علمي علوم ولا علمي رياضة - ارائكم

**Amr96** · 25-06-2013 01:21 AM

[justify]السلام عليكم ورحمة الله وبركاته
انا رايح 3 ثانوي إن شاء الله .. والمفروض اختار بين علمي علوم وعلمي رياضة
لقيت عضو هنا بيسأل السؤال ده وانا اصلا فى نفس الوقت كنت بفكر في الموضوع فقلت استشير الناس :)

انا الحمدلله كويس فى الاحياء وفى الرياضة .. بس دماغي مش رياضية اوي .. لما المدرس بيديني الأفكار وبلاقى زيها او فيها اختلاف شوية بحلها .. ولما بحل افكار كتير من الكتب الخارجية بجيب درجة عالية فالامتحان.. لكن لو فكرة جديدة مشفتهاش قبل كدة نهائيا مش بحلها الا بعد وقت واحتمال ما احلهاش عكس بعض ناس معايا فى الدروس بلاقيهم ماشاء الله عرف فكرة المسئلة وحلها فى ثواني مع اننا ماشفناش الفكرة دي قبل كدة(انا مش كدة) ..
وفى نفس الوقت مش ميال لمجالات الهندسة اوي ماعدا الكمبيوتر وده بياخد اوائل اعدادى هندسة (وبما انى مش عبقري فى الرياضة فأعتقد صعبة)

وبالنسبة للأحياء فبحبها وميال لمجالات الطب البشري أكتر بكتير ..
لكن المشكلة قلقان من طول وصعوبة الدراسة وخايف لا ازهق من كتر السنين
بالاضافة الى ان الأطباء حديثين التخرج وضعهم مادياً وحش ومش بيتحسن الا بعد الماجستير على الاقل وده بياخد وقت ومجهود..
بالاضافة لكلام طلبة وخريجين طب اللى ممكن يعقدك واللى يقولك غلطة العمر واللى يقولك الطب مش عارف ايه وكلام كدة ..

انا كتبت علمي علوم .. بس ممكن اغير .. فحبيت اشوف ارائكم عشان الواحد مايندمش بعد كدة
واسف لو طولت فى الموضوع بس عشان ابقى وضحت كله
ايه رأيكم ؟[/justify]

**rahmanboud** · 25-06-2013 01:46 AM

المسألة نسبيه من شخص لآخر وإنت أقدر واحد على تقييم نفسك وبما إنك حابب المجال الهندسي يبقى لازم تفكر بطريقة المهندسين فى التصميم الهندسي وهى العمل دائما على أسوأ الظروف بمعنى أن تكون حساباتك على إنك مش حتجيب طب ولا هندسه طيب فى الحالة دى لو مجبتش هندسه ممكن أدخل تجارة إنجليزى وأكون محاسب ناجح أو لو مجبتش طب تبقى العلوم مناسبة ليا لو دخلت كيمياء مثلا وهكذا أنا ميولى إيه وبحب إيه وعلى فكرة دراسة الهندسه شيقه جدا جدا وسواء كنت طبيب أو مهندس إعمل حسابك إنك حتفضل طول عمرك تتابع الجديد وأحيانا تدرس الجديد يعنى مذاكرة طول العمر ودى عن تجربة بحكم إنى مهندس بس دفعة قديمة شويه إلا إنى ما زلت حتى اليوم بتابع كل ما هو جديد فى المجال الهندسي وربنا يوفقك لما فيه الخير لك

**Amr96** · 25-06-2013 04:22 PM

شكرا على ردك..
ياجماعة فين الردود ؟!

**amr011111** · 25-06-2013 04:31 PM

انا افضل علمى رياضه. وعلى فكره كلية الهندسه لا تعتمد على الرياضيات فى كل الاقسام
تقريبا قسم كهرباء اكتر قسم يليه ميكانيكا
وبعدين بتندثر فى اولى مدنى مش بتخدها بعد كده
وعماره كذلك ومساحه أيضا
وبالتالى الرياضه مش اساسيه فى دراسه الهندسه
لو دخلت مدنى او عماره او مساحه
والدارسه شيقه فى تلك الاقسام
وبالتوفيق
ميزة هندسه انك بعد خمس سنين مع خبرة العمل بتبقى متخرج تقدر تشتغل علطول ان شاء الله
الطب بيبقى محتاج دراسه بعد التخرج كتير
وبالتوفيق

**ehab** · 25-06-2013 05:34 PM

شوف الموضوع دا
http://www.nilemotors.net/Nile/348156-a.html
هتلاقي فيه شوية معلومات عن الطب
اقراهم
لو بعد ما قريتهم لسه عايز تعرف حاجة تانية اسألني

**Amr96** · 25-06-2013 11:21 PM

شكرا ً للناس اللى ردت :)
انا فعلا عرفت المعلومات وقريت الموضوع ، لكن لسة محتار فى اتخاذ القرار وخايف لا يكون الواحد بيختار غلط
ربنا يستر :)

**ehab** · 26-06-2013 12:37 AM

المشاركة الأصلية كتبت بواسطة amr96

شكرا ً للناس اللى ردت :)
انا فعلا عرفت المعلومات وقريت الموضوع ، لكن لسة محتار فى اتخاذ القرار وخايف لا يكون الواحد بيختار غلط
ربنا يستر :)

بص لو نويت تدخل طب
لازم تعمل حسابك انك تكون متفوق و تكون من الاوائل عشان ترتاح
و لازم تعرف ان اهلك هيصرفوا عليك فترة حلوة
و ان لازم تكون امكانيتكم المادية كويسة لو بتفكر ترتبط بدري

**YahiaAshraf** · 26-06-2013 12:50 AM

انا زيك بالضبط و كونت محتار و لسه كونت عامل الموضوع ده
http://www.nilemotors.net/Nile/365212-a.html

على الرغم من ان والدى ووالدتى دكاتره ( بشرى / اسنان )

بس برده انا مليش فى الطب و ميال للهندسه و بالفعل انا كتبت علمى رياضة

فانت اختار اللى تعرف تشتغل وتفنن فيه و يبقى حاجه انت حاببها

انا عن نفسى بحب الهندسه و الرياضة و الحاجات دى

علشان كده باذن الله انا علمى رياضة على الرغم من ان منهج علمى رياضه اكبر بكتير من علمى علوم

علمى علوم يدوب تقريبا 6 ابواب انما شوف بقى الرياضة كام فرع بس برده مهما كانت كبيره انا اقدر اخلص فيها

غير لما يكون قدامى منهج احياء صغير بس انا مش داخل دماغى

فلو انت ميال للاحياء و شايف نفسك تمام فيها يبقى توكل على الله

لو شايف نفسك هتبقى فى الرياضة افضل يبقى توكل على الله