السلام عليكم :)
انا مبقاليش كتير معاكوا فى المنتدى بس ربنا إللى يعلم إنى حبيت كل الناس إللى هنا وحاسس كأنى أعرفكم من فتره طويله :)
فبالتالى انا حابب أحذر كل الناس إللى هنا من محل قطع إستيراد إسمه تقريبا ( عباد الرحمن ) بس الأكيد إن صاحبه إسمه أيمن .. المحل ده مكانه فى شارع اللبينى ( طريق النفق إللى قاطع شارع الهرم وفيصل بالعرض .. االمحل ده فى طريق النفق بس إتجاه فيصل ..
التجربه الشخصيه :
أغلبكوا عارف إنى مسقط موتور 2000 2e وإن المفروض أستلم العربيه إنهرده إن شاء الله
لما إشتريت العربيه .. إللى باعها ليها قالى إنها 1600 cc وبما إنى مش خبير وبما إن صعب إن حد يعرف الموتور كام cc بالنظر وبما إن إللى باع ليا العربيه مسقطه من اقل من 3 شهور فا مكنش مثبوت عالرخصه لسه وإللى مثبوت عالرخصه موتورها القديم إللى هوا 1300 cc
المهم إستلمتها ودفعت ونزلت بضعت شويه حاجات للعربيه وطلعت عالميكانيكى .. بقوله العربيه انا لسه مستلمها اهه بس سحبها مش حاسه 1600 cc خالص !!
فتح الكبوت وراح مدينى أحل قنبله فى وشى ( مين قالك إن ده موتور 1600؟ )
طبعا انا تنحت أحلى تتنيحه ومن هنا لهنا وبعد ما كلمت إللى باعلى العربيه وجالى نكتشف إن محل قطع الغيار بتاع الكائن إللى إسمه أيمن ده ضحك عليه وباعله موتور 1400 على أساس إنه 1600 !!
خلص الكلام وإتفقنا فى الآخر إن أيمن ده حياخد الموتور ويدينى 1500 جنيه بس صمم إنه يتحل عنده مش عند الميكانيكى ( مع إنه عارف الميكانيكى إللى بتعامل معاه وبيشكر فيه جدا ) انا محتطش فى دماغى وقولتله ماشى قشطه مش مشكله .. الكلام ده كان يوم سبت وإتفقنا إنه حيتحل يوم الإتنين .. يوم الأحد لقيت الميكانيكى بيتصل بيا وبيعرفنى إن التانى مصمم الموتور يتحل عنده علشان حيقلب كل حاجه فى العربيه ويسيبها حتة صاجه علشان هو عارف إنى مش فاهم حاجه .. ملحوظه الميكانيكى يعرفه كويس بس فى نفس الوقت هو يعرفنى من زمان والحمد لله إنه بيعزنى .. لولا كده كان زمان إتعمل معايا السليمه
المهم نرجع للكائن إللى إسمه أيمن .. فكرنا فى حل وقولت للميكانيكى طيب تعالى معايا وهو بيحل الموتور وأكيد مش حياخد حاجه زياده قدامك قالى مش حينفع علشان فى بينى وبينه شغل والكلام إللى قولتهولك ده المفروض إنى مكنتش أقوله بس انا عارف إنك مش فاهم حاجه وإستحرمت النصب إللى حيتعمل عليك .. الخلاصه علشان مطولش عليكم علشان الموضوع كان ليه تفاصيل بالعبيط وطول .. لو حد حب يتعامل مع الكائن النصاب إللى إسمه أيمن أو مع محله أرجوكوا ياإما تكونوا خبراء وبرضوا عنيكوا تبقى فى وسط راسكم ياإما تاخدوا معاكم خبير وتكونوا بتثقوا كويس فيه
انا والله مش بحب أبقى مؤذى لحد فى أكل عيشه بس أكيد مش ححب إن الناس يتنصب عليها وكل واحد بيبقى تفحان الدم فى كل قرش بيجيبه
السلام عليكم :)