الموضوع: تقرير: استلام نيسان صني 2013 الشكل الجديد من أوتو إيجيبت

السلام عليكم ورحمة الله وبركاته

الحمد لله ربنا كرمني واستلمت الصني بتاعتي يوم 8 مايو 2013.
طبعا أنا باعتذر عن تأخير التقرير بس كنت مطحون في الشغل.

أنا إن شاء الله حأقسم التقرير لأجزاء كالتالي:-

1- الأحداث:-
اتصلت بالسيلز بتاعي يوم الثلاثاء أسأله عن ميعاد الاستلام فقالي إنها جاهزة وإنه بيظبطلي الورق بتاعها واتفقنا على الاستلام يوم الأربعاء الساعة 2 الظهر ( وده كان في رينج الميعاد اللي متحدد لي من قبل كده).
روحت في الميعاد وكانت المقابلة ممتازة .... السيلز عمل معايا الآتي:
1- سلمني ورق العربية ونسخة منه
2- شرحلي تفاصيل الضمان وأماكن مراكز الخدمة.
3- شرحلي إزاي أفعل الضمان.
4- شرحلي العربية بالكامل على الطبيعة. (وكان شرحه ممتاز)
5- نبهني على قراية الكتالوج علشان أقدر أتعامل مع العربية بأفضل شكل.
6- خلي حد يشيلي الورق من على العربية وينضفهالي بالكامل.
7- عملت شيك على العربية بنفسي زي ما اتعلمت من موضوع الأستاذ أحمد مصطفى.
8- مليت ورقة survey سألوني فيها عن مدى رضائي عن المعاملة بكل أشكالها.
9- بس يا سيدي وخدت العربية ومشيت.

2- الأوراق:-
بالنسبة للورق الخاص بالعربية فهوا كالتالي:
1-ورقة انتاج وملكية مصنع نيسان للسيارة.
2- ورقة بيع العربية لأوتو إيجيبت.
3- محضر استلام العربية ( من أوتو إيجيبت ليا).
4- ايصال الدفع.
5- صورة من الأوراق ديه كلها.

3- ما تم استلامه مع العربية:-
1- الكتالوج (دليل المالك).
2- كتيب الضمان.
3- ضمان البطارية.
4- ضمان الكاسيت.
5- مفتاح بريموت.
6- مفتاح احتياطي من غير ريموت مع بطاقة معدنية صغيرة عليها رقم المفتاح علشان النسخ.
7- استبن.
8- ايريال الراديو.
9- طقم عدة 3 قطع.
10- كوريك.
11- الطاسات (وديه كانت راكبة في العربية).

4- تعليقي:-
1- من ناحية المعاملة : ممتازة.
2- من ناحية الالتزام بالمواعيد: ممتازة.
3- من ناحية متابعة العميل: ممتازة (اتصلوا بيا علشان يعرفوا رأيي تاني غير ورقة ال survey)
4- من ناحية الهدايا: ما سلمونيش أي هدايا وديه نقطة ضعف فيهم ( السبع بيسلم هدايا).
5- نيسان كشركة محترمة جدا لان كل اللي عملوا معايا السيلز من تنضيف العربية وشرح الضمان وشرح العربية وغيرها ..... كل ديه شروط عاملاها نيسان مصر على الوكلاء بتوعهم وده شئ فوق الممتاز.

أخيرا بأشكر جدا أستاذ أحمد مصطفى على موقفه الأكتر من رائع معايا وقت الاستلام وعلى كل موضوعاته اللي استفدت منها كتير.

المشاركة الأصلية كتبت بواسطة jos

الف مبروك العربيه وربنا يكيفيك شر الحسد والحقد ومسامير العيال اللى بتكحت والظلط اللى بيتنطر زى الرصاص يرشق فى الصاج يعمل نغز وشر التكاتك اللى بتطلع عليك متعرفش منين وشر الحرامية

الله يبارك فيك .... وربنا يتقبل دعائك ليك وليا

المشاركة الأصلية كتبت بواسطة canner

الف مبروك و ربنا يديك خيرها و يكفيك شرها

الله يبارك فيك يا باشا

المشاركة الأصلية كتبت بواسطة KoKyKa

موضوع أكثر من راءع

جزيت خيرا يا باشا على ذوقك

المشاركة الأصلية كتبت بواسطة beshoyyy

مبروك و ربنا يحافظ عليك و عليها

الله يبارك فيك ويحفظك انت كمان وكل غالي عندك

المشاركة الأصلية كتبت بواسطة kokyg2010

الف مبروك وربنا يباركلك فيها ويكفيك شرها ،
بس استفسار كده على السريع الترخيص فى المرور اتكلف كام

ألف يبارك فيك يا باشا .... بص الترخيص عمل معايا 1400 جنيه ولو عايز تفاصيل الخطوات خش على الموضوع ده
نايل موتورز - NileMotors.net003-a.html

المشاركة الأصلية كتبت بواسطة Ramy Rateb

ربنا يبارك لحضرتك فيها و يرزقك خيرها .. يا ريت لو تقولنا أحساسك بالعربية من حيث السرعة و الثبات و التقفيل و الخامات و ... ربنا يسلم طريقك دائماً .

الله يبارك فيك يا باشا .... إن شاء الله أعمل تقرير تاني أكتب فيه تعليقي على العربية