هي قيمة الفلوس بتقل أد ايه ؟

**Amr96** · 14-06-2013 11:00 PM

السلام عليكم
سؤال جه فى دماغي ..
هي قيمة الفلوس بتقل أد ايه ؟
يعني لو معايا مثلا حالياً مبلغ قيمته 100 الف جنيه ..
كمان 5 سنين حقدر اشتري بيه اللى اقدر اشتريه حاليا سواء شقة او عربية او اى حاجة ؟؟
ولو قيمة المبلغ ده قلت ، حتكون أد ايه القيمة ؟
يعني علي مدار كل سنة قيمة الفلوس بتقل اد ايه تقريباً ؟؟

هل قيمة ال100 الف جنيه مثلاً بعد 3-4 سنين حتكون بنفس قيمة ال80 الف جنيه مثلا؟
ولا اقل ولا اكتر ولا ايه ؟؟

**prof2013** · 15-06-2013 12:18 AM

ببساطه شديده لو لم تستثمرهم في اي شيء من الان فسوف تفقد قيمتها فيما بعد الافضل ان تقوم بشراء قطعه ارض مباني او قطعه ارض زراعيه وتتركها وبالتالي تزيد اموالك مع تقلب الاسعار بالاضافه لحفظ الاموال خلال الاستثمار الامن

**adelghanem** · 15-06-2013 12:27 AM

انا اعتقد ان قيمة القلوس ممكن مقارنتها
مع قيمة الذهب
يعنى من عشرين سنه كان جرام الذهب ب30 جنيه
والكلام ده فعلا مش على سبيل المثال
دلوقتى سعر جرام الذهب 300جنيه
يعنى الجنيه بقى بقيمة 10% من قيمته من عشرين سنه
وهكذا ..ده تحليلى لقيمه الجنيه

**dedi** · 15-06-2013 12:32 AM

المشاركة الأصلية كتبت بواسطة prof2013

ببساطه شديده لو لم تستثمرهم في اي شيء من الان فسوف تفقد قيمتها فيما بعد الافضل ان تقوم بشراء قطعه ارض مباني او قطعه ارض زراعيه وتتركها وبالتالي تزيد اموالك مع تقلب الاسعار بالاضافه لحفظ الاموال خلال الاستثمار الامن

بس المهم يضع يدة على الارض و يعمل فيها اى حاجة علشان البلطجية ممكن يضعوا يدهم عليها

**dede_dodo88** · 15-06-2013 01:08 AM

صعب أنك تحدد قيمتهم في المستقبل لأن قيمة العملة بتبقى مرهونة بالوضع الأقتصادي و معدل التضخم..
هو الوضع الطبيعي لأي أقتصاد أن معدل التضخم يتراوح من 1 أو 2 لحد 5 % ودي النسبة الصحية المصاحبة لأي نمو أقتصادي.. الأرقام المعلنة في مصر بتلعب في متوسط الـ8% حسب كلام البنك المركزي و الرقم ده أشك تماماً أنه يكون حقيقي.. أحنا بنلعب في لا يقل عن 20% و النسبة عمالة تزيد,,
فلو فضلنا بنفس المستوى الأقتصادي اللي أحنا عليه ده متضمنش بعد خمس سنين هتلاقي الأستخدام اللي بتخططله دلوقتي للمبلغ ده وللا لأ..
فأحسن حل بالنسبالك أنك تحط فلوسك في أصول ثابتة لأن هي دي اللي قيمتها بتزيد مع الوقت على عكس قيمة النقود..

**hazoom2006** · 15-06-2013 03:19 AM

هما ال100 الف دلوقتى يجيبو اية ولا شقة يدوب عربيه كيا بيكانتو الاسعار بقت نار والحياة كل يوم بتغلى

حاول تشترى ارض او تشترى دهب وماتحتفظش بالفلوس

**youssef_u** · 15-06-2013 03:38 AM

100 الف بعد 5 سنين ؟ تجيب تلفزيون

**golden_web_2007** · 15-06-2013 04:05 AM

الـ 500 جنية فى الأربعينات و الخمسينات كانت تشترى شقة فى مصر الجديدة

النهارده شقة فى مصر الجديدة بنفس المواصفات بـ 3 مليون ..

قارن و انتا تعرف بئـا ..

الجنيه مالهوش اى قيمة شرائية النهارده ..

عاوز تحافظ على فلوسك إستثمرهم فى مشروع او حطهم فى عقارات قيمتها تزيد ..

**Amr96** · 15-06-2013 02:39 PM

طيب ورأيكم الواحد يحطهم فى ايه ؟
الفكرة ان المبلغ مش كبير أوي فعلاً انك تشتري شقة ..
والأرض بصراحة فى ظل الوضع الآمني اللى بنشوفه دلوقتي مش بعيد تروح تلاقي ناس بانيين عليها ولا عاملين فيها حاجة (من قصص سمعناها كلنا)

الواحد يحطهم فى ايه ؟؟
وهل البنوك تفى بالغرض؟

**Mohab.Nabil** · 15-06-2013 04:18 PM

اظن كمان انها معتمدة على قيمة الجنيه قصاد العملات التانية لأن طبعا احنا دولة بنستورد كل حاجة تقريبا .. يعنى مع ارتفاع العملات التانية بقت القيمة الشرائية للجنيه اقل ..

مثلا لو خدنا العربيات مثال من سنتين 100 الف كانوا يجيبوا عربية كارينز او سيراتو .. دلوقتى يجيبوا بيكانتو و طبق المثل ده بقى على كل السلع