يا تري لما نفول للزور دي ليها اي اضرار علي العربية؟ لأني علي طول بقول للراجل يفول للزور لكن بعد كدة قريت في كاتالوج العربية انك اول ما المسدس يفصل تشيلة!
عرض للطباعة
يا تري لما نفول للزور دي ليها اي اضرار علي العربية؟ لأني علي طول بقول للراجل يفول للزور لكن بعد كدة قريت في كاتالوج العربية انك اول ما المسدس يفصل تشيلة!
اللى اعرفه ان سواء بنزيت او اى زيت او مياه القربه متتمليش للاخر ..ومعرفش السبب عشان مفتيش
بس فى البنزينه بقيت اقوله فول من اول تكه
بتعمل ضغط على جوان طرمبة البنزين
مافيهاش اي مشكلة لان الزور والخرطوم مش هياخد اكتر من لتر بالكتير فبعد ماتمشي من البنزينة بيبتدي البنزين ياخد وضعة الطبيعي بعد مسافة بسيطة ولا فيه ضغط على الطلمية ولا اي حاجة
بس لا يصح إلا الصحيح المفروض اول ما المسدس يفصل كدة خلاص
بس طبعا عامل البنزينة بيعمل كدة علشان يوصل عدد الليترات لعدد صحيح
يعني حطلك 15 لتر و 7 من عشرة بيفضل يدوس على المسدس لحد ميوصلهم 16 لتر
معتقدتش انها مشكلة جوان !!!
أنا شايف ان ضررها هى انسكاب البنزين على بوهية العربية
فول لاول تكة بس عشان لازم يبقي في هو داخل التانك ميبقاش الضغط زيادة جوة التانك وشكراااااااااااااا
اعتقد ان مدام مش للاخر جدا عادي
أي خزان وقود بيكون له فتحات تهوية كأمان وخزانات العربيات بنلاحظ إن فيها تهوية من مكان تزويد الوقود عشان الأجواء الحارة والشمس والحرارة المنعكسة من الأسفلت وبالتالي لما نملاها للزور يبقى مفيش انابيب التهوية لأبخرة الوقود مسدودة بالبنزين وبالتالي كأنك حاطط بنزين في زجاجة محكمة الغلق وطبعا لو عرضتها لحرارة او جو الصيف بالذات في بلادنا ممكن والعياذ بالله يؤدي لانفجار
كل الفكره في ان في الحر البنزين بيتبخر ويتمدد وغطا البنزين محكم الغلق فلو مفيش مجال لبخار البنزين انه يطلع بيبقى في خطر انفجار...
فقط...
بالنسبه للميه الخضراء مبتتمليش فوق الماكس عشان هيا بتتمدد بالحراره وبتزيد فبندي مجال للزيادة دي...
تحياتي
Sent from my Xperia Arc S using Forum Runner
طيب انا عندى ما بين فصل المسدس والزور ما لايقل عن 10 لتر اخرى يعنى بعد ما بيفصل اول تكه اقولو كمل للزور يستمر 10 لتر اخرى ودى بتفرق معايا 100 كيلو وخاصه فى السفر بس طبعا وجهه نظركم تحترم لان كده ضغط العازات ال فى التنك كبيره والحراره عاليا او حادث لا قدر الله
10 لتر؟؟ كتير قوي قوي
اعتقد في حاجة غلط فى الموضوع .. بس معرفش علشان مفتيش
انا عندي بيبقى الفرق اخره 2 لتر يوم ما يكون الراجل ملى العربية على الاخر خالص
بس بصراحة انا مبسوط بالمناقشة دي علشان استفدت منها جدا
بفول لغايه اول تكه و انا فى القاهره دائما بحط ل 50 جنيه و اعبيها
فى السفر بفول لغايه الزور لأنه بيفرق معايا حوالى 7 لتر بتفرق فى الطوالى
بس الكلام سليم تماما ان تمون لغايه اول تكه
فى سبعه لتر كمان اهو اقرب منى انا عشره لتر بالظبط وبتفرق مائه كيلو وبعدين يبدا المؤشر يتحرك عندى لاسفل
بيبوظ طلمبة البنزين و عوامة البنزين عن تجربة.
أنا مش بفول لحد الزور بس عندي ملحوظه. لو التنك مش مليان للأخر فباقي المساحه فيها هوا والهوا بيشغل حيز من الفراغ زيه زي أي سائل أو صلب فموضوع ان ملو الخزان للأخر بيكتمه ده مش منطقي. لو مليت ازاه لنصها ميه والباقي فاضي وضغت عليها الغطا هيطير زي بالظبط لما تكون ماليها كلها ميه وزي بالظبط لما تكون ماليها كلها هوا.
