شكر واجب، وحل مشكلة التسقيف
الحمد لله كل شئ، وبدعى وبقول اللهم إرحمنا من شر ما يحدث فى هذه البلد من غش...
فى البداية أحب أشكر أستاذنا الكبير طارق علاء، على مجهوده الكبير فى مساعدة أى حد مننا فى هذا المنتدى، وقولت ان من واجبى اشكره قدام الجميع على تعبه ومجهوده معايا فى الفترة اللى فاتت.. (ربنا يباركله هو وأسرته جميعاً)
المشكلة يا سادة انى كنت بعانى من تسقيف مستمر على جميع السرعات فى كل واى وقت مع التكييف وبدون، غيرت حاجات كتير مش علشان العيب دا علشان اكون صريح، بس حاجات تانى وقولت ممكن العيب يروح معاها، لكن دون أى تغيير، وشكيت فى تهريب فى المكنة وشكيت فى عامود كرنك وشكيت فى بلى دينمو وشكيت فى ريدياتير وشكيت فى كوبلن داخلى وشكيت فى شدادة تكييف... كنت بلف حوالين نفسى
لحد مقابلت أخونا طارق وسمعته التسقيفة الرخمة المبالغ فيها... قام قايلى لف وارجع وعلى عربيته عدل، إذا به نفس الصوت بالمللى بس بإختلاف حاجة بسيطة اخف عنده علشان كان حاطت أوكتين بوستر... واتفقت معاه ان المشكلة دى مشكلة بنزين (بعد سنتين تسقيف) طيب إقترحت أعدل فيشة الأوكتين على بنزين 80 مع إنها كانت على 95 وكنت قبلها مجرب على 92 كمان والتسقيف كان موجود...
وبالفعل قومت معدل الفيشة على بنزين 80 وجرب يا ريس مع التكييف واذا بها لا تسقف!!!!!!!!
زى مكل الناس بتحط بنزين 92 زى مبيقولوا فى أى بنزينة....
دا معناه إننا كلنا مش بنعبى بنزين 92 من الأساس...
ودى كانت قصتى مع التسقيف وحله، حبيت أنقلهالكم علشان تستفيدوا ومفيش حاجة أقدر أقولها غير (حسبى الله ونعم الوكيل)
وأخيراً شكراً تانى لأستاذنا طارق على مجهوده وعلى تعبه معايا... وربنا يرحمنا