صيانة 80 ألف اوكتافيا a4 .. تفاصيل ممله
السلام عليكم
تم بحمد الله عمل صيانة 80 ألف كيلو للعربيه .. اوكتافيا A4 2006 والتفاصيل كالأتى
انطلقت من بنى سويف الساعه 8 الصبح والعربيه عماله تصفر وتقولى Service now .. وصلت مدينة نصر الساعه 9:30 بالظبط عند المعهد المصرفى وقعدت لحد الساعه 2 هناك :whtauwant: .. بعدين انطلقت على محمد سمير والطريق كان زى الفل ووصلت الحمد لله
الاستقبال كان كويس .. وتم الكشف على العربيه وقالى على الطلبات وهى كالأتى:-
بوجيهات
فلتر هوا
فلتر بنزين
كوعة وش سلندر
خرطوم عمة هوا
طبق فتيس خلفى
كنت عايز انزل اجيبهم من الهاشميه بس استطولت المشوار وجيتهم من المحل اللى فوق وانا عارف ان انا هكع جامد فوق وده اللى حصل فعلا :angry35: :angry35: :angry35:
كوعة وش السلندر هتتغير عشان بتسرب مياه والهوا بتاع العربيه كنت حاسس انو مش مظبوط والعربيه مكتومه فقولت اغير خرطوم العمه عشان باين انو بايظ وطبق الفنيس ده محمد سمير كان قايلى عليه عشان العربيه كان فيها نتشه فى الغيار الأول والتانى بس جرب العربيه بعد ماجبت الحاجه وغير رأيو وقالى ان الطبق ده يتغير عشان الفتيس جايب زيت بس ملوش دعوه بالنتشه .. أنا بصيت على الفتيس لقيتو مس جايب زيت أوى يعنى فقولت اخليها دلوقتى ورجعتها ..
بدأ الشغل .. غير البوجيهات والفلاتر وكشف على السيور لقاها سليمه ودخل على كوعة وش السلندر وغيرها وبعدين الخرطوم
حط العربيه على الجهاز وكل حاجه تمام .. وظبط النتشه بتاعة الفتيس على الجهاز .. ازاى ؟! الله أعلم
رفع العربيه و كشف على العفشه وكانت الصدمه ,, قالى ان العربيه دى واخده مطب جامد .. فأفتكرت اللحظة الأليمه اللى أكلت فيها المطب على 140 .. وده مكنش مطب ده كان جسر :Copy of majd(4):
قالى هحتاج اغير بطاحات وجلب مقصات وكاوتشة ميزان وأكشف ع المساعدين .. وبعد التشاور مع محمد سمير اتفقنا نغير الحاجات دى على صيانة ال 100 ان شاء الله لو لينا عمر ..
ربط العفشه وشحمها وغسل الموتور وشحم الأقفال والأبواب وجربت العربيه والحمد لله مكنش ليا اى ملاحظة عليها والعربيه بقت خفيفه وسالكه والنتشه بتاعت الفتيس راحت :guitarplay1:
التكاليف كالأتى
فلتر هوا 100 جنيه
فلتر بنزين 100
بوجيهات 100 NGK
كوعة وش السلندر 225
خرطوم العمه 500 :afterboom:
طبق الفتيس 500 ورجعتو
غسيل موتور 35
اسبراى تنظيف رشاشات 20
سيليكون 30
مصنعيه 200
الأجمالى 1310 .. رحت على دار البنك الأهلى وبييت هناك والصبح انطلقت على الحرفيين . اشتريت فانوس خلفى عشان كان شكلو مترب كده واشاره شمال قدام عشان العدسه كانت واقعه جوه وروحت لواحد يصلحلى نور الصالون عشان الزرار كان واقع
الفانوس الخلفى DEPO .. جنيه200
الأشاره 50 جنيه
الزارا 20 جنيه
ملاحظاتى :-
1- حسيت ان محمد سمير مش بيفحص العربيه كويس ومتسرع أوى فى الحكم على العربيه وبيقول غير وخلاص .. فلازم اتكلم معاه فى كل حاجه الأول قبل ماغير
2- المحل اللى فوقيه غالى أوى ومفيش حتى كلمة فصال .. مرضاش ينزلى حتى 25 جنيه من 1025. :fdsa:
3- العربيه زى الفل دلوقتى ومفيهاش الهوا وان شاء الله على 100 ألف كيلو هاغير الحاجات بتاعة العفشه دى مع التيل الأمامى وهاغير طبق الفتيس ده وأزود الزيت وأكشف على الأتياش بتاعتو عشان الفتيس فيه بوش بس بسيط أوى لا يذكر .
4- طبعا انا كنت مغير زيت موتور من أسبوع :Oc_sun1[1]:
أى أسئله انا فى الخدمه
:bye::bye::bye:
