الموضوع: استفسار مهم لمبتدئه سواقه ؟؟؟؟؟؟

السلام عليكم ورحمه الله وبركاته
مش عارفه ابتدي ازاي بس انا متبعاكم من زمان وبقرا ع المنتدي كتيير جدا جدا من ساعه مقررت اغامر واتخبطت في دماغي وادخل رالي الشوارع المصريه وعالم السواقه واشتركت مخصوص عشان نفسي تفيدوني مش عارفه ده القسم المناسب للموضوع ولا لا بس انا بدخل القسم ده دايما
انا قررت اتعلم سواقه من شهر مارس واخدت 12 حصه في مركز تعليم وطلعت الرخصه الحمد لله بس مش هي دي المشكله انا اتعلمت علي فيرنا 2013 مانيوال ودي كانت اول مره في حياتي اسوق اصلا او اقعد علي كرسي سواق في حياتي وكنت متحمسه جدا ومخفتش ابدا ابدا بالعكس كنت متهوره جدا ودايما بقول للي بيعلمني علمني علي اني ولد طبعا عشان سمعه الستات سبقاهم
كنت ماشيه زي الفل بس مش هفضل اتعلم علي طول علي عربيه المكتب و العربيه اللي عندنا بقي سيفيك 95 اول مره اركبها خفت جدا منها مش عارفه ده صح ولا لا بس ابعاد مختلفه مش عاليه زي الفيرنا وحاسه اني واقعه جواها بشوف الكبوت بالعافيه بس الحمد لله تخطيت المرحله دي وطلعت بيها مرتين مع المدرب وبقيت بمشي بيها كويس
بس الخوف مراحش مش هفضل طول عمري بتعلم امتي اقرر اني امشي بالعربيه لوحدي بجد محتاره وياريت تفيدوني بخبراتكم هل الرهبه دي هتروح لو مشيت لوحدي ولا فعلا لسه شويه واصبر علي نفسي
واسفه لو طولت عليكم وياريت تفيدوني

المشاركة الأصلية كتبت بواسطة احمد نظمي

علي فكرة الخوف دا عادي جدا ولو مخفتيش يبقا في حاجة غلط كلنا خفنا ومع كل يوم بتسوقي فيه بتتعلمي من اخطاءك وكل مرة بتحسني من نفسك لحد بعد كدا تبتدي تاخدي بالك من اخطاء غيرك وتتفاديها
بس نصيحتي ليكي تمشي في اماكن مش زحمة اوي مع حد بيعرف يسوق جنبك مش المدرب وتطلبي منه انه يسكت ومش يوجهك وفي نفس الوقت تحسي بالامان لو لاقدر الله حصل حاجة هوه هيطلعك من الموقف دا
وربنا يوفقك

شكرا جدا استاذ احمد علي تشجيعك بس المشكله اني معنديش حد بيعرف يسوق او اللي عندي بيعرف يسوق ركبنا مع بعض مرتين او تلاته واختلفنا لانه بيوترني جدا وبيبقي دايما قلقان حتي لو انا ماشيه صح ومش معقول هاخد المدرب دايما انا عايزه اخد خطوه اني امشي لوحدي وانا اللي خايفه بصراحه لان فعلا المدرب غصب عنه طول الوقت بيوجه وبيبقي قلقان من العربيه لانها مش مجهزه ومساعداه زي بتاعه المكتب بس ربنا ييسر ان شاء الله

