الموضوع: سؤال بخصوص توكيل العربية ونقلها مرور اخر

المشاركة الأصلية كتبت بواسطة joe_techno

بص انا زيك بالظبط و عملت الحوار من شهر و يؤسفني اقولك اني اتبهدلت و روحت المرورين 7 مرات بس انا كانت رخصتي منتهية و هقولك الخطوات بالتفصيل :
1- هتروح مرور النزهة تعمل شهادة بيانات للتسجيل في الشهر العقاري و تعمل شهادة مخالفات و تخلي بالك ان التوكيل مكتوب فيه انه مصرحلك بالتعامل مع المرور
2- تطلع علي الشهر العقاري لتسجيل العربية
3- تروح مرور السلام تخش علي الفحص الموظف هيكتبلك انه مطلوب مطابقة بصمة من مرور النزهة و متقفش لحد يقولك هخلصلك الورق لانهم شوية حرامية و بعدين تختم نموذج الفحص و تشتري الطفاية ( لو طفايتك عدي عليها 5 سنين ) و تعمل التامين الاجباري و تمشي
4- ترجع مرور النزهة تعمل مطابقة بصمة ( دي لوحدها يوم من اولة )
5- ترجع مرور السلام تقدم مطابة البصمة هيفحصلك العربية
6- تشتري نموذج نقل ملكية و تصور البطاقة و الرخصة القديمة و تدخل علي شباك نقل الملكية هيقدرلك الضريبة و تدفع في الخزنة و ترجع تاني الشباك تديلة الوصل و تستني الرخصة هييديلك تصريح مؤقت 6 شهور لحد ما الملف ييجي من مرور النزهة

ملحوظات:
1- تخلص القصة دي قبل ما شهادة المخالفات و الرخصة ينتهو
2- تروح في يوم غير السبت
3- تعمل حسابك اني مفيش حد بيخلص حاجة من غير فلوس

ربنا معاك لو احتجت نمرة تليفوني او حتي اروح معاك انا تحت امرك

+1

- الفرق إنك مش هاتحتاج تعمل شهادة بيانات بإذن الله لأن رخصتك سارية ...

- حاجة مهمة تاخد بالك منها لأني شوفت مهندس بيتلكك عليها لواحد في مرور فيصل من إسبوع كدة ... وهي إنك لما تاخد ورق البمطابقة من مرور السلام المهندس هاياخد رقم الشاسيه على ورق المطابقة نفسه لكن رقم الموتور بياخده على ورقة بيضاء صغيرة ويلزقها بعد كدة على ورق المطابقة ... اللى لازم تاخد بالك منه بقى إن لازم تخلي الضابط يختم على الورقة البيضاء اللى عليها رقم الموتور بختم النسر

- مش هاتحتاج حاجة من مرور النزهة بإذن الله غير إنه بيقارن ورق المطابقة اللى انت هاتجيبهوله من مرور السلام مع اللى مسجل في ملف العربية ويكتب كدة على الظهر ويختم عليه فقط

- بعد كدة هاترجع بقى مرور السلام وتكمل في الإجراءات عادي وربنا يسهلهالك من عنده

- رسوم التسجيل تقريبا قرب الألف أو أكتر حاجة بسيطة بس كام بالتحديد .. هم عندهم جدول بيختلف من عربية لعربية حسب المسجل لديهم بس الـ 1600 تقريبا مش هاتعدي الحدود دي

- مش هاتحتاج تغير نمر العربية بإذن الله طالما بتنقل جوة نفس محافظة القاهرة

- طالما لسة الملف مش في المرور ... هاتاخد تصريح مؤقت لمدة 6 شهور غالبا بتجدده تاني (معرفش إيه الإعجاز اللى بيعملوه في عملية نقل الملفات عشان تاخد الوقت ده كله) لغاية ما الملف ييجي ...

وعلى فكرة النقطة دي مالهاش حل هو ما يقدرش يدي رخصة دائمة من غير ما يكون الملف بتاع العربية عنده حتى لو عملت إيه ... لازم تصريح مؤقت لغاية ما الملف ييجي ... ولو حصل حاجة غير كدة أكيد مش هاتكون مضبوطة .. لأني زي ما قلت ما ينفعش يطلع ترخيص دائم من غير ما يكون عنده ملف العربية