الموضوع: تقييم وتقرير مفصل بالصور .. كيا سيراتو الجديدة 2013

بسم الله الرحمن الرحيم

أولا باركولى الحمد لله إشتريت سيراتو الجديده 2013 توب لاين لونها فيرانى ( Glittering M-e-t-a-l ) , الأوبشنز بتاعها زى الهاى لاين فى مصر ماعدا ( فرش جلد - كراسى كهربا بميمورى - تكييف أوتوماتيك ) بس اللى معايا فيها سبويلر خلفى اعتقد فى مصر مفيهاش

معظم التقييم هايكون مقارنة بالشيب اللى فات لانها قعدت معايا أكتر من سنه ونص فأعتقد انى اقدر أحكم على الفروق كويس , اللى معايا كانت 2010 هاى لاين

نبدأ التقرير

- الموتور : صوته هادى وعزله أفضل , السحب والاداء أفضل لكن مش بنسبة كبيره اوى ومع السحب الصوت ممتع مش مزعج , السير كاوتش مش جنزير , أعتقد ان نقطة الموتور من الحاجات المهمه اللى بقت أحسن فى العربيه مش مجرد زيادة 6 حصان وخلاص

- الفتيس : الشيب القديم اللى معايا كانت 4 سرعات فحسيت بفرق كبير مع ال 6 سرعات اللى فى الجديده مريح الموتور ونقلاته سلسه

- العفشه والنشوفيه : تعتبر النقطه الأهم فى الفرق بين الشيب القديم والجديد , بجد فرق كبير وملحوظ فى نعومة العفشه , رغم انها نفس ال Setup بتاع الشيب اللى فات وبرضه جنوط 17 بنفس مقاس الكاوتش لكن الفرق واضح وتعتبر مش ناشفه خالص مقارنة بالشيب اللى فات , ودا من النقط الرئيسيه والمهمه اللى معظم الناس اشتكوا منها فى القديمه

- الثبات : أفضل من الشيب اللى فات وأعتقد ان الاسباب هى قاعدة العجلات الجديده 2700 والإرتفاع عن الأرض قل بقى 14 سم وال Aerodynamics بقت أفضل 0.27 Cd الرقم الأفضل فى فئتها

- الفرامل : ممتازه وفرامل الشيب اللى فات برضه كانت ممتازه

- إستهلاك البنزين : محسبتوش بدقه اوى لكن اعتقد مع السواقه الهاديه ممكن يبقى متوسط 10 لتر لكل 100 كم

- التكييف : قوى وتبريده سريع

- العزل : ممتاز

- الوسع الداخلى ووضعية الجلوس ومساحة الرؤيه : العربيه اوسع وشنطتها 422 لتر , وضعيه الجلوس مريحه والكراسى مش ناشفه , الرؤيه الخلفيه مش واضحه اوى بسبب زاوية الميل للازاز الخلفى فبقت مساحة الرؤيه أصغر

- التقفيل والخامات : ممتازه , جلد وكاربون والخامات ملمسها ناعم حتى البلاستيك اللى فيها ملمسه مش خشن وملوش اى صوت تزييق او غيره , بجد إمتياز على عربيه فى الفئه دى بالسعر دا

- الساوند سيستم : نقى وواضح وبقى 6 سماعات 4 فى الابواب و 2 تويتر

* الحاجات اللى اتغيرت أو زادت

عواكس فى الاكصدام الخلفى

الاريال بقى مدمج فى الزجاج الخلفى بدل اريال السقف

مسند اليد بيتحرك لورا وقدام

بقى فى زرار فى الشنطه لفتحها بجانب الفتح من الريموت ومن جوا , القديمه كانت من الريموت ومن جوا فقط , وفى برضه زرار للطوارئ لو الشنطه إتقفلت على حد وهو جوا ( او واحد بيهزر هزار تقيل ) تقدر تفتح الشنطه وانت جواها

المساحات بقت Aero Type

بدال البنزين بقى Organ-Type , مهم وانت بتشترى دواسات للعربيه تاخد بالك عشان الدواسات متجيش على بدال البنزين

الأوبشنز والتجهيزات حدث ولا حرج :) هاتكلم على الحاجات اللى اول مره تنزل فى العربيه

زى ال Welcome Light أول ماتقرب على العربيه وهى مقفوله ومعاك المفتاح من غير ماتفتح او تدوس على حاجه هاتلاقى المرايات فتحت والنور اللى فيها نور هى والأكر , لو بعدت عن العربيه ومفتحتهاش هايقفلوا تانى لوحدهم بعد ثوانى , الأوبشن دا ممكن يتلغى لو حابب

تحكم فى درجة إضاءة التابلوه وإرتفاع إضاءة الفوانيس الأماميه

فوانيس أماميه وخلفيه LED

بقى فيها فتحات تكييف خلفى واعتقد انها من اوائل العربيات فى فئتها اللى تنزل بيه

فتحة تبريد فى درج التابلوه

الطاره Tilt & Telescopic

شيفتات فى الطاره

المرايات تضم وتفتح مع الفتح والقفل وفيها إضاءه هى والأكر

مثبت سرعه

كمبيوتر العربيه بخلاف إستهلاك البنزين وعدادات ال Trip والمسافه الباقيه على التانك , تقدر تظبط منه كذا حاجه زى قفل وفتح الابواب اول ماتتحرك او مع تغيير الفتيس او مع باب السائق , والإضاءه وال Welcome Light اللى اتكلمت عنه فوق , فى كمان Service تقدر تكتب فيها ميعاد الصيانه الجايه عشان تفتكر سواء بالشهور او بالكم ولما الميعاد يقرب هايفكرك بالصيانه فى كل مره تدور فيها العربيه

ال Flex Steering اللى بيخليك تتحكم فى درجة الباور بالإختيار بين 3 أنظمه Comfort/Normal/Sport , الكومفورت أنعمهم لدرجة ممكن تضايق لانه خفيف جدا , النورمال متوسط ودا اللى انا عامله فى معظم الوقت ومش هايضايق اى حد متعود على الباور الكهربا , السبورت اللى بيحب يتقل الطاره شويه عشان السواقه الرياضيه والطرق السريعه

السنسور الأمامى عباره عن عدستين فى طرفين الاكصدام مش مغطى الاكصدام كله , مفيد طبعا فى الركنات وبيشتغل اوتوماتيك اول ماتجيب ال R وممكن تشغله وانت على ال D بالدوس على الزرار بتاعه جنب الفتيس وبيفصل لوحده اول ماتوصل لسرعة 10-20 كم

سى دى TouchScreen بكاميرا وطبعا سنسور خلفى , السى دى للاسف مفيهوش CD Changer هو 1 سى دى فقط , بس ال USB بيقوم بالواجب والسى دى فيه مساحه داخليه 1 جيجا وبالتحديد 800 ميجا , وطبعا بتظبط منه ال Settings الصوت ودرجة الإضاءه بتاعته والبلوتوث واللغه

الازاز عندى مكتوب عليه Solar Glass دورت على النت ملقتش معلومات دقيقه بس اللى فهمته انه عازل للحراره وللضوضاء كمان تقريبا , بس كدا كدا انا مركب عازل حرارى ومغمق الازاز عشان الشمس والحراره هنا شديده طبعا

ندخل على الصور