الموضوع: استفسار عن الاطارات والجنوط المناسبة لصنى 2008

المشاركة الأصلية كتبت بواسطة hossam_zaky

السلام عليكم

أياك تركب جنوط سبور غير الأصلية
الجنط الحديد عرضه 5.5 بوصة و ده نفس عرض الجنط السبور بتاع السوبر صالون
الجنوط الرياضية اللي في المحلات بيكون عرضها غالبا 6.5 بوصة
خليك في مقاس الكاوتش 15/195/60

أنا عربيتي صني ex 2009 اتوماتيك معايا من الزيرو
و لسة مركبلها جنوط أندونيسي 15 بوصة من أشرفكو مدينة نصر شهر فبراير الماضي
و ركبت كاوتش ماكسيس مقاس 205/55 نقشة بيسموها الشجرة سيء جدا

بعد التجرية لمسافة حوالي 10000 كم علما بأن عداد عربيتي دلوقت 115000 كم و صياناتي منتظمة

المقاس العريض 205 مميزاته ثبات أعلي و جنب الكاوتش بارز عن حرف الجنط فبيحميه من التجريح مع الرصيف مثلا و الأهم بيحافظ علي الكاوتش من عمل بالونة لو رزعت في مطب ولا حاجة و كمان النقشة الشجرة هي عبارة عن روتيشن مخصص لتفريغ الهواء و بيدي ثبات ممتاز حتي لو في مياه علي الطريق

عيوب المقاس العريض 205 أحيانا لو الأسفلت به عيوب أو واخد شكل في الطوالي ( محرود ) العربية بتتبع شكل الأسفلت فلازم تمسك الدريكسيون كويس
النقشة بتاعة المداس اللي بتدي ثبات اعلي بيكون النقشة بتاعتها فجواتها أكبر عشان تعمل تفريغ هواء أكتر و ده بيعمل معاك صوت ونة مستمرة

الأفضل أنك تخليك في المقاس 195 / 60 / 15 و ده اللي بينزل علي السوبر صالون و كنت مركبه الطقم القديم و كان ممتاز


الأهم طبعا الجنوط أيييييييييييييييياااااااا اااااك تركب جنوط سبور

أنا الجنوط الأندونيسي جننتني و كانت حتخليني أبيع العربية للأتي :
الجنط الرياضي أي كان نوعه مقاس الصرة بتاعته واسع عشان يركب علي أي عربية ( أدام مش أوريجينال )
و بتوع الجنوط بيعوضو الفرق بين مقاس صرة الجنط و مقاس صرة طمبورة العربية اللي غالبا بتكون أصغر بوضع جوان بلاستيك ( معفن ) بيسموه رينج أو رينجات و ده مستحيل يضبط وضع الجنط لما تركبه و طول الوقت حتلاقي عربيتك ترعش علي سرعات 90 لحد 120 حسب الظروف و أكيد طبعا حتحاول تعيد ترصيص كاوتش لكن العيب مش منه

المهم أنا جبت من الأخر و بعد عذاب شهرين توصلت لأمكانية خرط رينج ألمونيوم عند صديق يملك ورشة خراطة بالعاشر من رمضان و كانت الكارثة أن الجنط الأندونيسي اللي دفعت فيه أكتر من الصيني عشان الصيني سيئ
الصرة بتاعته أستدارتها مش مضبوطة يعني بالعين المجردة هي مستديرة لكن عند قياسها بالبرجل عن الخراط كان فيها 2 ملم فرق في قطرها يعني كأنها بيضاوية
مش حطول عليك أكتر من كدة المهم أنا حخرط قلب الجنط نفسه عند صاحبي يعني الجنط معيوب و عند أشرفكو أخر حل كان أنهم حيخرطولي الجنط برضه
و طبعا من سلبيات أني ركبت جنوط رياضية أن مقاس صامولة العجل بيكون أصغر من اللي راكب الأصلي يعني ميتفكش بمفتاح العجل الأصلي اللي معاك لازم تشتري صليبة و كمان نوعية صواميل سيئة خربت 3 مسامير من بتوع العربية علي مرات متفاوتة و كل مرة أغير المسمار بتاع الطمبورة في السبع لدرجة اخر مرة محاسبونيش علي المسمار اللي ركبوه
عذرا علي الأطالة و أرجو أكون أفدتك

شكرا جدا على مساعدتك

المشاركة الأصلية كتبت بواسطة youssef.awad

بعد قراءة تجربة العضو حسام زكى صديقى وحبيبى وتغييره لكاوتشات الاستوك اليابانى 185/65 بريدجستون b391 الى 195/60 بريدجستون b250 تايلاندى واخيرا الماكسيس 205/55 نقشة الشجرة والجنوط .. دى اجابتى على اسئلتك :

1. افضل مقاس هو 185/65 ثم 195/60

2. افضل 3 انواع اطارات هى كونتيننتال / ميشلان / بريدجستون
الاول: مرونة غير عادية ومتعة وصوت متوسط وتماسك فى الملفات ولو ركبته مش هاتعرف تركب اى عربية تانية من غير ما يكون فيها
الثانى: صوته منخفض وعملى وموفر فى البنزين وطرى الى حد ما
الثالث: اكثرهم قساوة واغلاهم سعرا واعلاهم صوتا

3. الجنوط لها عدة مقاسات اهمها مايلى :
الابعاد بين فتحات المسامير ودى فى الصنى 4*114 ومش هتلاقيها بسهولة الا فى الجنوط ام 8 فتحات 4*100 & 4*114
الاوفست او المسافة بين صرة الجنط والطنبورة واللى مكانها بيركبوا رينجات بلاستيك او حديد ودى مقاسها فريد فى الصنى et45 واغلب الموجود فى السوق هتلاقيه 40-43
عرض الجنط وعندك فى الصنى ينزل 5.5 بوصة ومعاك لحد 6 بوصة كحد اقصى حتى لا يكون الجنط بارز خارج جسم العربية

4. مكان الشراء .. الله اعلم

شكرا لحضرتك جدا على مساعدتك
ان شاء الله أخليني فى مقاس 195/60/15
بالنسبة لاطارات ميشلان أو كونتنننتال فيه منها موديلات وياريت نوع الموديل الذي له المواصفات التى ذكرتها حضرتك
بعد نقاشات الأعضاء .. أعتقد أنه من الأفضل والأوفر تركيب الجنوط الصلية للسوبر صالون فممكن أعرف اجيبها منين
شكرا جدا

المشاركة الأصلية كتبت بواسطة youssef.awad

ميشلان energy saving
كونتيننتال premium.......

جنوط السوبر صالون عند مودرن موتورز ب3800 ج + 10% ضريبة

شكرا لحضرتك يا أستاذ يوسف بس أنا قصدى الجنوط الحديد مش السبور