تجربة شخصية لقيادة الواجا الأوتوماتيك
الواجا
المواصفات
موديل 2007
1600 أوتوماتيك
تكييف – سنتر لوك – زجاج كهربائي – مرايات كهربائية – سينسور خلفي – ضوء ضبابي
القيادة
استمر ثبات واتزان العربية فترة طويلة جدا .. مع أحساس الواحد برفاهيتها وسهولة الحركة والانسيابية بين العربيات .. وخصوصا داخل المدن والإشارات يمكن بحكم أنها أوتوماتيك ..
لكن سقتها علي طريق كفر الشيخ الفردى .. وده طريق مشكلة علشان اتجاهين .. فيبان ثبات العربية قوى خصوصا وأنت بتسوق وسط عربيات ميكروباس .. حافضين الطريق .. وبيجروا بسرعة جدا .. و ياويلك وأنت بتجرى منهم بالليل كمان بالذات .. بس حسيت والحمد لله في الأختبار العنيف ده بمدى ثبات العربية .. ودى تتحسب لها ..
الاضاءة ..
أَضاءة الضباب مدهشة جدا .. خصوصا في الطرق الضلمة لأنها ممكن تظهر المطبات ووعورة الطريق .. لكن باقي الأضواء بتاعتها مش بالقوة إللي تغلس بيها علي السواقين الثانية علشان تخليهم يطفوا العالي بتاعهم .. وأظن أنها أكيد مش أضاءة زنيون .. ( والله أعلم ) ..
السرعة
عادية جدا في السرعات المتوسطة ورائعة في وسط البلد في الهجمة بتاعتها .. يعني من الثبات ..
لكن في السرعات العالية .. مشكلة جدا و بتاخد وقت في النقل من 110 إلي 130 .. ثم من 130 إلي 150 ثم من 150 إلي 170 لأني ما عرفتش أعدى أكتر من كده ..
ومعني مشكلة إني بأحس بمجهود علشان أغير السرعات إللي أنا قلتها دى ..
بس أول ما با أعدي السرعة .. بيبقي سهل قوى أني أطلع عليها تاني بسرعة .. ( جايز علشان الآوتوماتيك ) .. وبعدين أول ما RPM ما يعدى 4 بيبقي سهل أتحرك في السرعة العالية .. وقدرت أمشي فترة طويلة ( نص ساعة تقريبا ) علي 150 قبل ما أنزل السرعة وبعدين أرجع علي 150 ..
الفرامل
بتصفر صفارة خفيفة قوى أول مرة في الضغط عليها خصوصا لما أنزل من سرعة عالية .. وبعد كده ما بيحصلش حاجه ..
العفشة
بأحس أن العربية تقيلة .. وبأسمع تزييق خفيف لما بتتحرك من الثبات لأول مرة ...
التكييف
طبعا أنا عارف أنه لا يتم تقييمه في الشمس .. بس هو تكييف لطيف وغير مزعج ومش عالي .. يعني ما بتبقاش العربية ثلاجه زى ما بيقولوا .. وفي الشمس بأرفع المروحه إلي 3 لأن الغالب بتاعي أن التكييف بيبقي علي 2 .. مش أكتر من كده .. بس لو طلعت بره العربية خصوصا اليومين دول بأحس جدا بفرق التكييف ..
الزوايا
كانت فيها مشكلة أنها عايزه ضبط زوايا .. ودى حاجة استغربت لها جدا .. لأنها مفروض زيرو .. بس الحمد لله ضبطتها عند درش .. والحمد لله دلوقتي كويسة .. بس بأحس برضه أنها بتعوم سنة في السرعات العالية قوى زى 150 مثلا .. ( وبتعوم يعني بأحس إني لازم أبقي ماسك الدريسكيون ) .. ويمكن المشكلة دى سببها الحدفة لأنها لسه برضه بتحدف معايا يمين .. رغم أني ضبطتها عند درش .. وكانت 100 /100 علي جهاز الكمبيوتر بتاعه .. ودى إللي بيخليني أقول أن الموضوع غالبا تبديل كاوتش .. زى ما أخونا ميمو الحفناوى ما عمل .. وخصوصا أن درش قال أن المفروض يتم تبديل الكاوتش كل 10000 كيلومتر ..