الضرر اللي أنا بفكر فيه من ملو الخزان للأخر هوه عوامه البنزين اللي بتبين حجم البنزين في الخزان لأنها بتبقى عايمه فوق البنزين زي عوامه كومبينيشن الحمام كده وأنا مش عارف هيه هتروح فين لما يكون الخزان مليان على أخره أعتقد هتبقى لازقه في سقف التنك وممكن مع التكرار تبوظ. ده مجرد تخمين مش أكتر وياريت نلتزم بفصله المسدس لأن حتى لو مش عارفين السبب المؤكد فهيه موجوده لسبب.
وعلى فكره المرات القليله جدا اللي فولت فيها بعد فصل المسدس كان التنك بياخد 5-7 لتر زياده يعني أكتر من 10% من مساحه التنك.
انا شايف انها مفيهاش اي مشكلة و ذلك للاسباب التالية
1- عمري ما سمعت عن عربية تنكها انفجر عشان مفولة وواقفة في الشمس
2- في حاجة اسمها فايظ اكيد الكل عرفه كما ان دا جزء من سيستم في التانك مسؤول عن الحفاظ على مستوي ظغط التانك
3- في العربية قدام عند الموتور جزء كده شبه الاسطوانة بيبقى في بطن الحوض في الهوندا مش عارف في العربيات التانية فين . الجزء ده مسؤول انه ياخد البخرة من التانك و يحولها لبنزين سائل و يعادل الضغط
4- التانك عمره ما يتشبه بقزازة الميه المقفولة عشان التانك ده حاجة و ده حاجة
5- السيفيك عندي عدادها ديجيتال و لو فصل مع اول تكة بيتبقى شرطتين فاضيين لو قلتله يكمل بيتملوا و مبتجبش كل الشرط الا لما تكون عالزور . معنا كده ان اليابانيين عاملين حسابهم ان العداد يشوف الجزء ده من التانك .
دا رائي الشخصي بصراحة و ممكن يكون غلط بس انا بقالي 10 سنين في كذا عربية بفول للزور ولا اي حاجة حصلت
عيبها الوحيد بالنسبالي انه لما بيقعد يشعر بالمسدس عشان يملا الزور بحس ان العداد بيهيس و بيحسب فلوس عالفاضي (في بعض البنزينات)
تحياتي للجميع
معلومات قيمة فعلا. المفروض يبقي في تعليمات للعاملين بالموضوع ده او حتي يكون مكتوب في البنزينة زي ما بيكتبوا علي استعمال التليفون و السجائر.
انا عندي فرق 10 ليتر بين اول تكة و الزور
أنا عادة بافول للآخر عشان أمشي مسافة أطول قبل ما أفول تاني. وعمري ما حسيت بأي مشكلة من موضوع التفويل دا على مدى أكتر من 10 سنين. أنا شايف المشكله الوحيده في موضوع التفويل إن العامل ممكن يوقع شوية بنزين بره التانك يضايقو أو على جسم العربية. زائد طبعا إن الكام جنيه الزيادة دول برضه بيضايقو :). بس عمليا منتا واحد بيهم بنزين.
اللى جربته كتير واكتر من مره الواحد لاما يفول الصبح لاما باليل لا البنزين اما يكون سخن من درجه الحراره بيبقى اخف بكتر من وهو بارد وبيعمل مسافه اقل وعن تجربه لكن كل عربيه تنكها بيبقى فيه فايض ولو اتضغط هيهرب الهو من الفتحه او الخرطوم الرفيع اللى جنب فتحه التنك ودى مش بيخشها بنزين لانها بعيده عن الزور وبتبقى اعلى التنك للفتحه لكن العيب المعترف بيه فى التفويله ان لو الجوان مش محكوك طبيعى هيطير بنزين ويخلى العربيه بعد كل تفويله تطلع ريحه بنزين والضرر الوحيد ان العوامه بتطلع لاخرها فعداد البنزين بيقرا انه مفول قبل الاخر لان سوسته بتضعف لكن اول تكه مش مقياس انا عندى الكارينز بتاخد 13 لتر من اولضربه فبفول 10 بس ومع ذلك اى عربيه بتاخد بمجرد التشغيل من 250 جم : 500 فى الكاربرتير او دوره الانجكشن
ف ازمة البنزين دي بقوله جيب آخرها عاوز اشوف البنزين بيقع على الأرض و بفضل اهز العربية من عند الرفرف عشان العربية تاخد اكتر كمية بنزين ممكنة
انا اللي اعرفه ان فيه حاجه اسمها فايظ أو فايص المهم انه بيطرد الزياده يعني لو زودت هيطرده التانك وانت بتتحرك عشان هزة العربيه (عشان الناس متقولش مبنلقيش حاجه بتسقط من تحت العربيه لما بنفول للزور ليه)
مناقشه جميله جدا واستفدت بيها الصراحه ...انا عالطول بفول للزور ولاحظت ان فعلا المؤشر بنزل بالعافيه بعدها وده ممكن يكون دليل ان العوامه فعلا بتلزق فالتانك .. بس الايام السودا اللي احنا فيها دي بتخلي الواحد غصب عنه يملي للاخر