تقرير بسيط عن صيانة سريعة و تغيير زجاج
كان عندي ترشيح زيت على الموتور
جبت جوان غطاء التاكيهات من اخوان مقار بـ 45 جنيه
و جبت أويل سيل موبينة من محل بره بـ 5 جنيه
و فلتر زيت gm بـ 30 جنيه
و طلعت على حبيبي م / محمد فضالي ( توب جير )
غيرت الحاجات دي و نظفت البوابة و فلتر هواء كمان كوري بـ ( 25 جنيه )
و غيرت زيت فالفولين مش فاكر موديله ايه هو بيقعد 8000 كم بـ 180 جنيه
و منظف رشاشات ليكوي موللي بـ 40 جنيه
و العملية الحمد لله زي الفل
بس في حاجة نسيت اقولهم عليها في الصيانة
انا مرة الحمد لله لبست مطب بعديه حفرة على طول تحس انه كمين مش مطب
من ساعتها استهلاك البنزين كتير جداً
و كمان لما بفول المؤشر مش بيوصل للأخر
مش عارف بقى الاستهلاك طبيعي بس التانك الي معووج و لا التانك اتشرخ ( أنا مش بشوف اثر لبنزين تحت العربية )
بس انا برجح ان التانك الي معووج لان لما المؤشر بيكون في النص بتاخد اقل من 20 ليتر و مش بيوصل للأخر بردو
هبقى اعدي عليهم تاني اشوف الموضوع ده
و بعد كدة روحت غيرت الزجاج الامامي علشان كان في شرخ و خبطة ( كنت سرحت مرة و دخلت في عربية نقل شايلة مواسير و الماسورة جت تحت المساحات و فوق هواية التوربيدو ) يعني سنة كمان و كنت هلاقي التابلوه على حجري
جبت جريش الي بيبقى فيه مكان للمراية بتاعة الصالون بتركيبه بـ 350 جنيه
بس حاسس ان الشماسة بتاعته فاتحة شوية ( الحتة الفاميه الي بتبقى فوق دي )
بس هو الحمد لله تمام
بس كدة
انا عارف انه تقرير على قده بس انا مش بعرف اخبي عنكوا حاجة
