زي ما العنوان بيقول كدة..

العربية ماشية معايا زي الفل الحمد لله..

لسة رايح امبارح الصبح التوكيل أعمل صيانة ال 5000

ناخد الحكاية واحدة واحدة:

اتصلت يوم الأربعاء حددت موعد الخميس 9.30 صباحا في التوكيل فرع سموحة - الاسكندرية.

روحت في الميعاد ودخلت في وقتها استلمت مني مهندسة (مسألتش علي اسمها) العربية وكان فيه ملحوظتين فقط:
1- فيه صوت طقطقة في دواسة الفرامل لما تضغط للآخر وظهر بعد ما فرملت فجأة ف مرة عشان أفادي عربية.
2- البخاخات الأمامية مستواها عالي علي زجاج العربية والمساحات.

العربية دخلت وانا دخلت كوستا بابص ع العربية من الزجاج من بعيد حبة ولقيت اسمي اتنادي عشان استلم.. طلعت لقيت العربية مركونة برة !! أخدت المفاتيح من الأمن ومن النظرة الأولي تلاحظ الآتي:
1- مافيش حد يسلمني العربية
2- فيه طقم دواسات ادوهالي هدية (معرفش دا عرض ولا ايه)
3- العربية مامشيتش عليها فوطة ولا اتمسحت ولا اي حاجة
4- التكييف شغال علي 2 مع ملاحظة اني مسلم العربية والتكييف مش شغال
5- ماحدش حتي كان مكيس الفرش وهم شغالين عشان مايجرالوش حاجة أو يبقع من شحم أو زيت (أي عربية ف توكيل منصور شيفروليه بيكيسو الكراسي والدركسيون قبل دخولها)
6- الملحوظتين ماتعملش فيهم حاجة.

رجعت جوة تاني ناديت المهندسة وقولتلها ان مافيش حاجة اتحلت!! جربت الملحوظتين بنفسها وركبت هي عشان تدخل العربية من ورا ع الورشة علي طول.. دخلت وراها لقيت واحد بيجعر ورايا عامل فيها أبو زيد الهلالي بيقولي بكل قلة احترام
هو: بتعمل ايه هنا
أنا: مع المهندسة
هو: ممنوع حد يدخل هنا (كان الأولي يسأل المهندسة بدل ما يتكلم بالطريقة دي)
أنا: مالتفتلوش ولا كلمته
هو: يا استاذ... مش باكلمك ماترد..
أنا: انت مابتفهمش؟
المهندسة بسرعة: معلش والله يا باشمهندس ممنوع دخول العملاء الورشة
أنا: تحت أمرك

واستخدمت آخر حبة صبر عندي وطلعت أبص من بعيد.. المرة دي سيبت التكييف شغال علي 2 عشان ماحرقش دمي لو لقيته شغله من نفسه..

كمان 10 دقائق رجعتلي الباشمهندسة وقالتلي العربية خلصت.. نفس الفيلم الزبالة العربية برة وماحدش بيسلمهالي!! أما الملحوظتين:
1- الفرامل: شحمها بس هان عليه يضغط عليها كام مرة يوزع الشحم.. حاجة آخر قرف.. قعدت أنا كاركتلها دقيقة وزعت الشحم وضاع الصوت
2- البخاخات: ظبط اللي ناحيتي واللي ناحية اليمين زي ماهما!!

بصراحة لو رجعت تاني حاعمل مشكلة وانا مش بتاع مشاكل ووجع دماغ.. أنا باجرب الحاجة مرة وأعلم عليها وخلاص كدة. غير اني حاسس اني باتعامل مع صنايعية زبالة وحبة مهندسين هواه مش عارفين شغلهم (ده من واقع اني مهندس في شركة خدمية برضه).

ملاحظاتي الشخصية:
1- عند الاستلام: المهندسة خدت رقم العربية والحجز الخ وخدت بعضها وماشية! لولا اني ناديتها عشان أقولها ع الملاحظات ماكنتش سألت فيا!
2- مافيش أي نوع من أنواع النظافة أو الغسيل للسيارات!
3- ازاي عربية تدخل وتطلع مرتين ومافيش مهندس عاوز لا مؤاخذة يحرك ليته الكريمة يشوف أي ملحوظة اتعملت ولا لأ؟ ماهو يا المهندسين مش شايفين شغلهم يا مالهمش حكم علي الصنايعية.
4- اذا كان الصنايعي مش عارف يخلص ملحوظتين بالبساطة دي في مرتين تدخله فيهم العربية امال حايعمل ايه في عطل أو حاجات كبيرة؟ وده اللي خلاني خايف أرجعلهم العربية تاني؟
5- ازاي يبقي مسموح للصنايعي يشغل التكييف أو يملس أي حاجة ف العربية بالسهولة دي؟

وفي الآخر أنا ان شاء الله صيانة ال 10 حاعملها في برج العرب.. لو طلع زيالة هو كمان حاقدم شكوي في الفرعين.


آه نسيت أقول.. تاني مرة وانا طالع أشوف العربية لقيت التكييف علي 3!! زي ما تكون عملية عند ليس الا!