سيارة فى حدود 35 الف جنيه
انا نويت ان شاء الله اشتري عربية - ربنا ييسرها لي ان شاء الله - بس عاوز اسال اهل الخبرة بالمنتدي بالخصوص ده انا امكانيات في حدود 35000 جنية واتعرض عليه اربع عربيات
1- ميتسوبيشي لانسر موديل 89 (1300 سي سي منيول وتكييف وسنتر )
2- فيات ماريا موديل 2001 - العربية دي رفعتها في بنزينة كالتكس اللي في تقاطع عباس العقاد مع مصطفى النحاس - العربية شكلها حلو جدا وامكانيتها كالاتي ( 1242 سي سي مانيوال و تكييف وباور وسنتر وزجاج كهرباء امامي ) بس خايف قطع غيارها ما تكونش موجودة ولما سالت الكيلاني قالي موتور وعفشة قطع غيارها عندي وبرضه خايف اجي ابيعها بعد فترة ما اعرفش ابيعها والصنايعية برضه خصوصا ان م ابقاش ينزل منها جديد من سنة 2004 تقريبا ، واللي كشف عليها في البنزينة قالي موتورها 80 في المية بس فيها خبطه في الشاسية من ناحية العجلة في اول 3 سم بس مش ماثر لا على الحوض ولا على الشنطة او العربية اصلا تقريبا خبطت في غطاء بلاعة مجاري
3- رينوا كليو موديل 2002 ( 1300 سي سي كاملة منيول )
4- رينوا ميجان موديل 2000 ( 1600 سي سي كاملة اوتوماتيك ) حالتها ممتازة
مع اني الماريا والميجان عجبني جدا بس خايف ومقلق والله مش عارف يمكن لأني اول مرة اشتري ناس تقولي الفيات وناس تقولي الميجان .
انا عاوز العربية تكون صالونها واسع ، وكبيرة نوعا ما عشان اعرف ااقعد جواها براحتي وتكييف طبعا يكون كويس جدا هسافر بيها المنوفية مريتين او تلاتة اسبوعيا على الاكثر غير مشاوير في القاهرة ، وفي نفس الوقت اعرف ابيعها ، وقطع غيارها ما تكونش غاليه قوي يعني - على الرغم ان مافيش اي حاجه رخيصة دلوقتي .
لو هتختاروا من الاربعة دول هتختاروا ايه وتنصحوني بايه .......؟؟؟
بالله عليكم ساعدوني ودلوني وجزاكم الله خيرا