاقي الناس مبسوطة بيها وبتدافع عنها ولا كأن الصين دي احدى محافظات مصر.
يا جماعة احنا عندنا حجم استهلاك عالي جدا بالمقارنة بالدول المجاورة والدليل حجم بيع الشهور الماضية من السيارات الصينية فتخيلوا بقى لو احنا صنعنا عربية ووقفنا وراها بنفس روح الاسبرانزاوية ايه هتكون النتيجة؟؟؟
يا جماعة انتو عارفين السودان وهى طبعا زى ما انتوا عارفين دولة تعاني من مصايب كتيرة تخيلوا السودان يا جماعة عندها مصنع سيارات اسمه جياد بيجمع سوناتا واكسنت وفيرنا ونقل تقيل وجرارات زراعية وبيحاولوا كل فترة يزودوا المكون المحلي.
احنا محتاجين مشروع قومي يا جماعة صدقوني....
توضيح لحضرتك احنا بقالنا اكتر من 40 سنه بنجمع عربيات من ايام شركه النصر لصناعه السيارات لما فتحت لحد انهاردهاقتباس:
لسة بدرى اوى يا ابو احمد احنا لغاية دلوقتى مش عارفين نقفل عربية كويس بقالنا اكتر من 8 سنين بنقفل عربيات و مش عرفين نقفلها كويس شوف انت بقى محتاجين كان سنة علشان نصنع عربية
فين احنا و فين السودان؟ خلاص السودان سبقتنا و اقتصادها اقوى من اقتصادنا و ده كلام الناس اللى شغاله هناكاقتباس:
يا جماعة انتو عارفين السودان وهى طبعا زى ما انتوا عارفين دولة تعاني من مصايب كتيرة تخيلوا السودان يا جماعة عندها مصنع سيارات اسمه جياد بيجمع سوناتا واكسنت وفيرنا ونقل تقيل وجرارات زراعية وبيحاولوا كل فترة يزودوا المكون المحلي.
المشكله عندنا فى مصر مش تصنيع سياره و خلاص
لما نصنع سياره جديده مين هيشتريها و فين ثقه العميل اللى هيثق فى التصنيع المصرى
مابالك لو واحد عايز عربيه جديده بيفضل العربيه بتاعه بلدها عن نفس العربيه اللى متقفله فى مصر ( ده مجرد تقفيل و فعلآ بيبقى فيه عيوب هنا )
المشكله استيعاب السوق للسيارات
احنا عندنا عربيات عدى عمرها الأفتراضى بسبين كتير قوى و برضه بتمشى
ممكن اول خطوه يوقفوا تراخيص السيارات اللى عمرها اكتر من 20 سنه مثلآ و هتلاقى اكتر من 30% من العربيات اللى بتجرى فى مصر وقفت و اصحابهم ابتدوا يشتروا عربيات جديده
كده هتزيد استيعاب السوق للعربيات و هيزيد الطلب على جميع انواع السيارات و بالتالى هتقل أسعارها كتير
بس المشكله هنا هتروح فين العربيات اللى هتقف دى و اصحابها هيعملوا ايه
مشكله جوه مشكله و مش هتخلص غير لما يكون فيه قرار ذكى
و لما يحصل كده هيا حضرتك فاكرها بالسهوله دي ان الناس اللي راكبين عربيات حيستسلمو و يروحو يرمو عربياتهم و يشترو عربيات جديده؟؟الموضوع مش بالبساطه دي خالص طبعا.تقدر تقولي كام واحد في مصر عنده القدره النفسيه مش الماديه انه يرمي عربيه شاريها بالفلوس او حتي جياله هديه و يروح بمنتي البساطه يجيب عربيه جديده؟؟!..اقتباس:
ممكن اول خطوه يوقفوا تراخيص السيارات اللى عمرها اكتر من 20 سنه مثلآ و هتلاقى اكتر من 30% من العربيات اللى بتجرى فى مصر وقفت و اصحابهم ابتدوا يشتروا عربيات جديده
الحل ان العربيات دي تتباع في دول لسه مبتدئه في السيارات زي الدول الافريقيه الفقيره و الحكومه تدي قروض ميسره من غير فوايد و بكده الناس تقدر تعمل عمليه احلال
كلامك مظبوط و انا قولت فى اخر كلامى ان دى مشكله جوه مشكله و لازم قرار ذكىاقتباس:
لما يحصل كده هيا حضرتك فاكرها بالسهوله دي ان الناس اللي راكبين عربيات حيستسلمو و يروحو يرمو عربياتهم و يشترو عربيات جديده؟؟الموضوع مش بالبساطه دي خالص طبعا.تقدر تقولي كام واحد في مصر عنده القدره النفسيه مش الماديه انه يرمي عربيه شاريها بالفلوس او حتي جياله هديه و يروح بمنتي البساطه يجيب عربيه جديده؟؟!..
