الموضوع: الحمد لله فولت النهارده فى اربع ساعات بس :)

السلام عليكم ورحمة الله وبركاته
كان عندى جلسة علاجيه لابنى ميعادها من اسبوع وطبعا طول الاسبوع اللى فات مش عارف افول النهارده قولت انا هانزل افول ويا قاتل يا مقتول
روحت البنزينه لقيت طابور طوييييييييييل على بنزين 80 وطابور صغير على 92 حوالى 7 عربيات بس الغريب ان نور البنزينة كان مطفى وفى ناس عماله تتخانق
عرفت بعد كده ان الخناقه كانت بسبب الجراكن فصاحب البنزينه قام قافل النور وقال مفيش حد هايفول النهارده الصبح بقى وعليكوا خير
المهم كام عربيه من اللى قدامى مشيوا واتبقى 3 عربيات بس قدامى فقولت مش مهم انا هاقف لحد الصبح ان شالله حتى انام فى العربيه
وفضلت مستنى من 11 بالليل لحد الساعه 3 الفجر
وفجأة ظهر عربيتين ملاكى بتوع اتنين ظباط فى القسم عندنا فالراجل صاحب البنزينه طبعا دخلهم جوه وطبعا مايقدرش يفولهم ويقفل تانى وفى نفس الوقت مايقدرش يقولهم الصبح
المهم عشر دقايق كده وقام فاتح الكهرباء وفول العربيتين بتوع الظباط اول عربيه فولها وكان الظابط حاطط 3 جراكن كبار فى شنطة العربيه ملاهم كلهم والتانى شرحه
قولت ياض مش مشكله اهى برضه مصلحه ... هاتعرفوا ليه بعد كده :)
ابتدى بالعربيات اللى قبلى لحد ما الدور جه عليا قمت مفول ومخرجله جركن كبير 20 لتر كان معايا من زماااااااان الواد بصلى كده ومن غير مايفتح بقه خرج المسدس من العربيه وقام مليلى الجركن
والله رغم انى مابحبش الحركه دى بس صعب عليا نفسى ان البشوات الظباط يفولوا ويملوا 6 جراكن ومن غير مايقفوا فى الصف كمان وانا ما املاش الجركن بتاعى رغم انهم ممكن يفولوا فى اى وقت انما انا ممكن اتزنق نفس الزنقه دى تانى
وبعد مافولت قررت قرارين مهمين جدا
الاول هاروح مشوار الدكتور بتاع ابنى ده ان شاء الله وهاركن العربيه لحد ما ازمة البنزين دى تتحل
الثانى جركن البنزين اللى معايا ده هاتبرع بيه لأى حد من حبايبى اللى هاعرف انه محتاج بنزين وفى الغالب هايكون حمايا العزيز اللى ممكن يقضى مشاويره كلها مواصلات او على رجله على انه يروح يقف فى صف البنزينه ... والله كان عندى النهارده وجالى مشى :) ربنا يديله الصحه
معلش دوشتكوا :)
اخوكم
على عبد الفتاح
ابو احمد