الموضوع: بفكر فى النترا 2010

المشاركة الأصلية كتبت بواسطة mans336

السلام عليكم ورحمة الله وبركاته
حاليا بدور على عربيه كويسه اشتريها ان شاء الله على اخر شهر 7
بفكر فى النترا 2010
عاوز اعرف كل حاجه عن العربيه
اول حاجه اكشف عليها فين ؟؟ انا مكانى فيصل
قطع الغيار ايه نظامها؟؟ متوفره جديد واستيراد ولا ايه؟؟ واسعارها ايه ؟؟
اخبار الثبات والوسع ايه؟؟
السحب بتاعها؟؟
سعر اعادة البيع ايه؟
ايه المشاكل والعيوب اللى فيها؟؟
وعاوز اعرف تبقى فى حدود كام لو حالتها نضيفه ان شاء الله

عليكم السلام ورحمة الله

انا هقولك بحكم ان معايا نفس الموديل من الزيرو لحد دلوقتي
انت قريب من ابو رواش اكشف هناك. وفي مركز اسمه توب جير في فيصل ممكن تكشف هناك برضه لأن الناس بتشكر فيه.

قطع الغيار متوفره جديد (اصلي و كوري) واستيراد كمان. الاسعار بتاعة الاصلي عاليه شوية يعني تيل فرامل امامي ب500 وشوية بعد زيادة الاسعار وقبل كان ب400. فلتر هوا ب135 اصلي. البوجيهات تقريبا ب120 مش متذكر.

بالنسبه للثبات مش حلو على سرعات اعلى من 120. اما اقل من كده كويسه وبتستجيب للمناورات (الغرز) كويس من غير ما تعوم. والوسع كويس جدا.

السحب ممتاااااز بالتكييف او من غير.

سعر اعادة البيع مش عارف بس الكوري عامة لو انت جايب اعلى فئه هتخسر في اعادة البيع اما لو جايب اول فئه مابتخسرش جديد. وده رأيي و الي لاحظته مش معلومه مؤكده.

العيوب:
لو بتحمل على العربيه او حتى ركبت معاك 2 او 3 اشخاص ورا العربيه بتهبط جامد
التوكيل مش حلو بس مراكز الصيانه الكويسه كتير
في عيب مشهور قوي في موديل 2010 بالتحديد وهو ان مكنة الازاز بتعمل دبه في الفتح والقفل. وانا غيرت المكنه قبل كده والجديده عملت نفس المشكله. وحصلت مع ناس كتير هنا في المنتدى معاهم موديل 2010 برضه.
مافهاش abs

الخلاصه لو حابب الالنترا رغم كل ده يبقى توكل على الله. هي عربيه حلوه رغم كل عيوبها.
اما عين العقل بيقول تجيب سيراتو موديل 2010 وهيكون فيها abs