المشاركة الأصلية كتبت بواسطة SAMEH_FOUAD
هههههههههههههه , فكرتنى ايام ال128 الله يمسيها بالخير
لسة هركب العربية لقيت ريحة منيلة بستين نيلة , عرفت انها ريحة عرسة , وانا بقى رايح الجامعة , ومش هينفع بقى ادخل عليهم بالريحة دية وساعات كان فية اصدقاء بعدى عليهم بخدهم فى طريقى
روحت نظفت العربية , وبفتح الشنطة لقيت عظم على صراصير ميتة على بقايا اكل , وقولت بس هية اكيد بتتدخل من الشنطة , روحت منظف الشنطة ورشيت معطر فى السيارة كلها , وشغلت الكاسيت
وتقريبا تقريبا كانت العرسة عايزة تتعلم السواقة لانها كان عاجبها اوى الكرسى بتاعى ( اكل وشرب ونوم وحمام ) هههههههههه
وانا لسة بسخن العربية وهتحرك ببص فى المرايا , لقيت عرساية محترمة واقفالى على الكنبة الخلفية مابين السماعتين وبتبص عليا , فى المرايا شوفتوا الجبروت , انا من المفاجأة فضلت ابصلها شوية مش مصدق نفسى انى انا وعرسة فى عربية واحدة ومقفولة علينا , روحت انتفضت نفضة وبحركة بهلوانية سريعة كنت فى خارج السيارة فى ثانية , فتحت الباب الامامى والخلفى , ومستنى المدام ( العرسة) تطلع , لحد الحمد لله ماربنا اكرمنى وطلعت بعد عشر دقائق مستنيها تطلع واخرتنى على الكلية
وطول مانا ماشى مقلق وعمال ابص على المرايا وعلى الكنبة الخلفية , وقولت لازم اشوف حل للموضوع دة انا مش هفضل كدة , دانا كدة مأجرلهم شقة مفروشة مجانا , ومش بعيد الاقى عائلات بعد كدة فى العربية ومن جميع الاشكال
وروحت للسروجى ومشينا ورا المدخل لحد مالاقينا واحد فى الشنطة والتانى تحت هواية التكييف اللى فى حوض الماتور ومنفد على صالون السيارة , والحمد لله