الموضوع: تغيير البطارية

المشاركة الأصلية كتبت بواسطة mohammedaladel

أنا متكلمتش فى سعة خالص هو الراجل بيتكلم عن أمبير وبس مقالش ah .... والأمبير هو شدة التيار والمصنعين بيختاروه طبقا لأحمال السيارة ... على كلام حضرتك بقى يبقى كان كل العربيات الملاكى يوصوا ليها ببطارية واحدة

وبعدين أنا بقى عايزك تشغل المروحة وتشغل الأنوار وكل الأحمال فى العربية وهى دايرة وشيل كابل البطارية وشوف الحاجات اللى شغالة دى هتضعف وتلاقى الآربى أم رفع حاجة بسيطة لو عربيتك فيها كنترول ولا لأ

وبعدين برضه لو منور أى حاجة وأنت بتدور سيادتك العربية بتفصل أى حاجة مشغلها عشان تغذى المارش

اي بطارية بتتباع بال ah و ليس بالامبير. و لذلك لما نيجي نتكلم على سعة بطارية بنتكلم على ال ah و دي زي ما وضحنا قبل كده بتعبر عن الطاقة المختزنة.
المصنعين بيختارو البطاريات بناءا على حجم المارش بتاع العربية و ده بيفرق على حسب حجم المحرك (٤ سلندر ولا اعلى) عشان يقدر يقوم العربية و في نفس الوقت البطارية تعيش. لو جيت تركب بطارية ٤٠ امبير ساعة على محرك ٨ سلندر مثلا ممكن الموتور يدور بس عمر البطارية دي حيبقى قصير لأنك بتسحب منها امبير اعلى من قدرتها.
نقطة ان الار بي ام بيعلى لما بتشغل احمال العربية بيأكد كلامي ان الدينامو هو اللي بيغذي كل الاحمال اول ما العربية تدور و البطارية ملهاش علاقة بتغذية اي حمل لان الكنترول بيحاول يعادل الحمل الزائد اللي جايله من الدينامو فبيرفع الار بي ام سنة صغيرة. لو كانت البطارية بتغذي اي احمال اثناء تدوير المحرك يبقى عمرها ما حتتشحن لانك حتفضل دايما ساحب منها امبير و الكلام ده مبيحصلش. و على فكرة انا جربت الحركة دي فعلا و فصلت البطارية و شغلت احمال العربية و اشتغلت عادي جدا.
لو بتدور العربية و النور والع، النور مبيفصلش، الاحمال اللي بتفصل ممكن تكون الكاسيت و التكييف و حتى دي مش في كل العربيات بس انا حبيت اقولها كمثال مش اكتر.

المشاركة الأصلية كتبت بواسطة mohammedaladel

أول مرة أعرف حكاية إن الأمبير مكتوب على البطارية دا السعة بتاعتها مش شدة التيار ... شكرا للتوضيح والأفادة

وآسف جدا

كلنا هنا بنتعلم من بعض و انا متابع لمواضيعك الممتازة اللي بتعملها عن الميجان و اخرها موضوع تغيير طرمبة البنزين و بصراحة استفدت منه جدا. ربنا يجعله في ميزان حسناتك.