-
ارجو المساعدة
انا شاب اشتغل ف احدى المصالح الحكومية ( شئون قانونية ) ومرتبي ميتجاوزش 700 ج يدوب بقدر اصرف ع نفسي وفضلي سنة بالضبط ف عقدي المؤقت واتثبت ان شاء الله
دلوقتي انا عايز ازود دخلي وبالفعل اشتغلت شغلانة تانية ب 500 ج يعني كنت بحصل 1200 ج وكنت بتقتل ف ميعادها كنت بروح وارتاح ربع ساعة وانزل تانى عشان الحق الشغل التاني والتأخير فيه كان بيخصمولي من المرتب فاضطريت اسفا اني اسيبها
خلال السنة الجاية دي ان شاء الله لحد مااتثبت ف الحكومة اخد كورس انجليزي واقوي نفسي ف اللغة عشان السفر ولا السفر مش بيحتاج لغة ولا ادور ع شغل تاني واستقر ف مصر وخلاص ( حوار السفر انا هسافر مع حالى ادور ع شغل ياتخيب ياتصيب ومليش حد هناك برة )
انا بجد مش عارف اعمل ايه انا عندى 26 سنة ومش عارف اعمل ايه فكرت ف مشروع انا واحد صاحبي بس حال البلد مش مساعد وخايفين نضيع فلوس اهلنا ونخسرها ، نفسي اكون نفسي ويكون ليا دخل محترم عشان اقدر اتزوج وافتح بيت
كنت اتمنى انى اشتغل ف وظيفة حكومية ادمية زي الضرائب او البنوك او الجمارك ويكون مرتبها عالي للاسف مفيش توازن ف المرتبات ف الحكومة بس ارجع واقول الحمدلله
والله انا فكرت اشتغل بعد الظهر مع محامي بس للاسف المحاميين عايزيين الواحد قدام عنيهم وده مش هينفع معايا عشان انا مرتبط بالهيئة الحكومية ف مواعيدها
انا بجد مش عارف اعمل ايه افكر ف السفر واقوي نفسي ف الانجلش خلال السنة دي عشان اقدر اسافر واعرف اتكلم انجلش مع الناس برة ولا اقعد ف مصر واشتغل شغلانة تانية وخلاص
-
اتعلم لغات ياباشا وسافر بره الحياه تجارب وانت سواء كده ولا كده هتتعب من الناحيتين فانت سافر يمكن ربنا يكرمك بشغلانه كويسه تنقلك
-
-
حالك هو حال معظم شباب مصر للأسف
بعد المعاناه فى التعليم سنين طويله تلاقى المحصله صفر
لكن لو عايز رأيى الشخصى حاول تعمل بزنس فى مصر وتبنى نفسك فيها - جازف وحاول وإخسر وإتعلم لحد ما تقف على رجليك لأن حال الدول العربيه مش مطمئن والدول الأوروبيه أصبحت على شفا حفرة وأعتقد أنه قريب سينالها من المظاهرات والإعتراضات جانب بسبب البطاله يعنى من الآخر حاول تبنى نفسك فى بلدك علشان لو وقعت حتلاقى اللى يشيلك لكنك لو وقعت فى الغربه مش حتلاقى حد جنبك وأكيد إنت شايف إنه برغم الأيام الصعبه اللى إحنا عايشنها فى ناس كتير جدا فى مصر ناجحه ومشاريعها كل يوم فى تقدم وربنا يوفقك ويكرمك بوظيفه محترمه زى ما إنت عايز وأخيرا ده مجرد رأى والموضوع كله يرجعلك إنت
-
الاول قول اية هيا :
امكانياتك
مهاراتك
الاعمال التى تجيدها باحتراف
الاعمال التى مارستها ونجحت فيها
الاعمال التى مارستها وفشلت فيها
تقريبا تقدر تدبر مبلغ كام لو حبيت تعمل مشروع خاص
عشان الناس تعرف تقترح عليك
Content Relevant URLs by
vBSEO 3.6.0 PL2