الموضوع: ايهما افضل التيجوا القديمه والا الجديده

المشاركة الأصلية كتبت بواسطة tiggosaid

طالما بتتكلم عن ال 1600 مانيوال،،وتقدر تدفع الفرق،، اعتقد طبعاً وبدون تفكير تجيب الجديدة.
ودة وفقاً ورؤيتى الشخصية لعدة اسباب اهمها:
- غالباً الاصدار الجديد من اى موديل سيارة بيكون الافضل، لانة بيعالج المشاكل البتتكون ظهرت فى الاصدارات السابقة.
- طالما بتشترى زيرو، يبقى لية تجيب شكل قديم وانتاجة وقف، غاوى تعذب نفسك؟
- من حيث الشكل فالتيجو الجديدة احلى واشيك من برة ومن جوة ، وفى جميع تفاصيلها، والتيجو القديمة كانت دايما بتتعاب بانها فقيرة من جوة.
- التجهيزات فى التيجو الجديدة اعلى بكتير واحدث فى التكنولوجيا، والتصميم.
- المحرك افضل بكتير فى التيجو الجديدة ، وبيعالج المشاكل الكانت فى التيجو القديمة زى صغر المحرك على حجم ووزن السيارة، وضعف السحب فى بداية المشوار، وضعف السحب عند المطالع. المحرك الجديد يتشابة فى التكنولوجيا من حيث الفكرة بgdi البينزل فى الاسبورتج، والix35،ومحركات مجموعة فولكس فاجن البتنزل فى الفولكس والاوكتفيا، وهى المحركات صغيرة السعة اللترية وذات عزم اعلى (طبعاً من الفارق بين التكنولوجيا والجودة فى كل منهم).
- حسب معلوماتى انة تم تعديل تصميم العفشة، وتوزيع هواء التكييف داخل السيارة، ,وسير الكاتينة بتاعتها جنزير وبتتغير على ال 180 الف واطول من الشكل القديم 5سم .

يعنى من الاخر الكفاءة اكيد فى الجديدة افضل، توكل على الله.
على فكرة انا معايا ال 2000 اتوماتيك، لو كان فى 1600 الجديدة اتوماتيك، كنت جبتها من غير كلام، وحسب معلوماتى هتنزل اول سنة2014 وانا مستنيها.

مفيش كلام بعد كده