العربية عطلت مني انهارده ودرس مستفاد لعدم التكرار مع اي شخص تاني

**mohammadrashee** · 20-06-2013 11:19 PM

السلام عليكم
اخواني الكرام انهارده كنت ماشي بالعربيه تويوتا ياريس ومره واحد ه الساعه 12و نصف ظهرا العربيه بطلت مني
حاولت اني اعرف العيب منين بس كان واضح انه من البنزين العربيه قاطعه بنزين
المؤشر في الياريس ديجيتال يعني شُرط والعداد قاري شارتطين يعني فيه فوق 10 لتر بنزين
حاولت اعمل حاجات كتير بس بصراحه معرفتش
اتصلت بمركز خدمة تويوتا في 6 اكتوبر عشان انا كنت جنبهم في المصانع رد عليه مهندس الاستقبال وقالي اقطر العربيه وتعالى
قولتلوا ازاي ديه اوتوماتيك يعني متتقطرش
قالي بكل عنطزه ما هو اإن معمول عشان القطر
قولتله لأ الفتيس يبوظ عشان دورة الزيت مش طلمبة
قالي مفيهاش حاجه
المهم انا عارف انه غلط بس مش عارف اعمل حاجه
ربنا كرمني بواحد عارفني معدي بالصدفه
قالي أأقطرك لغاية هناك
طيب معاك واير قالي لأ لسه سايبه من يومين في عربيته والده
طيب نعمل ايه المهم اتصلنا بسواقين نقل تقيل لقينا في عربيه جمبهم راح جاب منهم سلب
وقطرني لغاية المركز مش عارف ليه شكيت ان العربيه مفيهاش بنزين مش عيب طلبمه
المهم اول ما وصلت المركز قولتلهم عندكو بنزبن قلولي لأ
قولت ماشي اسحب يا عم من العربيه اللي قاطراني معلش يا عم احمد
احمد ده اللي قطرني هههههههه
المهم سحبنا بنزين البطاريه نامت
نسيت أقول اني لما وصلت المركز البيه اللي قالي العربيه ممكن تتقطر اللي هو مهندس الاستقبال كان مشغول وقال للشيخ حسن اللي هو الصنايعي وهوه عشره على عشره يستلم العربيه الحمد لله
سألت الشيخ حسن هو الأوتوماتيك تتقطر قالي لأ طبعا قولتلوا اصلوا قالي كذا كذا قالي لأ طبعا
سيبتهم بعد البطاريه نامت ومشيت عشان كنت مشغول جدا
اتصل بيا الشيخ حسن وقالي العربيه دارت الحمد لله قولتله ايه المشكله قالي مفيهاش نقطة بنزين
ازاااااااااااي ده لسه فيها شرطتين قالي ممكن تعلق عادي
رجعت المركز لقيت مهندس الاستقبال في وشي قولتلوا ايه الخبار قالي الفلتر اتسد من الوساخه واحنا نضفناه وعايزين نغيره روحت مره واحده صرخت في وشه قولتله ليه ده لسه جديد
قالي ما عشان كده مغيرناهوش
فطست على روحي من الضحك هتعرفوا ليه
دخلت للشيخ حسن ايه الأخبار يا شيخ قالي الفلتر اتسد ونضفناه بس هو ضعف قولتله ازااااااااااااي ده لسه جديد راح قالي مش ممكن انت اكيد مغيرتوش بقالك كتير ده مش جديد
قولتله فيك مين يكتم السر قالي قول
قولتله انا مغيرتش الفلتر من الزيرو وانا معدي 150 الف قالي وشكل البوجيهات برضه عايزه تتغير
صرخت في وشه قولتله حراااااااااااااام ده انا لسه مغيرها مكملتش 70 الف ههههههه
الراجل بصراحه كان هتجيله صدمه نفسيه وعصبيه وكل حاجه وقالي وصوته بيحشرج ده احنا بنغيرها كل 20 الف
المهم الدروس المستفاده

خلي بالك من كام كيلو انت عملته بجانب قراية المؤشر
اوعى تقطر عربية اوتوماتيك
لو رحت مركز الخدمه اللي انا رحته خلي الشيخ حسن يستلم العربيه منك هههههه

وعلى فكره اكتوبر انهارده مكنش فيها بنزين من المصانع لغاية بنزينة كالتكس اللي بعد مول العرب وانت جاي من المحور خلي بالكو

**Eng_Mostafa_89** · 20-06-2013 11:49 PM

ونسيت تكتب حاجة تانى مفيد لازم تخلى معاك فى العربية وير علشان القطر

**Land_Cruiser** · 20-06-2013 11:59 PM

احب أضيف نقطه برضه مهمه و هي ان حضرتك تخللي معاك رقم ونش إنقاذ تبع بنزينه معروفه او حد اتعاملت معاه قبل كده لان ده بينفع قوي في المواقف اللي زي دي خاصه لو كانت العربيه اتوماتيك او جر رباعي و انصح ان محدش يستخدم الارقام اللي بتبقي مكتوبه علي الجدران و علي الأسوار في المحور و غيره لأني سمعت تحذير ان الارقام دي ممكن تكون بتاعه لصوص سيارات حضرتك تكلمهم علي انهم ونش إنقاذ فيأتوا إليك لما تكلمهم لكن علشان يسرقوا العربيه و لذلك خللي معاك رقم حد مضمون للطوارئ اللي زي كده و ربنا يكفينا و إياكم شر الطريق

**M I D O** · 21-06-2013 12:38 AM

هههههههههههههههه والله العظيم الناس دي بتستهبل معلش يا باشا قد الله وما شاء فعل كويس ان حضرتك بخير ودة المهم و الحمد لله انك مكانش معاك حد من البيت كانت هتبقي مشكلة

**hossam_elwani** · 21-06-2013 01:13 AM

ياجماعه القطر ده يبقى للشديد القوى بس لانه مع الشد والجذب بيغير ابعاد العربيه وممكن تحتاج زرجينه بعد كده لا قدر الله

**janagabr** · 21-06-2013 01:18 AM

ضحك السنين
كتر خيره المهندس حسن وسلملي علي اسطي الاستقبال
جزاك الله كل خير علي الافادة

**janagabr** · 21-06-2013 01:23 AM

طاب هو ايه المشكلة ان العربية تتقطر طالما لفتيس علي n

**aldesha989** · 21-06-2013 01:32 AM

ياعم 150 الف ايه بس انتا بتهزر ده لسه بحاله الفبريكه حرام عليك يا اخى مش حاسس ان الفلتر لسه جديد ورايح تغير يا جدع كمل بيه ربع مليون كيلو ولا حاجه ههههههههههههههههههههههههه ههههههههههههههه

وكمان البوجيهات 70 الف والله كتر خيرهم ياعم