الحل ان العربيات دي تتباع في دول لسه مبتدئه في السيارات زي الدول الافريقيه الفقيره و الحكومه تدي قروض ميسره من غير فوايد و بكده الناس تقدر تعمل عمليه احلال
و على ما أتذكر مره كده من كام سنه قالوا على موضوع العمر الأفتراضى للسيارات بس ماطبقوش حاجه
و لو طبقوه مش هيبقى بين يوم و ليله و يقولوا امسكوا العربيات القديمه
طبعآ لأ هيبقى فيه فتره لمالكى السيارات لأستبدال السياره او زى ماحضرتك قولت و طبعآ هتبقى فتره طويله
بس اعتقد هو ده اللى هينعش السوق المصرى للسيارات
حاجه تكسف عددنا اكتر من 70 مليون و المبيعات السنويه اقل من 100 الف سياره فى السنه
ايران تقريبآ نفس العدد لكن مبيعاتهم السنويه تعدينا بمراحل
و ماعتدقش انهم عاملين عمر افتراضى للعربيات
كل الكلام ده حلو بس وقت التنفيذ هو الي صعب....و اللي اصعب من ده كله هي نفسيه الانسان المصري
ليه؟؟؟؟؟؟؟؟ كل همه اكبر مكسب ممكن يحققه في اي نوع من المجالات في تجميع السيارات ولا في المقاولات ولا اي مجال ....
يعني حد يقدر يقولي عربيه محنطه ذي ال 128 بتتباع بي 38 الف ليـــــــــــــــــــــــ ـــه
فيها ايه ديه الي يخليني ادفع فيها الفلوس دي كلها ....فالعيب في التسعير الاستغلالي و استغلال الشعب الغلبان اللي بالنسبه ليه ان عربيه بتمشي وخلاص تبقي تمام اوي كده...
يعني الشعب برضوا هو اللي بيساعد الناس ديه علي الاستغلال لأنه بيتيح ليهم الفرصه انهم يستغلنا اكتر ثم اكتر
يعني لو الناس عملت اضراب فتره علي الاسعار ...هيموتوا ؟؟؟؟ولا هيجرلهم حاجه ؟؟؟
دي اسمها سلبيــــــــــــــــه .....محدش يقول الحكومه هي اللي بايظه
مهي الحكومه برضوا بنأدمين من الشعب ...و شايفين ان الناس مش بتفتح بقها و عماله تقول كمان...
هتيجوا طبعا تقولوا اي اللي جاب تصنيع السيارات بالاستغلال و التسعير
لأ فيه صله بنهم ....لأن لو مثلا حصل و فكروا يصنعوا عربيات في مصر ...اراهن انهم ما هيفلحوا
لأن اكيد اي دوله بتبدء تصنع عربيات هيكون فيها عيوب و مش هيكون موثوق فيها غير مثلا بالكتير 70%
يعني المفروض انها تجريبيه و تنزل بسعر رخيص ....علشان الشعب يستحملها علي الاقل يقول بس سعرها رخيص و بكره تظبط المشاكل اللي فيها....
ذي مثلا الاسبرانزا واللي انا شايفها اصلا غاليه لأنها تعتبر تجريبيه....يعني ممكن حد يقولي سعر العربيه ديه في بلدها بكام؟؟؟؟ هتلاقيها بثمن مرتب شهر...
مش هنا بمرتب سنه علس الاقل....
يعني حد يقولي كده لو بدئنا و صنعنا عربيه هيسعروها بكام؟؟؟؟
ال 128 اللي هي اصلا من موديل حاجه و سبعين و بتتباع بي 38 الف ..يبقي اللي هتزل بقي تصنيع مصري موديل 2008 هيخلوها بكام ...مش اقل من 45 الف واللي هي عربيه تجريبيه....حد بقي هيستحمل مشاكلها و لا حد اصلا هيفكر يجبها ولا هيفكر يطورها...اكيد هيقول خساره ادفع فيها الفلوس دي كلها و اجري اصلح فيها كل شويه...
من الاخر فكره تصنيع عربيه مصريه فكره مستحيله في الوقت الحالي لأنهم ولا هيعرف يصنعوها لأن كل فكرهم ازاي اجيب فلوس اكتر...مش ازاي اصنع حاجه كويسه...ولو اتباعت حتي بسعر عالي في الاول و المشاكل بداءت تظهر محدش هيفكر يشتريها بعد كده و كل اللي اشتروها هيبيعوها....
ذي اللي بيحصل مع مركات صينيه محدش عارف فيها حاجه ولا فهمين هو العيب فين...ده حتي يوم ما بيكون في مشكله و مش عارفين لها حل علي الاقل الناس بتحاول تكلم الشركه الام و تقولهم علي المشكله...اما هنا بقي هتقول لمين بقي...محدش هينفعك ولا هيقف جنبك ولا يعبرك اصلا....
اؤيد وبشدة فكرةالاخ سبعاوى فهى فكرة محترمة واتمنى ان يتبناها اى من الافاضل اصحاب التوكيلات المستوردة للسيارات او المجمعة المهم ان نبدأ ، ولكن لى ملحوظة ان اتمنى ان ننتبه لها فبعض الاخوة الاعضاء يتكلمون عن البلد وكأنهم ليسوا منها وليس اعضاء بالاسرة المصرية ، واتمنى ان يعلم الجميع ان مصر هى كل فرد منا سواء كان صالحاً او طالحاً فالفشل سوف ينسب لنا جميعاً والنجاح لنا ايضاً واتمنى على الجميع التفاؤل بمصر