الموضوع: احكلنا عن مغامراتك في ظل أزمة البنزين ( موضوع فكاهي )

بسم الله الرحمن الرحيم
السلام عليكم و رحمة الله و بركاته

طبعا في ظل الازمة اللي بنواجهها و شدة الاعصاب و الغضب

قولت نفك عن نفسنا شوية و كل واحد يحكي مغامراته الطريفة و هو بيحاول يحط بنزين


و هبدا بنفسي

نزلت من الساعة 10 الصبح بدور ع بنزين القاهرة الجديدة و م.نصر كلها مفيهاش و شوارع كتييير مهوية و شوارع مبتتحركش و وصلت لمصر الجديدة و الحدايق و كله مقفل
و فيه بنزينات قافلة مع ان عندها بنزين و شايف جراكن كبييرة بتطلع و بتدخل معبية و بنزينات عمالي تعبي لجراكن علي عربيات كارو و نص نقل بس هتقول ايه الناس كلها واقفين يتحسبنوا و يقولك مفيش رقابة ميدانية صح عليهم
ده غير خناقات عند كل بنزينة
سمعت واحد بيقول التاني في الشارع وطنية زهراء م نصر فيها و انه لسه ممون منها و انا في الماظة كده كده انا مروح و العربية مفيهاش بنزين طبعا قولت اشد ع هناك من الماظة ل سيتي ستارز من ورا لـالحي التامن للزهراء بحاول اتجنب اي مناطق فيها بنزينات عشان بتبقي مشلولة تماما غير كده الشوارع فاضية و الناس ماشيين يعقل اوووووي

( انا من زمان قولت يقلوا البنزين عشان الشوارع تفضي محدش بيصدقني هههه )

وصلت الحمد لله و الطابور واصل لحد السنترال فضلت واقف يجي ساعتين و في الاخر خلصت قولت مش مشكلة الناحية التانية اللي جنب الشبراوي فيها و الناس بتمون و روحت اتأكد بنفسي قلت ع الناحية التانية و فضلت واقف
واذ فجأة شخص عايز الحرق اقل حاجة معاه بيجو 504 و انا واقف راح راشق في العربية من ورا انزل ابص الله يرحم الشنطة بالكالون و هو معندوش خدش
الطريف بقي هنا يقولي

" انت زعلان ليه "

لا ابدا تعالي و انا اقولك
( هو اللي جابه لنفسه ع فكرة غلطش انا )

و الاطرف البنزينة ديه كمان خلصت

خلاص العربية بقت ع اخر شرطة و انا بطبعي مش من النوعية اول ما اسمع ازمة بنزين اطلع اجري افوول طالما معايا
الناس هي اللي بتعمل الازمة او تزودها اول ما يسمع ازمة يطلع يجري يفوول و تلاقي التفويلة ديه 10 لتر في تانك 40 لتر بتبقي عايز تولع فيه

السلبيات اللي شوفتها

- مفيش مراعاة يعني و انا رايح اقف في الطابور شاب معاه اوبل وقف في وسط الشارع عايز يرجع لأنه مكنش عارف ان ده اخر الطابور يعتبر جيه قبلي و قبل اللي قدامي اللي معاه سكودا راح صاحب السكودا داخل و صاحب الفيكترا قاله انا جي و التاني طنشه و كبر دماغه رجعت و خليته يدخل قدامي و عربيته فصلت مفيش بنزين اساسا و بقينا بنزقها و سابنا و راح يدور ع حبة بنزين ياخدهم يحطهم يمشوه للبنزينة بس و بقينا بنزقها عقبال ما يجي و الناس بقت بتساعد حتي بتوع النقل و خاصة ان الفيكترا ما شاء الله تقيلة و في نفس الوقت مطلع جامد

- تاني حاجة الناس بتدخل تفوول كل واحد يدخل يفوول طب ايه اللي هيحصل لما تحط 20 لتر بالكتيير و تهمد في بيتكم شوية او تخف رجلك ع البنزين او طالما معاك اللي يكفيك بتحط ليه زيادة لازم تخلي عندك دم عشان غيرك اللي معهوش يقدر ياخد و البنزينة المفروض متسمحش باكتر من 20 لتر
و النتيجة لما روحت اتأكد من وجود بنزين بقيت ابص في مؤشرات البنزين في العربيات بغلاسة لقيت العربيات اللي بتحط اغلبهم معاه فوق نص التانك و فيه عربيات المؤشر قريب من الـFull و في الاخر الناس اللي عربيتهم ع اخر شرطة معرفوش ياخدوا لتر واحد و ركنوها و قفلوها و انا الحمد لله اني عرفت اروح البيت بالاحتياطي اللي باقي و اهي مركونة لحد ما تفرج و انزل بجيركن

- تالت حاجة محتاجيين رقابة ميدانية شديدة عشان البنزينات اللي مش راضية تطلع بنزين للناس و بتطلعه في جراكن و العربيات الكارو و النص نقل اللي مليانة جراكن و بيعبولهم و اللي يكلم يقوله ملكش فيه و خليك في حالك ياما يتضرب

- مفيش نظام و كله بيتكتل و خلاص و بيدخلوا بغباء و ده بيدل ع مدي جهل الكثيرين ده سواقين النقل اللي الناس بيقولوا عليهم بيشربوا و جهلاء عندهم نظام عن الكثير من اصحاب الملاكي الحاصليين ع المؤهلات العليا

واخيرا و ليس اخرا بعد كل ده روحت بالعربية ع اخر شرطة
و شكل اليوم ده مش ناوي يخلص الا لما ارتكب جناية
الاقي شخص مش عارف اقول ايه عليه ساب كل الباركينج و راكن مكاني تحت البيت
هي المشكلة مش في الركن لما بيكون ضيوف جايين بنسيبهم مراعاة للجيرة و كده كده كل المنطقة متفقيين مع بعض ع الاماكن منعا للمشاكل و الناس متفهمة
لكن الطريف فعلا
انه ساكن ع بعد عمارتين و عمارته فيها جراج تحت ده غير مكان لركن 3 عربيات قدام بوابة العمارة
( و كان هيجيبه لنفسه برده لأنه مش عاجبه بس جابها من قصيرها و لو كان كتر في الكلام مكنش يلوم غير نفسه انا جايب اخري طول اليوم )

طلعت البيت قولت هييييييه ما احلي وجود العجلة اخلص بقي اي حاجة قريبة ورايا اومال انا شايلها ليه اروح اطلعها و ارجلش الفرامل و اظبطها و جيت انزلها

لقيت الكاوتشتين مخرومين و لازم يتغيروا داخلي و خارجي

حقا كان يوم ظريف

و اخيرا احب اقول




هل من مغامرات طريفة احسن انا قلبتها دراما ههههههههه