الموضوع: تجربة هارد ssd على اللاب توب

السلام عليكم

أشتريت النهاردة هارد kingstone من نوع SSD

النوع ده بيفرق عن الهارد العادي ال IDE و ال SATA أن سرعة القراية و الكتابة عليه حوالي 8 أضعاف الهاردات العادية.

طبعاً فيه فرق كبير بينهم فى السرعة............الويندوز بتقوم فى أقل من 10 ثواني

أنا كان عندي اللاب بتاع الشغل فيه مشكلة أنه مع كتر الحاجات اللى كانت بتقوم عليه مع الويندوز (حاجات أمنية خاصة بالشغل بحيث أنها بتشيك على الأنتي فيروس و الويندوز أبديت الخ و لو لقت حاجة منهم مش updated بتدخل الاب توب على الشبكة بس في segment تانية تعمل الأبتديت و بعد كده تدخل الشبكة المعتادة)

الحاجات دي مع الدومين مع البرامج اللى كانت بتقوم فى الأول كانت بتخلي الويندوز يقوم فى حوالي 3 ل 4 دقايق لو كل حاجة معمول لها أبديت ( اللاب كور I5 و 4 جيجا رام)

حالياً أقل من دقيقة و الاب توب بيكون شغال و زي الفل.

الهارد اللى أشتريته مساحته 120 جيجا......و أشتريت حاجة أسمها upgrade kit و دي بتيجي مع الهارد فى علبة واحدة....فيها وصلات كهرباء علشان الهارد الجديد و هاوسنج بتاع هارد خارجي.....تطلع الهارد اللى فى اللاب و تحطه فيها و تستخدمه كهارد خارجي.

طبعاً أحد أهم عيوب الهاردات ال SSD انها ليها عدد محدد من مرات القراية و الكتابة ( بيجي معاه ضمان سنتين) و أن لو الهارد ضرب صعب جداً إن لم يكن مستحيل لحد دلوقتي أنك تعرف تجيب الداتا اللى عليه.

علشان كده مع ال upgrade kit بيجي سي دي عليه برنامج بياخدلك باك أب كل فترة.

أحسن حاجة لو هتجيب هارد SSD أنك تخلي عليه ويندوز بس و تحتفظ بملفاتك على هارد خارجي.

و فيه نوع تاني من الهارد ال SSD أسمه Hyper X و ده سرعة قراية و كتابة أعلى من ال SSD العادي و أحتمالية أنه يبوظ أقل.....بس مكنش فيه غير ال 240 جيجا و كان غالي قوي بصراحة.

أتمنى أكون أفدتكم.