تجربة هارد ssd على اللاب توب

**Ahmed Selim** · 26-06-2013 08:39 PM

المشاركة الأصلية كتبت بواسطة m_elkhishin

هو عبارة عن هارد hybrid .هارد عادي و SSD
الهارد العادي مساحته كبيرة حتى 1 تيرا
ال SSD مساحته لا تتعدى 32 جيجا عبارة عن كاش۔ الهارد بيكيش الملفات ال frequent على الجزء ال SSD

سمعت عنه فعلاً..........و أعتقد فى الوقت الحالي ممكن يكون حل كويس جداً بدل ما تمشي بهارد external

**Elawany13** · 26-06-2013 11:29 PM

الهاردات الجديدة ديه
بتتوصل بكابلات IDE ولا sata ولا usb ??

**Ahmed_Adham** · 27-06-2013 01:00 AM

المشاركة الأصلية كتبت بواسطة marsguy

أنا لابتوب الشغل بتاعي فيه هارد ssd

هو سريع جداً طبعاً بس بصراحه مش إعتمادي أوي

أنا وحوالي 10 زمايلي جابولنا نفس اللابتوب, هاردين منهم ضربوا في أول سنه

بصراحه ده مؤشر مش مريح خالص وكلنا بنفكر نستري هاردات خارجيه ناخد عليها باك أب

اللابتوب بتاعي لونوفو

كان فيه كلام كتير فعلا أول ما ال ssd نزل بخصوص الاعتماديه بس معتقدش ان ده لسه موجود لأن أنا عندي 4 هاردات ساتا على سيرفر من مارس 2012 وشغالين كويس بس هما انتل 520 ودي من أحسن ماركات ال SSD فممكن تكون الماركه بتفرق.

وكمان أبل بتنزل هاردات sdd في الماكبوك اير من 2011 أو قبلها كمان ومظنش ان أبل هتنزله وهيه مش متأكده من اعتماديته وبرضه أرجع وأقولك يمكن الفكره في الماركه.

**naser_56** · 27-06-2013 01:19 AM

المشاركة الأصلية كتبت بواسطة Ahmed A.Maksoud

السلام عليكم

طبعاً أحد أهم عيوب الهاردات ال SSD انها ليها عدد محدد من مرات القراية و الكتابة ( بيجي معاه ضمان سنتين) و أن لو الهارد ضرب صعب جداً إن لم يكن مستحيل لحد دلوقتي أنك تعرف تجيب الداتا اللى عليه.

أتمنى أكون أفدتكم.

الف مبروك الهارد وفعلا هو مميز جدا في الاقلاع وسرعه تشغيل البرامج ومن الممكن ايضا ذياده السرعه سواء للقراءه او الكتابه وذلك عن طريق تركيب ٢ هارد وربطهم بمصفوفه رايد 0 وبكده البيانات هتبقي اسرع بضعف السرعه علشان الكتابه او القراءه بتكون علي الهاردين في نفس الوقت كانت موجوده عندي علي السوني ولكني لغيتها علشان مش محتاج للسرعه الكبيره دي وكافي جدا بالنسبه لي سرعه الهارد ssd ومش محتاج ادبل السرعه وايضا لغيتها علشان احافظ علي هارد فيهم لانك كل ما بتفرد برامج او تخزن بيانات العمليه بتتوزع علي الهاردين وبكده انا بهلك في الاتنين في نفس الوقت ..

بخصوص ان الهارد لو ضرب مش هتعرف ترجع البيانات لا بالعكس الهارد لما بيبوظ هو بيكون فقط غير قابل للكتابه عليه ولكن يمكنك القرائه منه عادي خالص وهو عموما السبب الرئيسي لسرعه تلفه كثره الكتابه عليه وكثره الفورمات اما بخصوص القرائه عادي خالص ما بيحصلهوش اي حاجه

**Ahmed Selim** · 27-06-2013 02:11 PM

المشاركة الأصلية كتبت بواسطة marsguy

أنا لابتوب الشغل بتاعي فيه هارد ssd

هو سريع جداً طبعاً بس بصراحه مش إعتمادي أوي

أنا وحوالي 10 زمايلي جابولنا نفس اللابتوب, هاردين منهم ضربوا في أول سنه

بصراحه ده مؤشر مش مريح خالص وكلنا بنفكر نستري هاردات خارجيه ناخد عليها باك أب

اللابتوب بتاعي لونوفو

مش عارف بصراحة موضوع الإعتمادية ده.........أنا عارف أنه أقل إعتمادية بس مش لدرجة أنه يضرب فى أقل من سنة.

و أنا جبته بال upgrade kit و دي حطيت فيها الهارد القديم و مشغله external و عليه الشغل.

المشاركة الأصلية كتبت بواسطة naser_56

بخصوص ان الهارد لو ضرب مش هتعرف ترجع البيانات لا بالعكس الهارد لما بيبوظ هو بيكون فقط غير قابل للكتابه عليه ولكن يمكنك القرائه منه عادي خالص وهو عموما السبب الرئيسي لسرعه تلفه كثره الكتابه عليه وكثره الفورمات اما بخصوص القرائه عادي خالص ما بيحصلهوش اي حاجه

ده اللى أنا سمعته من أكتر من واحد....

فيه حاجتين..........الهارد نفسه ضرب.......و دي متعرفش تطلع منه حاجة

و الحاجة التانية عدد مرات الكتابة خلص.......و ساعتها ممكن تقرأ عادي و تاخد اللى انت عاوزه.