المشاركة الأصلية كتبت بواسطة saedelghamry
الا عضاء الكرام تقبلونى صديق لكم
انا سعيد غمرى من الشرقيه 01119096696
القصه بدات ان الصرق عندنا فى الشرقيه وحشه جدا ومطبات عاليه وطرق مكسره وكان لا زم أجيب عربيه عاليه عن الارض وتتحمل الطرق بتاعتنا وبالأمانه السوزوكى الفيتارا 1997 v6 خير مثال لذلك أنا جبت عربيه سوزوكى فيتارا 97 نبيتى إشتريتها من مدينه المنصورة وعجبتنى جدا وخلصت فيها وتمام التمام وعربيه جميله وقويه جدا وبتستحمل البهدله وبتشيل اوزان غير عاديه بس المشكله الوحيده اللى قابلتنى هى قطع الغيار عندنا مش موجوده فى الشرقيه ولا المنصوره وطبعا كنت بأطر أروح القاهره أول حاجه بحثت على النت عن توكيل لصيانه السوزوكى وصفولى مكان خلف سور المطار ورحت وتبين لى ان كلهم حراميه طبعا كانو عايزين يدبسونى انا كنت رايح علشان تسريب بسيط فى الزيت من أسفل الموتور وماكينه الزجاج الامامى كانت ضعيفه قالولى العربيه هاتعوز فحص شامل وها تسبهالنا 30 يوم وتدفع 15000 جنيه واحنا هنتصل بيك فا قولت خلا ص انا هافكر وأرجع ليكوا سلام عليكم . قالولى انت رايح فين انت تدفع 150جنيه الاول تمن الفحص على ترشيح الزيت وماكينه الزجاج طبعا انا عملت مشكله معاهم وزعقت معاهم وشتمتهم ومن هنا لهنا دفعت 50 جنبه بالعافيه . بعد كده رحت لميكانيكى تانى لقى خرم بسيط فى الكارتير ولحمه بلحام حديد وكلفنى 50 جنيه وبعدها 5 شهور وإتسرقت منى العربيه فى مدينه الشروق طبعا لفيت لما دخت وفص ملح وداب .
طبعا بعديها ركبت بيجو 504 وعزبتنى جدا
فارحت سوق السيارات وبعتها وإشتريت سوزوكى فيتارا تانى بس مانيوال وبدأت أعمل فيها بعض الصيانه وعرفت الميكانيكيه وأماكن قطع الغيار وبعدها ظهر عندى صوت خربطه فى الموتور والعربيه مارضيتش تدور فافكيتها ولقيت ان السبيكه اتاكلت وجرحت الكرنك طبعا قعدت ألف فى الحرفين كل أما أروح لواحد يقولى ان العربيه دى مابينفعش ليها عمره وسالت واحد واتنين وتلاته يقولوا نفس الكلام فاسالت على الكرنك لقيتوا 1500 فى مكان 1450فى مكان تانى وطبعا سألت على طقم السبيكه وطقم شنبر وطقم جيوانات وبيل لقيتنى هاروح ل5700 جنيه وسألت على الشورت بلوك بدون أدوات تغزيه لقيتوا 8500 جنيه الشورت بلوك اللى هوه من عند غطاء التاكيهات لعند الكرتيره وادوات التغزيه اللى هيا المارش والديناموا وكمبريسور التكييف والباور وسألت على الماكينه كامله استيراد خارج قلولى 10500 اليابانى فاشتريتها وركبتها وماشاء الله العربيه ظبتت جدا والحمد لله وإستهلاك البنزين بقى ضعيف جدا بتعمل معايا 180كيلوا متر فى صفيحه البنزين ودى تجربتى مع الفيتارا ومعلش طولت عليكم وأرجوا انى اكون الاستفاده من تجربتى المتواضعه وأى أستفسار من الاعضاء الكرام رقم تليفونى مكتوب فوق وشكرا
وأماكن قطع الغيار هى:-
عند الشرقاوى جسر السويس أمام فندق السلام
وعند العالمى حجاج فى الحرفيين مدخل حى الزهور دا عنده جديد وأستيراد عنده كل حاجه للفيتارا وأرقام تليفونوا معايا
وعند ياسر الشامى فى الحرفيين شارع حسان إبن ثابت أمام بلوك 9 الحرفيين وعنده جديد وإستيراد بأسعار حلوه وتليفونه معايا
وفيه ميكانيكى فى الهرم إسمه عرفه محمد داكان شغال فى توكيل سوزوكى وفاتح فى 2شارع النادى عند محطه مترو نصر الدين بجوار مركز شركه محمول إتصالات الهرم بعد ماتطلع من نفق الجيزه على اليمين بإتجاه شارع الهرم وهوه متخصص فى السوزوكى بأنواعه وعنده قطع الغيار أصلى وتقليد
ولى فكره للعلم : إن فلتر البنزين بتاع الفيتارا v6 هو بتاع الهيونداى إلنترا 1994 .
وساعه المارشليه بتاعه بيجوا 504
وخزنه الدبرياج اللى فوق بتاعه شيفروليه ربع نقل
وبستم الدبرياج اللى تحت بتاع ديمكس ربع نقل