رحت مع قريبي وإشترى أفيو 2007 وإليكم الأنباء بالتفصيل

**ahmed1981** · 03-07-2007 12:21 AM

أولا بسم الله ماشاء الله لا قوة إلا بالله :D
السعر ـــــــــــــــــــــــــ ـــــــــــــــــــ 74 ألف
الكماليات:
1- تكييف
2- باور
3- كاسيت
4- إتنين زجاج كهرباء
5- سنتر
6- فتح الشنطة والبنزيم من الداخل تقريباً

المهم تعليقي على السيارة مبدئياً
1- العزل ممتاز جداً صوت الماتور غير مسموع وأنا ركبت لانوس 2003 وأقول الأفيو أفضل في العزل جدااااا
2- التكييف ممتاز بدون مبالغة ولا تحس بتأثيره على السيارة نهائي
3- الصاج متين متين متين إنسى اللانوس والفرنا الورق
4- شكل العربية من بره ما شاء الله جميل جداً
5- العفشه جميله مبتحسش بأي خبط

أنا طبعاً كنت فاكر نفسي رايح أتفرج على لانوس متنكرة لكن لقيت العربية حاجة تانية خالص مختلفة عن الانوس تماما

إحتمال أروح معاه من القاهرة لغاية إسكندرية أسوقله يعني ولو ده حصل سأقوم بعمل تقرير كامل عن السيارة إفيو
إلى ذلك الحين أستودعكم الله

**memoo_1st** · 03-07-2007 12:24 AM

الف مبروك علي قريبك وربنا يباركلو فيها يارب وفعلا انا بحترم العربيه دي قوي وحاسس ان هيا فعلا بعيده عن الانوس

**mina_ramsis** · 03-07-2007 12:27 AM

الف مبروك يا باشا و عقبال البى ام ان شاء الله

**ahmed1981** · 03-07-2007 02:33 PM

الله يبارك فيكم يا جماعة

نسيت أقول أنها من منصور شيفورليه إللي في شارع محمد فريد في مصر الجديدة
وهي فعلا فتح الشنطة وتانك البنزين (مش البنزيم :mrgreen: ) من الداخل

**hazem_khidr** · 22-07-2007 01:04 PM

عربيه ممتازه فعلا و انا حاليا بحاول اقارن بينها و بين الياريس علشان يمكن اشتريها تقسيط و روحت اتفرجت عليها امبارح .
اللي ما عجبنيش ان الكاسيت كومباكت مع التابلوه معني كده لا تعرف تغيره و كمان مفيش مكان تركب في سي دي او اي شئ اهو حاجه زي دي ممكن تخليني اصرف نظر عن العربيه بحالها

**mina_ramsis** · 22-07-2007 01:42 PM

بالتوفيق ان شاء الله يا استاذ حازم بس كنت عاوز اقولك حاجة الكاسيت بتاعها هو الكاسيت الاصلى بتاع العربية مش زى مثلا الماتريكس او حتى الالنترا الوكيل هو اللى مركب الكاسيت
( الالنترا ام 113 الف هى اللى فيها الكاسيت الاصلى بس )
و الكاسيت بتاع الافيو هو نفسه نفس الكاسيت اللى متركب عندى و هو كاسيت جبار بمعنى الكلمة و صوته نقى جدا بس مشكلته الوحيده انه مافيهوش سى دى و كان نفسى اركب سى دى بس الصراحة استخصرت افك كاسيت العربية الاصلى

**hazem_khidr** · 22-07-2007 01:58 PM

يا استاذ هوكو انت مش فاهم قصدي ايه.انا قصدي ان الكاسيت حتي ما ينفعش انك تشيله علي ما اعتقد و غير كده انا مثلا بريح دماغي و بحط اسطوانه عليها 100 اغنيه ولا 10 البومات او اكتر اقلب فيها قديم علي جديد و اجنبي علي عدويه :lol: كده يعني مش بثبت علي شريط واحد ف لقيت ان دي مشكله.ممكن احلها بقي اني اشتري MP3 و الشريط بتاعه و ابقي اغير الاغاني من الكمبيوتر كل شويه فكره حلوه متهيالي لسه جايه في دماغي حالا.
و الف شكر علي مداخلتك :lol:

**mina_ramsis** · 22-07-2007 02:38 PM

يا استاذ حازم انا تحت امرك انا فهمت قصدك بس الكاسيت بيتشتال عادى من التابلوه و شوفت ناس شايلينه بس طبعا حرام انك تشيل الكاسيت الاصلى للعربية اما بخصوص ال mp3 فالكاسيت فيه مدخل AUX علشان ماتحتاجش انك تجيب الشريط ده بس الصراحة انا مجربتهاش
اى خدمة يا استاذ حازم و بالتوفيق ان شاء الله