الأخوة الأعزاء
مؤخراً بدأت ألاحظ صوت تصفير بيحصل فى الكاوتش اليمين الامامى لما الواحد بيسرع ( وهوه بيزود بنزين فقط ) وممكن مع المطبات
يا ترى ده ممكن يكون من إيه
هل ده ممكن يكون تيل فرامل ولا إيه
وشكراً لكم
عرض للطباعة
الأخوة الأعزاء
مؤخراً بدأت ألاحظ صوت تصفير بيحصل فى الكاوتش اليمين الامامى لما الواحد بيسرع ( وهوه بيزود بنزين فقط ) وممكن مع المطبات
يا ترى ده ممكن يكون من إيه
هل ده ممكن يكون تيل فرامل ولا إيه
وشكراً لكم
او زاوية عاوزة تتظبط
او كاوتش عاوز يتبص عليه
او طوبه صغيره دخلت جوه الجنط لو انت فركت مثلا
اعتقد لو تيل هتسمعها مع الفرمله مش مع دوسه البنزين
مقدرش احدد عمياني لأن التصفير له اسباب كتييير ممكن تيل فرامل و ممكن بلي و ممكن و ممكن
يا ريت لو توضح التصفير بشكل أفضل و الاوقات اللي بتسمعه فيها بالظبط
و العربية موديل كام و عاملة كام الف و اخر مرة غيرت تيل الفرامل و نوعه
العربية موديل 2002 مغير مكنة استيراد مشيت بيها 21 الف كيلو , كنت مغير التيل من نص شهر 1 الى فات مش فاكر الموديل كان ايه بس هوا يابانى.
اه كان فى حاجه نسيتها برضه لما اكون على سرعة عاليه وادوس فرامل العربية بتحدف نحيه نفس العجله الى بيطلع منها الصوت , والجنط دا بيكون سخن اكتر من التانى
الصوت بيكون تصفير مستمر جاى من اليمين فى اخر الغيار التانى والتالت بس لما بشيل رجلى من ع البنزين بيختفى تماما حتى على السرعات
واحيانا بسمعه ع المطبات بس دا مش دايما وبيكون متقطع
والف شكر ع الرجالة الى ردت
الموضوع دا حصل بالمللى عندى
الموضوع كله ان دوشمة الفرامل بتاعة العجلة اليمين قافشة يعنى بتزق التيل و تفرمل لكن مش بترجع مكانها و دا بيخللى
1- التيل شبه مفرمل طول الوقت
2- يعمل حدفة يمين عند الفرملة المفاجأة
3- بيسبب سخونة للجنط اليمين
4- حمل زيادة على الموتور و استهلاك بنزين زيادة
5- يسبب تأكل سريع للتيل و الطنبورة اليمين
6- تأكل التيل اليمين هو اللى بيعمل صفارة مع البنزين لأن التيل متاكل و قرب يخلص فبيصفر
و الحل موجود فى اخر مشاركة فى الموضوع دا اللى كنت عملته ساعتها
http://www.nilemotors.net/Nile/265563-a.html
هتغير دوشمة الفرامل اليمين
و متنساش طبعا تغير التيل الأمامى
و طبعا مع تغيير الدوشمة زيت الفرامل هينزل فى الارض
فهتنظف دورة زيت الفرامل و تحط زيت فرامل جديد على نظافة و تاخد الهوا من الدورة بتاعة الفرامل
و "بالمرة" رجلش و صنفر الفرامل الخلفية لأن الراجل كدا كدا هيفك الطنابير الخلفية و هو بيعمل تنظيف لدورة زيت الفرامل
و متنساش تكشف على الطنابير الأمامية لأن احتمال ان الطنبورة اليمين تكون عاملة "شفه" يعنى متاكلة و محتاجة تغيير و لو كدا يبقى راجع على الموضوع دا علشان تغيير الطنابير و اخر الاسعار
http://www.nilemotors.net/Nile/345409-a.html
معلش على الاطالة لكن انا اجملتلك الحاجات كلها علشان تبقى عارف كل حاجة لو احتجت تعملها
سؤال تانى معلش عندى الكبالن اليمين بتطقطق وانا ماشى مستقيم هل دى ليها علاقه بالموضوع دا