احكيلكم على حاجه غريبة جدا

كنت فى سوق السيارات بالامس الجمعه من الساعة 10 الصبح تقريبا و كنت رايح ادور على بى واى دى مستعمل و انا بعمل كده كل جمعه تقريبا من فتره

المهم انا كنت شفت عربية على موقع كونتاكت معروضه من حوالى شهر موديل 2012 و كان صاحبها عارضها ب 63000 جنيه و هى عاملة 30000 كم و فيها خبطه بالرفرف الامامى و لونها فضى و لما الفلوس جهزت معايا كلمته فقالى انه باعها و سالته عن ثمن البيع و قالى انها اتباعت ب 58500 جنيه

المفاجاه بقه انى لقيت العربيه دى اول ما دخلت السوق مع تاجر قاعد تحت شمسيه و معاه كذا عربيه انواع تانيه
فى الاول ما اخذتش بالى انها العربيه اللى كانت على النت و لما سالته عن التفاصيل و بصيت على العربيه عرفت ان هى دى نفس العربيه لما سالت عن سعرها فوجئت بيه بيقولى 68000 جنيه

يعنى عايز يبعها و يكسب فيها حوالى عشرة الاف جنيه

طبعا قلتله السعر ده بعيد جدا و انا عارف العربيه دى كويس و انك مشتريها من النت

فقعد يقولى العربيه لسه زيرو و فى الضمان و كلام التجار ده

فقلتله عموما نتقابل الاسبوع اللى جاى فى السوق و نشوف هتعرضها عليه بكام و سيبته و مشيت


بس الحقيقه انا اتصدمت عربيه صاحبها كان عارضها على النت ب 63000 جنيه و تتباع ب 58500 و التاجر يعرضها فى السوق ب 68000 جنيه كده كتير الحقيقه