تقرير صيانة الـ 5000 (فرع العبور)
السلام عليكم ورحمة الله وبركاته
يوم الخميس اللي فات تم بحمد الله عمل صيانة الـ 5 آلاف
كنت حاجز قبلها بيومين عن طريق 16202 والمندوب سألني تحب تختار فرع معين؟ قلتله العبور
كان معاد الحجز 8:30 وبالفعل وصلت في نفس التوقيت بالضبط وكنت رقم 6
موظف الاستقبال (بشمهندس محمد) استلم مني العربية
وهو بيستلم مني العربية سألته ينفع أتابع الصيانة من جوه الورشة؟ قاللي لأ مينفعش خالص للأسف
قلت له اني عايز أغير زيت وفلتر لأن العربية بقالها حوالي 11 شهر فكتبها في كشف الصيانة
بالإضافه ان دواسة الفرامل ضعفت مع الوقت يعني مسافة الضغط بقت طويلة وكتبها في الكشف برضو
قالي إن شاء الله هتخلص على 10:35 وتكلفة تغيير الزيت والفلتر والمصنعية في حدود 400 جنيه
قلت له تمام مفيش مشاكل ، وقعدت في صالة الاستقبال مفيش نص ساعة وزهقت من التلفزيون اللي صوته عالي جداااااً
لأ والقناة اللي جايبينها تونسي ، قمت طلعت على الكافتيريا فوق أشرب حاجة
جت الساعة 10:30 روحت لبشمهندس محمد قلتله العربية خلصت قالي لسه وهنكلمك على الموبايل لما تخلص
بصيت في كشف الصيانه لقيت رقم المبوبايل ناقص رقم
طلعت بصيت برا لقيت العربية خلصت رحت بلغته قال لي أه هي فعلاً خلصت
التكلفة كانت 416 جنيه دفعتهم واستلمت العربية و دواسات هديه عليها كلمة Logan ومشيت
أول لما طلعت برا بفتح الشبابيك كلها لقيت واحد من اللي ورا ميبفتحش مهما حاولت
للأمانة الزرار كان محتاج ضغطة أقوى من الباقي بس كان شغال كويس قبل لما أوصل لهم
حاجه تانيه لاحظتها تربيط العفشة تمام والفرامل أحسن بكتير
بس وأنا ماشي وطيت الراديو سمعت صوت احتكاك خفيف من التيل الأمامي من ناحية اليمين
رحت نازل رافع العجل على الكوريك ولفيته بإيدي وفعلاً الصوت طلع منه
بكل هدوء رجعت وبلغت بشمهندس محمد وبكل ذوق خد العربية بنفسه ودخلها جوا الورشة وقعدت حوالي ساعة إلا ربع
والحمد لله كل حاجه اتظبطت واحساسي بالعربية بقى زي لما كانت جديده بس فرق ان الموتور مفتوح وصوته بقى أهدأ شويه.
آسف جداً على الاطالة بس حبيت أنقل تجربتي للإفادة