الكماليات
طبعا كماليتها تحفه .. السينسور .. رائع فعلا .. وضبط المرايا الجانبية من الداخل .. والكاسيت CD حدث ولا حرج لأنه MP3 وده فارق كتير قوى عن CD العادى علشان عدد الملفات إللي ممكن تحملها علي الأسطوانة الواحدة .. فبدل ما تحط حوالي 16 أغنية مثلا .. ممكن توصل لأكثر من 100 أغنية .. كمان تقدر تحط القرآن كله علي أسطوانه واحدة بدل ما بتقدرش تحط سورة " البقرة " لوحدها علي أسطوانة أوديو .. المهم أن الملفات تبقي بأمتداد MP3 وتتحط علي الأسطوانة مباشرة .
برضه جهاز الإنذار ممتاز .. والسنتر لوك .. وموضوع غلق السيارة الأوماتيكي علشان لو سبتها لفترة طويلة وهي مفتوحة ..
وطبعا ما فيهاش مكنة رفع زجاج .. ( وده ممكن ينضاف في حدود 200 جنيه تقريبا والله أعلم لأني نسيت ) ..
وحجم الشنطة أكثر من رائع .. والأستبن مميز .. حتي الدواسات بتاعتها ..
الفوانيس
بصراحة مش حأتكلم عن الشكل .. لكن حأتكلم عن المتانة بفضل الله .. وأنا في أسكندرية .. وواقف في إِشارة وأسمع خبطة جامدة في العربية من ورا .. قلت بس راحت المركب ستميت حتة .. نزلت لقيت عربية تاكسي أسكندراني كانت عماله تنتش مع السواق وهي في إشارة مطلع .. فما قدرش يتحكم فيها راح خابط في العربية بتاعتي .. المهم بأبص لقيت قد إيه ربنا لطف .. والخبطة رسيت علي كسر في الفانوس الخلفي يمين لا يتجاوز قطرة 5 سم .. وباقي الفانوس محتفظ بكيانة .. يعني ممكن ألزق عليها ستيكر .. وأقفله علشان التراب .. وما أحتجتش أغيره .. والحمد لله .. وده يثبت أن بلاستيك الفوانيس ممتاز .. ويستحمل جدا ..
وعلي فكرة أسعار الفوانيس كنا أتكلمنا فيها قبل كده في مواضيع منفصلة عن أسعار فوانيس الواجا .. وهو في التوكيل يعمل 850 جنيه كامل .. وفي الخارج قالولي ( الصديق العزيز / محسن ) .. أن السعر يعمل حوالي 350 جنيه برضه كامل .. وقالو لي برضه أن ممكن ناس تعمل الوش ..
المتانة ..
بصراحة أكتر من مرة .. عربية تخبط فيها من ورا .. ( بوسه يعني ) .. زى ما بيقولوا .. ما بتأثرش بفضل الله في العربية .. وبرضه عربيات بتريح من قدام .. أو أنا بأريح عليهم .. والحمد لله ما بيحصلش حاجه .. بعكس أني ريحت مرة بعربيتي القديمة علي عربية لانسر وللآسف الأكصدام بتاعها اتطبق علي خفيف ( والراجل سامحني .. علشان ماحدش يقول حاجه .. ) ..
البنزين ..
الاستهلاك يتراوح ما بين 200 و250 في الصفيحة .. تبعا للطريق ..
الخلاصة ... ( من وجهة نظرى .. )
المميزات ..
جميلة .. متينة .. عائلية .. واسعة .. ومريحة .. تحتوى علي كل الكماليات باستثناء Air Bags ونظام ِABS ..
العيوب ..
لا تستخدم للجري خصوصا للشباب .. وهي أميل للعائلات ..
تتطلب ضبط زوايا .. و تعديل الحدفة إن وجدت ..
المهم .. أتمني أن أكون قد أفدت أحدا بمثل هذه التجربة .. ولكم مني خالص التحية والود ..