عطل فى السويفت اول مرة أشوفه فى أى عربية

**wlng76** · 25-08-2008 11:08 AM

صباح الخير لكل أصحاب السويفت, انا بأقول أول مره أشوف عطل بالشكل دا لإنى من 15 سنه وأنا دايما أحب أعرف كل حاجة عن العربية اللى بأركبها وكمان أعمل شويه اصلاحات بسيطة بنفسى. طبعا انا شارى العربية بقالى فترة مش كبيرة حوالى 5 شهور, وبأحاول اتعرف عليها, انا كنت ملاحظ ان العربية درجة الحرارة فيها عادية جدا وعداد الحرارة لا يتخطى النصف أبداً, وطبعا أغلب العربيات اللى ركبتها كانت كدة عداد الحرارة بعد ما يوصل للنصف بيفضل ثابت مكانه وطبعا دا مهم علشان حرارة تشغيل العربية, وطبعا عداد الحرارة دا مهم علشان لو فى أى مشكلة فى دورة التبريد على طول عداد الحرارة بيزيد بالتدريج لغاية ما يوصل لمرحلة الخطر, فمثلا لو مياه الريداتير لو ناقصة قوى العداد دا هيزيد قوى, المهم نرجع تانى لمسألة العيب أنا اتفاجئت وأنا ماشى بالعربية انها سخنه جدا لإن المياه كانت بتتسرب من خرطوم ريداتير مخروم وأنا مش واخد بالى, تخيلوا وعداد الحرارة زى ما هو بيشير للنصف برده, ازاى؟؟؟؟؟ مش عارف؟؟؟؟ طبعا الموضوع دا كلفنى كتير - جوان وش سلندر - والعربية حاسسها متغيره وصوتها زى العربيات الربع نقل !!
الموضوع دا جننى ورحت لميكانيكى قالى أنا ما بأشتغلش الا فى السويفت!! كلام جميل!!
شرحتله اللى حصل - قالى على فكرة السويفت كدة مش ممكن درجة الحرارة تزيد عن النصف ابدا حتى لو مفيش مياه !! كلام تخاريف !!
رحت لواحد كهربائى مشهور فى مدينة نصر !!! كشف على العداد وصباع الحرارة وقالى كله تمام !! كلام مش تمام
المهم أنا عملت لفة كدة على كام ميكانيكى وعلى كام كهربائى والرد ما اتغيرش ؟!؟!؟!؟!؟!
آخر ما زهقت رحت اشتريت صباع حرارة ب 20 جنيه يابانى, وركبته بنفسى !! قلت كفاية مصارف !! ؟؟ شغلت العربية وفصلت مروحة التبريد ؟؟ النتيجة الحقيقة كانت بالنسبه لى مفاجئة !!!
عداد الحرارة زاد عن النصف عادى جدا زى أى عربية حرارتها بتعلى لو فى مشكلة فى دورة التبريد !! يا خسارة 20 كانت هتوفر لى 500 جنيه !!

**AHMEDCAR** · 25-08-2008 11:11 AM

الحمد لله على كده و كويس انك ماسكتش على الموضوع ده ده دليل على انك عندك خبره كويسه فى مجال السيارات

**hazem_khidr** · 26-08-2008 07:50 AM

نفس الموضوع عندي في العربيه بالضبط
مؤشر الحراره دايما في النص
و كذا مره تسخن مني و الامبير زي ما هو
ما طلعش غير مرتين بس
مره و انا علي 6 اكتور و لحظه كده لقيته طلع و نزل تاني و انا اخدت بالي اول ما طلع!!!
المره التانيه من مده كان عندي مشكله في دوره التبريد و كنت بجرب التكييف لقيته الامبير بدأ يعلي و يوصل للمنطقه الحمرا
الغريب اني لما طفيت التكييف الامبير بدأ ينزل لوحده عادي جدا!!!!!!!
بصراحه مادورتش علي اي حل لاني عارف اني لو مشيت وراه حصرف كتير
و ممكن ما اوصلش لحاجه
بس يا ريت تقولي صابع الحراره دا بيركب فين لو كده اغيره.
و يا تري جربت تفصل المروحه مع صابع الحراره القديم و تشغل و تشوف الامبير حيطلع ولا لاء؟؟؟؟؟؟؟؟
...........................
بالنسبه للصوت اللي متغير عندك روح لميكانيكي كويس يضبط تاكيهات.

