محتاج رايكم بسرعة فى الموقف ده

**Mahmoud Nagieb** · 18-06-2013 12:38 PM

السلام عليكم

صباح الفل يا رجالة

دلوقتى انا محطوط فى موقف وعاوز رايكم فيه بسرعة

انا كنت مسجل ف كورس بيرليتز انجليزى , كنت عامل تيست ودخلت على ليفيل 5 بيزنس

المهم المفروض الجروب كان يبدا الثلاثاء اللى فات , واجلوه للثلاثاء النهاردة , قولت مفيش مشاكل

امبارح اتصلو بيا ياكدو عليا المعاد النهاردة , قولت قشطة

دلوقتى بقى اتفاجات ان واحد من بيرليتز اتصل بيا , وقالى ان الجروب عاوز راحة اسبوعين , وهما عاوزين ياخدوا مع بعض , فعاوزين ياجلو الكورس اسبوعين

فقولتله ازاى ده مش اول مرة تتاجل

قالى حضرتك احنا معندناش مشاكل انك تبدا لوحدك ف الجروب لو مش عاوز تاجل معاهم , ومفيش اى زيادة عليك

وغالبا هيخش عليا بعد مرة او اتنين فردين معايا , يعنى هكون لوحدى اول مرتين تلاتة , لحد لما يخش معايا اتنين او واحد

فدلوقتى انا مش عارف اعمل ايه , ااجل , ولا اخد لوحدى , مع العلم ان الكورس محادثة

انا مش عارف هو لو هاخد لوحدى ميزة لانه هيعتبر كده مكثف لان مفيش غيرى هيتكلم ؟ , ولا يعتبر عيب لان مش هيكون معايا ناس كتير او هكون لوحدى

مع العلم انى فى اخر اجازة فى الكلية لان السنة اللى جاية بكارليوس هندسة ان شاء الله , وانا عاوز اخلص بصراحة من موضوع الانجليزى ده فى اسرع وقت ومش محتمل تاخير

ياريت اللى عنده رد يقولى بسرعة لان المفروض ارد على الراجل بعد شوية

**friendship7897** · 18-06-2013 12:48 PM

أعتقد تأجل
لأنه كورس محادثة
فكل ما كان جروب أكيد أفضل
وبعدين أنت داخل على جروب غالباً بدأوا مع بعض ونجحوا وكملوا مع بعض
وعلشان كدة متفقين أنهم ياخدوا أسبوع أو أسبوعين راحة
فأنت هتبدأ معهم بحساسية
وهتكون غير مقبول في وسطهم
لأن الإنطباعة الأولى تدوم ( على أساس أنك بوظت لهم فكرة الأجازة / أو أنك أناني حبيت تبدأ لوحدك / أو ما شابه )
وبالتوفيق إن شاء الله

**Mahmoud Nagieb** · 18-06-2013 12:53 PM

المشاركة الأصلية كتبت بواسطة friendship7897

أعتقد تأجل
لأنه كورس محادثة
فكل ما كان جروب أكيد أفضل
وبعدين أنت داخل على جروب غالباً بدأوا مع بعض ونجحوا وكملوا مع بعض
وعلشان كدة متفقين أنهم ياخدوا أسبوع أو أسبوعين راحة
فأنت هتبدأ معهم بحساسية
وهتكون غير مقبول في وسطهم
لأن الإنطباعة الأولى تدوم ( على أساس أنك بوظت لهم فكرة الأجازة / أو أنك أناني حبيت تبدأ لوحدك / أو ما شابه )
وبالتوفيق إن شاء الله

لا حضرتك هما كده كده هياجلو الكورس

انا اللى هبدا لوحدى وينضم عليا اتنين او واحد كمان ونبقى جروب لوحدينا

يعنى هنعمل جروب تانى , والجروب اللى كنت متسجل معاه هيبدا لوحده برضه بعد اسبوعين

انا بس محتار , لانى شايف انى لو قعدت اتكلم ساعتين وربع كل مرة لوحدى او معايا اتنين بس ميزة كبيرة

انا خدت قبل كده كورس وكان مع واحدة امريكان ناتيف وفادنى جدا الكلام الكتير معاها , بس كنت مع جروب 4

وفى نفس الوقت خايف انى معرفش اجارى الانستراكتور لوحدى لان ساعتين وربع انا وهو كتير برضه

بصراحة انا لحد دلوقتى مش عارف انها ميزة او عيب ؟

**mohamed_selim** · 18-06-2013 02:41 PM

ابدا و هيكون افضل لوحدك و بعد كام مره يخش معاك 2 تانيين ....

**Abdm** · 18-06-2013 04:22 PM

أنا أرشحلك البريش كونسيل فى البزنيس أو فى الجينرال .. مواعيدهم مظبوطة وليهم أسم جامد ومستوى عالى وما عندهمش نظام التأجيل على مزاج الطلبة دة كلة بالقوانين والنظام والمواعيد المحددة سابقا للكورسات ... لو مرتاح مع بيرلتس أنتظر لما المجموعة تكتمل .. وهى فرصة أنك تروح مصيف أو تغير جو أو تلعب شوية رياضة ..

والله الموفق والمستعان

**omar-saad** · 18-06-2013 04:42 PM

انا كمان باخد فى بيزلتز
هما نظامهم غريب شوية فعلا وساعات بيبقى مستفز
بس كا مكان هما كويسين جدا
واحستلك انك تستنى مجموعة كاملة وماتبقاش لوحدك
علشان يبقى فى نوع من المشاركة وهما بيعتمدوا على دة بشكل كبير فى الشرح
دا غير طبعا احساس المنافسة اللى بينك وبين الباقيين
علشان ماتكسلش فى المذاكرة
وبالتوفيق

**Ahmed_selmy** · 18-06-2013 06:42 PM

انا شايف انها ميزة لان كانك بتاخد درس خصوصى لوحكدك....عيبه انك مشحيضفلك افكار جديده يعنى انت اما تبقى مع مجموعه ممكن يفتح لك موضوع او اتنين او يغير طريقة الحوار لانه فكرمختلف.....انما لوحدك حيكون فكرك انت وبس.
خللى بالك فى تقطه ان كمان اسبوعين حيكون خلاص رمضان على الابواب يعنى حتلاقى لخبطه ووجع دماغ .
وربنا يوفقك.

**moudy88** · 19-06-2013 01:49 AM

انا عايز رأيكم في بيرلتز ..انا عملت تحديد مستوى عباره عن ان الانستراكتور سألني 5 اسئله اكلت ايه امبارح وروحت فين امبارح ولابس ايه دلوقتي وحاجات تافهه ...وفي الاخر قالي انت مستواك level 2 بصعوبه !َ!! وانا اصلا عملت تحديد مستوى قبل كده في البريتش وكنت في مستوى B بس كانت امتحان written ساعتين وانترفيو مع انستراكتور انجليزي !!!