-
احظروا... حاجه تحرق الدم
واضح ان موضوع تزوير ورق السيارات وتغيير ارقام الساسيهات لبيع السيارات المسروقه والمهربه انتشر جدا لدرجة ان الناس بقت بتطلب الورق المضروب وسيارات حوادث لاخذ رقم الشاسيه ووضعه علي سياره بدون ورق ( مسروقه او مهربه ) علني وللاسف اكتشفت الموضوع ده بالصدفه في منتدي من منتديات السيارات المصريه تحت عنوان سيارات حوادث للبيع ومش عارف ازاي اداره المنتدي والمشرفين موافقين علي موضوع زي ده؟؟
اللي بيبيع عربيه ملهاش ورق يعني مسروقه او متهربه!!
واللي بيبيع او بيطلب ورق وطبعا علشان يرخص بيه عربيه نصين او مسروقه او متهربه!!
واللي بيعرض علي الناس اللي عندها عربيات من غير ورق يشتريها منهم او يعملهم ورق سليم 100%؟!!
وفي الاخر ييجي صاحب النصيب ويشتري عربيه من دول...
لأ وايه. ما شاء الله الموضوع متقيم ب 5 نجوم!!!!! هيه بقت كده؟؟؟ لا حول ولا قوة الا بالله...
-
ههههههههه .. يا باشا عادى .. العربيات الحوادث دى بيبقى ليها ورق يعنى مش مسروقة ولا حاجة ... و طبعا بتتباع عشان يتاخد منها الورق
-
يا عم عادي انا عندي خالي من زمان وهو بيدور عؤى عربية حوادث يشتريها عشان بتبقى ارخص
وبص على اهرام الجمعة هتلاقي اعلانات عن مزادات سيارات حوادث عادي جدا
-
-
لا حول و لا قوه الا بالله . البلد دي بقي كل حاجه فيها عادي . الغلط بقي صح و الحرام بقي حلال . إنا لله و إنا اليه راجعون .
-
هو الصح في الموضوع واحد بيبيع عربيتو بعد ما عمل الحادثه عشان مش عايز يصلحها وواحد تاني بيجيب عربيه ملهاش ورق وينقل كل حاجه فيها للعربيه الي عامله حادثه
بس السؤال هل العكس حرام ولا حلال يعني ينقل رقم الشاسيه علي العربيه الي ملهاش ورق ؟؟؟
-
لا حول ولا قوة الا بالله...
يا اخواننا ايه هو اللي عادي؟؟؟
انا عارف ان سيارات الحوادث مش مسروقه. انما اللي بيشتري ورقهم بيشتريه علشان يرخص بيه عربيه مسروقه او متهربه... اللي بيشتري عربية حوادث علشان يشدها ويستعملها حاجه واللي بيطلب ورق يزور بيه حاجه تانيه...
افهم من كده ان حضرتك لو اشتريت عربيه من العربيات ده وبعد فتره المزور ده اتمسك وسحبوا منك العربيه علشان يرجعوها لصاحبها الاصلي هتقول عادي؟؟ خصوصا انك بتشتري العربيه بتمنها الفعلي في السوق علي اساس انها عربيه ورقها سليم...
انا مستغرب الحقيقه من بعض الردود ومن رد احد التجار عليه في المنتدي التاني وهو كالاتي..
:
المشاركة الأصلية كتبت بواسطة --------
طيب وحضرتك ايه المزعلك فى الموضوع هو الموضوع كل على بعضه مش قانونى اه بس اه بندور على اى مصلحه تعرف لو الحكومه تتقى ربنا فى الشعب المغلوب على امره وتاخد جمارك زى اى دوله مكنتش تلاقى التحايل على القانون يارجل هو فيه بلد فى الدنيا غير مصر ممكن تلاقى فيها عربيات مودل 70ماشيه فى الطريق حاجه اخر ارف وعكننه...
وده ردي-----
هو حضرتك (بما انك بتتاجر في العربيات ده) بتعمل "المصلحه" وبتبيع العربيات ده لمين؟ مش للشعب اللي حضرتك معترض ان الحكومه ما بتراعيش ربنا فيه!! يعني زعلان ان الحكومه ما بتتقيش ربنا في الشعب طيب ما نبدأ بنفسنا ونتقي ربنا في الناس اللي بتشتري العربيات ده علي اساس انها سليمه.. يمكن منطقك ده يبقي معقول لو كنت بتعرف المشتري الحقيقه وبتبيع العربيه باقل من سعرها في السوق ساعتها هنقول اللي يقبل زنبه علي جنبه انما للاسف الناس بتشتري العربيه بسعرها في السوق (اللي حضرتك معترض علي ارتفاعه بسبب الجمارك) علي اساس انها سليمه...
لو حضرتك مكان المشتري وحطيت دم قلبك في عربيه تريحك من قرف المواصلات و بعد فتره الموضوع انكشف والعربيه اتسحبت منك هتقبل ان اللي بعهالك يقول انه كان بيدور علي اي مصلحه؟؟
-
طبعا حرام وغير قانوني ولو اتقفشت من مباحث السيارت ب 7 سنين
عندي في الورشة اعرض علينا مبالغ خزعبلية للعربيات دي خاصة بعد ثورة ليبيا
خاصة شغل المرسيدس والبيم واللاند كروزر
ولله الحمد والفضل مادخلناش الشغل ده عندنا نهائي ملعون ابو الحرام بياخد الحلال ويمشي
-
هو الموضوع لو عربيات انت جايبها من بره شاريها ودخلتها وهتعمل لها ورق غير قانونى لكن معتقدش فيه مشكله حرامنيه
لكن لو الكلام كله كله انك تشتري ورق وتنقل عليه عربيه مسروقه يبقى طبعا حرام
-
هو الطبيعى أنك تشتري عربية حوادث وتشدها وتركبها أنما أنك تزور وتاخد الورق لسيارة مسروقة يبق كدة حرام طبعا وربنا أعطانا عقل نميز به الصح من الخطأ .
Content Relevant URLs by
vBSEO 3.6.0 PL2