الموضوع: تجربه قياده ix 35

المشاركة الأصلية كتبت بواسطة TeMoON

انا عارف ان الكلام الى هقوله دا مش هيعجب مالكى الهيونداى ومحبى الهيونداى بس دا راى الشخصى وعارف انى هتهاجم من الاعضاء بس دا راى الشخصى بعد التجربه
اخويا اشترى ix 35 وقولتله بلاش لانها مش عجبانى لانى شايف انها غاليه عالفاضى فا هو اشتراها ومازلت معترض عليها حتى الان فا اخدت العربيه منه قولت اجربها جايز اغير راى فيها واخدتها وطلعت مشيت بيها مشوار بسيط مش كبير بس اكتشفت بعض الحاجات الى فيها وما عجبتنيش منها
الخامات المستخدمه فى الداخل بلاستك زى الزفت فى التابلوه والدركسيون
بردو ماعجبنيش شكل التابلوه بالاضاءه بصراحه حاسس انى راكب تاكسى او ميكروباص من الاضاءه الابيض فى الازرق الى عاملينها
جريت بيها بس مش بسرعه اوى حسيتها خفيفه
ما عجبنى بردو ارتفاع الكرسى عن عصايه الفتيس ودى حاجه رخمه اوى ضايقت فيا وانا سايق
فا دى الحاجات الى اخدت بالى منها على السريع
انما من مميزاتها
الى حد ما مريحه فى الكرسى
التكيف فيها حلو
الفرامل عشان جديده حلوة انما لسه ادام ماعرفش هتعمل ايه
عاليه عن الارض
من داخل الصالون المساحه الداخليه حلوة يعنى انا حسيتها اكبر من الاسبورتاج من من ورا


بس بصراحه فى الاخر هى ماعجبتنيش واحتقرتها جدا وشايف انها غاليه على البلاستيك الى فيها وقولت اجربها عشان اجايز اكون غلطان واغير راى فيها لما جربتها تمسكت براى اكتر مع العلم
ان انا من محترمى الكيا ريو الهاتش باك لانها عربيه كويسه والريو من الداخل افضل من ix 35 والسيراتو الشكل الى قبل الجديد بردو حلوة واحسن منها من جوه عشان محدش يقول انى بتحامل على الكورى فى كلامى بس انا نقلت ليكم وجهه نظرى الشخصيه وتحتمل الصواب وتحتمل الخطا لاى شخص اخر انما بالنسبالى انا شايف انها صواب ومن الاخر انا مسمى العربيه دى (كنبه)

سيدى الفاضل، يا ريت تسمح لى اتناقش معاك بشكل حيادى فى تقييم الix35 ودى موش علشان انا خبير ، لاكن علشان انا مجربها طوال 3 شهور و2500كيلو داخل وخارج المدينة وطريق العلمين الساحل (يعنى متهيالى اقدر احكم صح بنسبة كبيرة).
فى البداية،خلينا نتفق على الاتى:
1- رأيك صواب يحتمل الخطاء ، وراي خطاء يحتمل الصواب.
2- لولا اختلاف الاذواق لبارت السلع.
3- لا انا ولا انت لينا مصلحة مع غبور ولا غيرة، ورأينا وفقاً لوجهة نظرنا وفى حدود معرفتنا.
اولاً/ واضح ان سيادتك قافش من العربية من الاول، ودى عادى (مسالة اذواق واراء)، وعلشان كدة متهيلى ان الموضوع دى لة تاثير على حكمك عليها، لانك رافضها من قبل ما تركبها، ولما ركبتها (موش طايقها)، وشايفها كلها غلط وحتى الحاجة الشايف انها كويسة(الفرامل)برضة شككت فيها ((الفرامل علشان جديده حلوة انما لسه ادام ماعرفش هتعمل ايه)).
ثانياً/ سامحينى ، من كتر الشتيمة والعيوب القلتها على العربية (بعد مجرد مشوار بسيط ) انا شاكك انك بتتكلم عن عربية تانية ، او انا الراكب عربية تانية وموش واخد بالى.
خلينا نفترض ان اخو حضرتك اشترى الix35 ومسمعش نصحتك، وانك جربتها وطلعت كنبة.
حضرتك قلت ان الخامات المستخدمه فى الداخل بلاستك زى الزفت فى التابلوه والدركسيون ، ياريت حضرتك تحدد اكتر يعنى فين البلاستيك وال زى الزفت ال فى التبلوة والدركسيون (سيبك من ان الدركسيون اساساً جلد).
ولما حضرتك تحدد، ياريت تقولى الحاجات الحددتها شكلها اة فى العربيات التانية (فى نفس الفئة) زى الاسبورتاج، والقاشقاى ، الاكس تريل ، الجوك، الفيتارا،
بالنسبة لموضوع خفيفة ! خلينا نعمل بالمثل البيقول ((اسأل مجرب ولا تسأل طبيب))،،،،،
انا لسة راجع من الساحل، وجربتها على طريق العلمين على سرعة 160 كيلو ، موش عارف اقول لك اة؟
سامحينى تانى ، انت متأكد انك جربت الهيونداى الix35
فى النهاية راى حضرتك يحترم، وان كنت شايف انك متحامل على العربية شوية، يعنى هى عربية اكيد موش كلها صح ، بس بيتهيالى انها موش لدرجة خامات زى الزفت وخفيفة وفرامل مشكوك فى امرها وانك تحتقرها جداً.
يا اخى الفاضل العربية مع ناس لسة شاريها ودفعة فيها كتير، اضعف الايمان باركلهم فيها ، وكفاية تقول انك محبتهاش، موش لاقى نفسك فيها ، خصوصاً وان حكمك مبنى على رأى وليس عن تجربة .
اشكرك والله يبارك فيك.