نصايح مهمه عن الطريق الدائري...!!
طبعا الدائري ده مش مجرد طريق سريع .. الدائري اسلوب حياه
و اليكم بعض النصائح المهمه لقائدي الملاكي علي الطريق الدائري..
....الحاجز : الحاجز اللي في نصف الطريق ده مجرد شكليات..لأنه مش بيصمد امام اي حادث..و ممكن و انت ماشي علي الشمال تفاجأ بمقطوره او تريلا او حتي ميكروباص في الطريق المعاكس فقد السيطره...و تلاقيه علي حجرك..
و انت ماشي علي الشمال خالص ملاصق للحاجز..ستفاجأ بأجزاء من الحاجز منهاره علي الطريق..و لو كنت علي سرعه عاليه فلك حل من التنين..يا اما تكبس فرامل و ساعتها اللي وراك هايلبس فيك...يا أما ترمي يمين و ساعتها اللي وراك هايلبس فيك برضو..
و لو عربيتك خفيفه و ماشي علي مهلك..و حاجه سريعه عدت من جمبك..ممكن تلبس في الحاجز
الدروس المستفاده : امشي في تاني حاره من الشمال احسنلك..
....المقطورات او التريلات : السائق غالبا بيكون حاسس انه سايق موتوسيكل race و حاسس انه خفيف جدا و بياخد غرز بكل جرأه و بيكون واخد الطريق لحسابه..و في افضل الحالات بيكونوا سكرانين او مبرشمين..و ساعات تشوف صراعات بين تريلليتين و بيكونوا مش شايفين الطريق اصلا و كل همهم يسبقوا بعض..
الدروس المستفاده : ابعد عن المقطوره و غنيلها..
....السرعه : طبعا كل ما تكبس بنزين هاتوصل اسرع..لكن ممكن ماتوصلش خالص..سامع حد بيقول لي ده قضاء و قدر..
هو طبعا قضاء و قدر..و بالتالي لو لا قدر الله حصلت حادثه..لو مش قدرك الموت اكيد مش هاتموت..لكن مايمنعش انك تعيش مكسح طول عمرك..
الدروس المستفاده : اجري علي الطريق جري الوحوش..يا توصل يا تعيش مكسح..
....الناس : طبعا في كل منطقه سكنيه هتلاقي ناس بتعدي الطريق..الطريق طريقك و لو خبط حد مش لازم تجري..كده كده مفيش عليك مسئوليه قانونيه..اقف و شوف حصل له ايه..و لو عايز تعالجه هايكون ضميرك مستريح اكتر..و لو حد قال لك انت غلطان حط صباعك
في عينه عشان ده طريقك ( لكن برضو ياريت تركز و ماتخبطش حد )
....الميكروباص : لا يقل خطر عن المقطوره..و لو ولع لك النور العالي او كلاكس..ياريت توسع له عشان توصل وجهتك بسلام..و ابعد عن الميكروباص و غنيله..
منقول للافادة العامة