**Adham** · 26-08-2008 10:56 AM

ساعات بيبقى صباع الحرارة بايظ و بالتالي مش بيبين حرارة المياة الحقيقية

و أحياناً بيبقى فية هواء في دورة التبريد
و دة بيخللي برضة المؤشر مايبينش الحرارة الحقيقية
علشان بيبقى فية هواء متجمع عند ساعه الحرارة فابيخللي ساعه الحرارة مش لامسة المياة و قارية الحرارة بتاعتها بدقة

و إخراج الهواء من دورة التبريد مهم جدا لأنة بيسبب مشاكل في كفائة تبريد السيارة و مصداقية قراءة الحرارة

و دة بيبقى انك تدور العربية و غطاء الردياتير مفتوح (ماتكونش العربية سخنة لسة)
و تسخن العربية شوية لغاية ماترموستات الكوعه يفتح
وحاتحس بية من انك حاتلاقي المياة بتتقلب جوة الردياتير مش ساكنة زي اول ما دورتها

و بعدين تفتح مسمار إخراج الهوا (شبة اللكور بتاع الفرامل) اللي بيبقى في الكوعه الانتامونيا اللي فيها ثرموستات الكوعه (غالباً)
و تدوس بنزين شوية صغيرين حاتلاقي نافورة مياة و هواء صغيرة خارجة من المسمار دة
و تقفل المسمار تاني (هيه نص لفة تفتحة و نص لفة تانية الناحية التانية تقفلة- ماتلفوش كتير يعني)
و تزود مياة الردياتير و تكرر فتح المسامار و قفلة كذا مرة مع تزويد مياة الردياتير
لغاية ماتلاقي المياة خارجة صافية بدون اي فقاقيع هواء
اقفل الردياتير
و كل سنة و انت طيب

**hani_elashry** · 27-08-2008 01:57 PM

ليا زميل كان عنده نفس العيب ده وطلع الريداتير مسدود ممكن تكشف عليه للاطمأنان

**wlng76** · 15-09-2008 12:07 PM

شكرا لجميع من شاركوا فى الموضوع دا, آسف على التأخير
العيب اللى كان عندى هو ان صباع الحرارة لا يوضح القراءة الحقيقية للحرارة يعنى لو فصلت مروحت التبريد وشغلت العربية الحرارة تظهر على عداد الحرارة فى النصف ومش هتزيد عن كدة حتى لو المياه اللى فى الريداتير وصلت لدرجة الغليان.
بالنسبة لصباع الحرارة انا هاصوره وارفقة بالموضوع علشان اللى عايز يعرف مكانه وكمان أصور شكله, والنوع اللى أنا اشتريته كان يابانى ثمنه 20 جنيه, والأصلى ثمنه حوالى 60 جنيه.
على فكرة الصوت العالى اللى فى الموتور دا كان صوت أفيز الشكمان. أنا كنت شاكك فى الأفيز بس الميكانيكى بتاعى قالى انه كويس, وكمان رحت لواحد بتاع شكمانات قالى الصوت مالوش علاقة بالشكمان, بس لما رحت لميكانيكى تانى أكدلى انه من افيز الشكمان وبعتنى لصنايعى شكمانات جنبه ربط على الأفيز وكان كله تمام.

**wlng76** · 04-11-2008 01:56 PM

صباح الخير
الموضوع بتاع الحرارة دا انا لسة متتبع ولسة ما وصلتش لحل نهائى, لكن هقول لكم على اللى وصلتله لغاية دلوقتى.؟
أولا صباع الحرارة اليابانى صورته كدة

بعد تركيب صباع الحرارة, اكتشفت ان مروحة التبريد بتشتغل تقريبا فى ثلثى المسافة وكدة تكون العربية درجة حرارتها عالية, وطبعا واضح ان الأصلية مصنوعة بحيث ان الحرارة ما تزيدش عن النصف علشان الراكب يحس ان عربيته ما بتسخنس والحقيقة ان العربية ممكن تكون بتغلى وهو ولا هو هن, ودا طبعا سبب ان اغلب العربيات السويف بتجيب جوان وش سلندر واللى راكب شايف ان العربية حرارتها طبيعية
وجارى حاليا البحث عن ثرموستات حرارة تكون اصلية علشان أغيرها بالقديمة يمكن تكون هى سبب سخونه العربية

**galilio_mad** · 04-11-2008 02:42 PM

انا سمعت ان لما الميه بتفضى تماما الترموستات مش بيشتغل لانه مفيش حاجة يقيس درجة حرارتها و بيفضل واقف
الله اعلم مدى صحة الكلام ده

موضوع السخونية و العداد ده برضو انا بعانى منه, و بطلت ادور وراه لانى ما وصلتش لحاجه
ببص على الميه كل كام يوم و خلاص