المشاركة الأصلية كتبت بواسطة mem

بصى حضرتك السواقه ممارسه
كل ما تسوقى اكتر كل ما الثقه تزيد والرهبه تخف
اكيد لازم فى البدايه يكون فى رهبه انتى لسى جديده فى عالم القياده
فلازم يكون فى رهبه وخوف فى البدايه لكن طالما عندك اصرار انك تكون متميزه فى السواقه
فلازم تسوقى كتير علشان تتعودى على عربيتك وتاخدى على جو الطريق والمفاجاءت اللى ممكن تقابلك
وكل مفاجاءه هتقبلك اكيد هتتعلمى منها
واهم حاجه فى السواقه انك تتوقعى خطا الغير ودايما تبقى واخده بالك وعمله حسابك لاى خطا من الاخر
ولازم فى البدايه يكون فى احد معاكى بيعرف يسوق كويس على شان لا قدر الله حصل اى موقف يقدر يتصرف
وشويه شويه هتلاقى حضرتك عايزه تسوقى فى طرق مزدحمه شويه فكل ما تتجراى اكتر هتلاقى مستواكى بقى افضل فى القياده
هتلاقى نفسك عايزه تدخلى فى طرق اصعب وبعد كده هتلاقى نفسك تقدرى تسوقى فى اى مكان
وبالتوفيق لحضررتك

شكرا جدا لردك بجد انتو شجعتوني انا بس محتاجه اجمد قلبي شويه واخد حتي خطوه اني امشي لوحدي حتي ولو تحت البيت شويه لاني لحد الان مخدتش الخطوه دي ومجرد محس اني لوحدي في العربيه بخاف اتعودت علي وجود المدرب جنبي

المشاركة الأصلية كتبت بواسطة mesaharaty

الممارسة والنزول إلى الشارع عمليا وبعدين هو يا دوبك شهر تقريبا وكل شىء حيبقى تمام والرهبة تزول والقلب يبقى جامد .

يااااااااااارب بس انا ممكن اخد اكتر من شهر لاني مش بقدر اسوق كل يوم بصراحه بسوق يوم الاجازه من الشغل بس

المشاركة الأصلية كتبت بواسطة OilMan

كلما تسوقى وتزيد مسافاتك كل ما تاخدى الثقه اكتر بالتوفيق ان شاء الله
حاولى تتعودى على الركن برده بين عربيتين مثلا او تحطى طوبتين او قمعين وتتعودى على المناورة
حذارى حذارى من الارتباك والتردد فى اخذ القرار فى تعاملك مع السيارة وانتى سايقه بلاش تردد نهائى وتعاملى انى الخطأ بييجى من الغير وليس منك ودايما عينك امامك( مش فى موبايلك ) وتكونى متوقعه ما يحدث امامك لمسافة لا تقل عن 500 متر لتفادى اخطاء الغير وامشى بمبدأ السلامه وربنا يسترلك طريقك

نصيحه
ياريتك تتعودى من دلوقتى على عدم السواقه وانتى بتتكلمى فى الموبيل (ويا سلام بقى لو محجبه وحطاه تحت الحجاب ما اسهله) او بتشييتى وانتى بتسوقى وبتابعى اصحابك على الفيس والحركات اللى بجد بقت اوفر سواء من صنفنا او صنفكم

وفى الاخر ربنا يقدرنا على ست جديده فى عالم السواقه

مع تحياتى بسواقه أمنه

هههههههههههههه الحركه دي مستفزه جدا سواء من الرجاله او من الستات فعلا الموبايل والشاتينج والاكل بجد بحسه استهتار بارواح الناس
بالنسبه للركنه الحمد لله دي اتعلمتها وفعلا بعرف اركن بين عربيتين وربنا يكرمه اللي علمني علمني ازاي اركن من اول مره صح من غير محتاج ادخل واخرج ميت مره لانه عارف ان دي ازمه البنات كلها
ومفيش غير الركنه واليوتيرن اللي بعرف اخدهم كويس
اما الباقي هو الخوف ثم الخوف ثم الخوف اللي مش لاقياله مبرر والتردد فعلا في اتخاذ قرار ودي مشكلتي بخاف في اماكن لازم يكون رد فعلي سريع فيها وبتسرع في مواقف مينفعش اكون فيها متهوره ومتسرعه بس ان شاء الله كله بالوقت يتظبط وبجد ربنا يخليكو كلكوا علي مساندتكو